ລາວເປັນອັນດັບສາມຂອງໂລກທີ່ອັດຕາການຕາຍຂອງແມ່ ແລະ ເດັກຫລຸດລົງຢ່າງວ່ອງໄວ
ໃນກອງປະຊຸມທົບທວນວຽກງານແມ່ ແລະ ເດັກທົ່ວປະເທດ ສຳລັບການປະຕິບັດຍຸດທະສາດແຫ່ງຊາດ, ການບໍລິການສຸຂະພາບຈະເລີນພັນ, ແມ່ ແລະ ເດັກ (RMNCH) ປະຈຳປີ 2017 ທີ່ໄດ້ຈັດຂຶ້ນໃນວັນທີ 27 ກຸມພາຜ່ານມານີ້ ທີ່ນະຄອນຫລວງວຽງຈັນ ໂດຍການເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ເຊິ່ງມີບັນດາກົມ, ໂຮງໝໍ ແລະ ພະແນກສາທາລະນະສຸກແຂວງຕ່າງໆເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຍົກໃຫ້ເຫັນວ່າ: ຍ້ອນຫຍັງ ສປປ ລາວເຮົາ ຈຶ່ງໄດ້ຈັດເປັນອັນດັບທີ່ດີ (ລະດັບ 3) ຂອງໂລກໃນການເຮັດໃຫ້ອັດຕາການຕາຍຂອງແມ່ ແລະ ເດັກຫລຸດລົງຢ່າງໄວວາ. ທັງນີ້ກໍຍ້ອນພວກເຮົາໄດ້ເອົາໃຈໃສ່ຈັດຕັ້ງປະຕິບັດຍຸດທະສາດແຫ່ງຊາດດັ່ງກ່າວທີ່ໄດ້ກວມເອົາດ້ານສຸຂະພາບຂອງແມ່ ແລະ ເດັກໄດ້ຢ່າງກວ້າງຂວາງເຊັ່ນ: ການວາງແຜນຄອບຄົວ, ສຸຂະພາບຂອງໄວໜຸ່ມ, ການເກີດລູກທີ່ປອດໄພ, ການດູແລສຸກເສີນເວລາເກີດ ແລະ ທັງເດັກເກີດໃໝ່, ການສັກຢາກັນພະຍາດ, ການປິ່ນປົວເດັກ ແລະ ບັນຫາໂພຊະນາການຕ່າງໆ ເຊິ່ງສິ່ງນີ້ໄດ້ຊ່ວຍໃຫ້ປະເທດເຮົາສາມາດຢັບຢັ້ງອັດຕາການຕາຍຂອງແມ່ ແລະ ເດັກໄດ້ຫລຸດຜ່ອນລົງຢ່າງໄວວາ.
ແຕ່ເຖິງຢ່າງໃດ, ທ່ານລັດຖະມົນຕີ ບຸນກອງ ສີຫາວົງ ກໍໄດ້ເນັ້ນຕື່ມວ່າ: ເພື່ອບັນລຸເປົ້າໝາຍການພັດທະນາແບບຍືນຍົງໃນຂະແໜງສາທາລະນະສຸກ, ພວກເຮົາຈະຕ້ອງໄດ້ເອົາໃຈໃສ່ການປະຕິຮູບຄຸນນະພາບການບໍລິການຂອງສາທາລະນະສຸກເຮົາໃຫ້ແຂງແຮງກວ່າເກົ່າຕາມ 10 ຕົວຊີ້ວັດບູລິມະສິດສູງສຸດຂອງຂະແໜງສາທາລະນະສຸກ.
