ຄູຝຶກຫລວງພະບາງຂອບໃຈ ກອງເຊຍຫລັງຊະນະກອງທັບ 2-0
ສະໂມສອນຫລວງພະບາງ ຢູໄນເຕັດ ລົງສະໜາມຄັ້ງທີ 2 ສາມາດເອົາຊະນະສະໂມສອນ ກອງທັບ ເອັຟຊີ 2-0 ໃນວັນທີ 3 ມີນາ 2018 ທີ່ສະໜາມກິລາແຫ່ງຊາດຫລັກ 16 ໃນການແຂ່ງຂັນເຕະບານເປບຊີ ລາວພຣີເມຍລີກ 2018 ຂະນະທີ່ຄູຝຶກຂອບໃຈກອງເຊຍທີ່ໃຫ້ກໍາລັງຈັງຫລັງຈາກຈົບເກມການແຂ່ງຂັນດັ່ງກ່າວ.
ທ່ານ ວາລະສິນ ດາລາພອນ ຄູຝຶກສະໂມສອນ ຫລວງພະບາງ ຢູໄນເຕັດ ໃຫ້ສໍາພາດຫລັງຈາກຊະນະສະໂມສອນ ກອງທັບ ເອັຟຊີ ວ່າ: ການລົງສະໜາມແຂ່ງຂັນຄັ້ງນີ້ ຖືວ່າເປັນຄັ້ງທີ່ສ້າງຄວາມປະທັບໃຈໃຫ້ແກ່ຄະນະຄູຝຶກຂອງພວກເຮົາ ໂດຍສະເພາະຫລັງເກມຊະນະກອງທັບ ເອັຟຊີ ໃນທ້າຍອາທິດຜ່ານມາ. ດັ່ງນັ້ນ, ຕົນເອງໃນນາມຄະນະຄູຝຶກຂອງສະໂມສອນຫລວງພະບາງຂໍຂອບໃຈກອງເຊຍຂອງພວກເຮົາທີ່ມາໃຫ້ກໍາລັງໃຈແກ່ນັກກິລາຂອງພວກເຮົາໃນລະຫວ່າງການແຂ່ງຂັນທັງ 2 ຄັ້ງ ເຊິ່ງໄດ້ສ້າງກໍາລັງແຮງໃຫ້ແກ່ນັກກິລາຂອງພວກເຮົາມີແຮງສູ້ຕໍ່ໄປ ແລະ ຫວັງວ່າໃນການແຂ່ງຂັນຄັ້ງຕໍ່ໄປຂອງພວກເຮົາຈະລົງສະໜາມພົບກັບ ສະໂມສອນ ປກສ ເອັຟຊີ ໃນວັນທີ 11 ມີນາ ເວລາ 16:00 ໂມງທີ່ເມືອງຫລວງພະບາງ ແຂວງຫລວງພະບາງ ກອງເຊຍຂອງພວກເຮົາຈະເຂົ້າຮ່ວມເປັນກໍາລັງໃຈໃຫ້ແກ່ພວກເຮົາເພື່ອຍາດໃຫ້ໄດ້ອັນດັບທີ່ດີຂອງການແຂ່ງຂັນເປບຊີ ລາວພຣີເມຍລີກ 2018 ນີ້.
ສະໂມສອນຫລວງພະບາງ ຢູໄນເຕັດ ຈັດຢູ່ອັນດັບທີ 3 ພາຍຫລັງລົງສະໜາມ 2 ຄັ້ງມີ 4 ຄະແນນ, ຊະນະ 1 ຄັ້ງ, ສະເໝີ 1 ຄັ້ງ. ຂະນະທີ່ສະໂມສອນ ລາວໂຕໂຢຕ້າ ເອັຟຊີ ຈັດຢູ່ອັນດັບທີ 1 ຫລັງຈາກລົງສະໜາມ 2 ຄັ້ງ, ຊະນະ 2 ຄັ້ງ, ມີ 6 ຄະແນນ. ອັນດັບທີ 2 ສະໂມສອນຊ້າງນ້ອຍ ເອັຟຊີ ລົງສະໜາມ 2 ຄັ້ງ, ຊະນະ 2 ຄັ້ງ, ມີຢູ່ 6 ຄະແນນ ມີຄະແນນເທົ່າກັບສະໂມສອນລາວໂຕໂຢຕ້າ ເອັຟຊີ ແຕ່ປະຕູໄດ້ໜ້ອຍກວ່າຈຶ່ງຖືກຈັດຢູ່ອັນດັບດັ່ງກ່າວ.
ສໍາລັບຕາຕະລາງການແຂ່ງຂັນວັນທີ 10 ມີນາ 2018 ມີ 2 ຄູ່ຄື ສະໂມສອນລາວໂຕໂຢຕ້າ ເອັຟຊີ ພົບກັບ ສະໂມສອນດີເຄ ເອັຟຊີ ເວລາ 15:00 ໂມງ ທີ່ສະໜາມກິລາແຫ່ງຊາດລາວ ຫລັກ 16, ສ່ວນສະໂມສອນຊ້າງນ້ອຍ ເອັຟຊີ ພົບກັບ ສະໂມສອນ ກອງທັບ ເອັຟຊີ ເວລາ 17:00 ໂມງທີ່ສະໜາມກິລາແຫ່ງຊາດລາວ ຫລັກ 16.
