11 ປະເທດ TPP ຈະລົງນາມຂໍ້ຕົກລົງໃໝ່ ຫລັງທ່ານ ທຣຳ ຖອນຕົວ
11 ປະເທດສະມາຊິກເກົ່າຂອງຂໍ້ຕົກລົງການເປັນຫຸ້ນສ່ວນຂ້າມມະຫາສະໝຸດປາຊີຟິກ (TPP) ຈະລົງນາມຂໍ້ຕົກລົງໃໝ່ ທີ່ນະຄອນຫລວງຊັນຕິອາໂກ ຂອງຊີເລ ໃນວັນທີ 8 ມີນານີ້ຕາມເວລາທ້ອງຖິ່ນ, ພາຍຫລັງອາເມລິກາຖອນຕົວຈາກ TPP ໃນໜຶ່ງປີກ່ອນ.
ຂໍ້ຕົກລົງໃໝ່ໃຊ້ຊື່ວ່າ: ຂໍ້ຕົກລົງຄວບຄຸມ ແລະ ກ້າວໜ້າເພື່ອການເປັນຫຸ້ນສ່ວນຂ້າມມະຫາສະໝຸດປາຊີຟິກ (CPTPP) ຈະຫລຸດພາສີລະຫວ່າງປະເທດສະມາຊິກ ແລະ ສົ່ງເສີມການຄ້າລະຫວ່າງກັນ ໂດຍໄດ້ແກ້ໄຂ ຫລື ຢຸດມາດຕະການໃນ TPP ກວ່າ 20 ມາດຕາ ສ່ວນຫລາຍເປັນເລື່ອງຊັບສິນທາງປັນຍາທີ່ຄະນະເຈລະຈາອາເມລິກາຮຽກຮ້ອງໃຫ້ບັນຈຸໄວ້. ນັກວິເຄາະເບິ່ງວ່າ: ການທີ່ມາດຕາເຫລົ່ານີ້ຍັງບໍ່ຖືກຍົກເລີກສະທ້ອນໃຫ້ເຫັນວ່າກຸ່ມນີ້ຍັງເປີດໂອກາດໃຫ້ອາເມລິກາຢູ່. ຂໍ້ຕົກລົງຈະມີຜົນພາຍໃນ 60 ວັນ ພາຍຫລັງໄດ້ຮັບສັດຕະຍາບັນຄົບທັງ 11 ປະເທດ.
ກະຊວງຕ່າງປະເທດຊີເລ ເຈົ້າພາບພິທີລົງນາມຖະແຫລງວ່າ: CPTPP ຈະສ້າງມາດຕະຖານໃໝ່ໃຫ້ແກ່ຂໍ້ຕົກລົງການລວມຕົວທາງເສດຖະກິດລະດັບພາກພື້ນ ຫລື ການເຈລະຈາໃນອະນາຄົດຂອງອົງການການຄ້າໂລກ ແລະ ກຸ່ມການຮ່ວມມືທາງເສດຖະກິດໃນພາກພື້ນອາຊີ-ປາຊີຟິກ (ເອເປກ). ຂະນະທີ່ຊີເລຈະມີໂອກາດທີ່ດີຂຶ້ນໃນການເຂົ້າເຖິງຕະຫລາດທີ່ເປັນຕະຫລາດສົ່ງອອກ 17% ຂອງປະເທດຢູ່ແລ້ວ ເຊັ່ນດຽວກັບແມັກຊິກ, ເປຣູ ທີ່ຈະເຂົ້າເຖິງຕະຫລາດອີກເບື້ອງຂອງມະຫາສະໝຸດປາຊີຟິກໄດ້ດີຂຶ້ນ. 11 ປະເທດສະມາຊິກ CPTPP ມີປະຊາກອນລວມກັນ 500 ລ້ານຄົນ ປະກອບມີ ອົດສະຕຣາລີ, ບຣູໄນ, ການາດາ, ຊີເລ, ຍີ່ປຸ່ນ, ມາເລເຊຍ, ແມັກຊິກ, ນູແວນເຊລັງ, ເປຣູ, ສິງກະໂປ ແລະ ຫວຽດນາມ, ສ່ວນອາເມລິການັ້ນ ປະທານາທິບໍດີ ໂດນັນ ທຣຳ ກ່າວໃນກອງປະຊຸມເສດຖະກິດໂລກ ທີ່ດາວອສ ໃນເດືອນກ່ອນວ່າ: ອາເມລິກາອາດກັບໄປຮ່ວມກຸ່ມນີ້ ຖ້າມີການແກ້ໄຂໃຫ້ອາເມລິກາໄດ້ຜົນປະໂຫຍດຫລາຍຂຶ້ນ.
