ຜູ້ນຳກົວເຕມາລາຈະຍ້າຍສະຖານທູດ ໄປເຢລູຊາເລມພຶດສະພານີ້
ປະທານາທິບໍດີກົວເຕມາລາປະກາດວ່າຈະຍ້າຍສະຖານທູດກົວເຕມາລາໃນອິດສະລາແອນໄປນະຄອນເຢລູຊາເລມໃນເດືອນພຶດສະພານີ້ ຫລັງຈາກສອງວັນກ່ອນ ອາເມລິກາປະກາດວັນຍ້າຍສະຖານທູດອາເມລິກາເຊັ່ນກັນ.
ປະທານາທິບໍດີ ຈິມມີ ມໍຣາເລສ ຂອງກົວເຕມາລາ ກ່າວໃນກອງປະຊຸມປະຈຳປີຄະນະກຳມະການກິດຈະການພົວພັນ ອິດສະລາແອນ-ອາເມລິກາ ວ່າ: ກົວເຕມາລາຂໍຮັບຮອງເຢລູຊາເລມເປັນເມືອງຫລວງຂອງອິດສະລາແອນ ແລະ ຈະຍ້າຍສະຖານທູດໄປເຢລູຊາເລມເປັນການຖາວອນ ເຊິ່ງຕ້ອງຂໍຂອບໃຈປະທານາທິບໍດີ ໂດນັນ ທຣຳ ຜູ້ນຳອາເມລິກາ ທີ່ປູທາງໃນເລື່ອງນີ້. ຄຳປະກາດຮັບຮອງເຢລູຊາເລມຂອງປະທານາທິບໍດີ ທຣຳ ແລະ ຄຳສັ່ງຍ້າຍສະຖານທູດອາເມລິກາຈາກນະຄອນຫລວງເທລອາວີຟໄປເຢລູຊາເລມກາຍເປັນບັນຫາທີ່ຮຽກສຽງວິຈານຢ່າງກວ້າງຂວາງ. ນັກວິເຄາະເບິ່ງວ່າທຳລາຍຄວາມຫວັງໃນການເຈລະຈາສັນຕິພາບຕາເວັນອອກກາງ.
