ປະຊາຊົນ 83 ຄອບຄົວໄດ້ຮັບເຮືອນຫລັງໃໝ່ຈາກໂຄງການເຂື່ອນໄຟຟ້ານໍ້າງຽບ 1
ແຫລ່ງຂ່າວ ຂປລ ລາຍງານວ່າ: ໃນອາທິດຜ່ານມານີ້, ເຂື່ອນໄຟຟ້ານໍ້າງຽບ 1 ໄດ້ຈັດພິທີມອບ-ຮັບເຮືອນ ແລະ ໃບຢັ້ງຢືນສິດການນຳໃຊ້ໃຫ້ແກ່ປະຊາຊົນເມືອງຮົ່ມແຂວງໄຊສົມບູນ ທີ່ຍົກຍ້າຍເຂົ້າມາບ້ານຈັດສັນພູໂຮມໄຊເມືອງບໍລິຄັນ ແຂວງບໍລິຄໍາໄຊ ເພື່ອຮອງຮັບປະຊາຊົນທີ່ຖືກຜົນກະທົບຈາກໂຄງການດັ່ງກ່າວຈໍານວນ 83 ຄອບຄົວ, ຊຶ່ງພິທີມອບ-ຮັບໄດ້ມີຂຶ້ນລະຫວ່າງທ່ານ ສີຄໍາ ໄຊຍະວົງ ປະທານກວດກາພັກ-ລັດ, ຮອງຫົວໜ້າກອງເລຂາຄຸ້ມຄອງການຍົກຍ້າຍຈັດສັນແຂວງບໍລິຄໍາໄຊ ແລະ ແຂວງໄຊສົມບູນ ແລະ ຄະນະບໍລິຫານອາວຸໂສຂອງບໍລິສັດໄຟຟ້ານໍ້າງຽບ 1.
ປັດຈຸບັນ, ມີ 83 ຄົວເຮືອນໄດ້ຍ້າຍເຂົ້າມາອາໄສໃນບ້ານຈັດສັນ, ຊຶ່ງບ້ານດັ່ງກ່າວປະກອບມີສິ່ງອຳນວຍຄວາມສະດວກຕ່າງໆ ເຊັ່ນ: ນໍ້າປະປາ, ໄຟຟ້າ, ສຸກສາລາ, ໂຮງຮຽນອະນຸບານ, ໂຮງຮຽນປະຖົມສົມບູນ ແລະ ໂຮງຮຽນມັດທະຍົມຕອນຕົ້ນ, ພ້ອມດ້ວຍທີ່ພັກຂອງຄູອາຈານ ຕະຫລາດພື້ນທີ່ກະສິກຳ, ພ້ອມດ້ວຍຊົນລະປະທານ ແລະ ຖະໜົນຫົນທາງທີ່ສາມາດນຳໃຊ້ໄດ້ຕະຫລອດປີ, ມີປະຊາຊົນທັງໝົດ 479 ຄອບຄົວທີ່ເມືອງຮົ່ມໄດ້ຮັບຜົນກະທົບຈາກໂຄງການ, ໃນນັ້ນ 51 ຄົວເຮືອນໄດ້ເລືອກຍົກຍ້າຍເຂົ້າມາອາໄສທີ່ບ້ານພູໂຮມໄຊ, ສ່ວນຈຳນວນທີ່ເຫລືອສະໝັກໃຈຍ້າຍໄປເຂດອື່ນ, ພາຍຫລັງທີ່ໄດ້ຮັບການຊົດເຊີຍຈາກໂຄງການ.
ການກໍ່ສ້າງເຮືອນສຳລັບ 59 ຄົວເຮືອນ (ບາງຄອບຄົວແມ່ນຄອບຄົວໃຫຍ່ ສະນັ້ນເຂົ້າເຈົ້າຈະໄດ້ເຮືອນສອງຫລັງ ອີງຕາມນະໂຍບາຍການຊົດເຊີຍ) ໄດ້ເລີ່ມຕົ້ນຂຶ້ນໃນທ້າຍປີ 2016 ແລະ ຜ່ານມາໄດ້ມອບໄປແລ້ວ 47 ຫລັງ.
