ແຜນງານຄຸ້ມຄອງປ່າໄມ້ແບບຍືນນານຢູ່ລາວມີຫລາຍວຽກຄືບໜ້າ
ຫົວໜ້າກົມປ່າໄມ້ ກະຊວງກະສິກໍາ ແລະ ປ່າໄມ້, ໄດ້ມີຄໍາເຫັນກ່າວເປີດກອງປະຊຸມຄະນະກໍາມະການປະສານງານຮ່ວມຄັ້ງທີ 4 ຂອງໂຄງການສະໜັບສະໜູນການຄຸ້ມຄອງປ່າໄມ້ແບບຍືນນານ ແລະ REDD+ ທີ່ຈັດຂຶ້ນໃນວັນທີ 27 ກຸມພານີ້ວ່າ: ພາຍຫລັງໄດ້ຮັບການສະໜັບສະໜູນຈາກໂຄງການ F-REDD, ໂດຍສະເພາະນັບແຕ່ກອງປະຊຸມຄະນະກໍາມະການປະສານງານຮ່ວມຄັ້ງທີ 3 ເມື່ອທ້າຍປີ 2017 ຜ່ານມາເຫັນວ່າມີຫລາຍໜ້າວຽກມີຄວາມຄືບໜ້າດີ ເປັນຕົ້ນແມ່ນສໍາເລັດການປັບປຸງໂຄງຮ່າງການຈັດຕັ້ງຂອງກົມປ່າໄມ້ ແລະ ສຳເລັດການແຕ່ງຕັ້ງ ແລະ ສັບຊ້ອນພະນັກງານໃນແຕ່ລະພະແນກ. ນອກນີ້, ວຽກງານຕ່າງໆທີ່ກ່ຽວຂ້ອງກັບຂະແໜງປ່າໄມ້ກໍພວມຢູ່ໃນຂັ້ນຕອນທົບທວນຄືນດ້ານກົດໝາຍ, ຍຸດທະສາດ REDD+ ແຫ່ງຊາດ ກໍໃກ້ຈະສຳເລັດດ້ວຍດີ, ພ້ອມທັງສໍາເລັດການສົ່ງບົດລາຍງານລະດັບທຽບຖານການປ່ອຍທາດອາຍພິດ (REL) ແຫ່ງຊາດໃຫ້ແກ່ອົງການ UNFCCC ແລະຮ່າງສະບັບທຳອິດຂອງເອກະສານໂຄງການຫລຸດຜ່ອນການປ່ອຍທາດອາຍພິດ (ERPD) ໃຫ້ແກ່ກອງທຶນກາກບອນ (Carbon Fund) ທີ່ຢູ່ພາຍໃຕ້ໂຄງການຄູ່ຮ່ວມກາກບອນປ່າໄມ້ (Forest Carbon Partnership Facility) ໃນຕົ້ນປີນີ້, ສ່ວນແຜນດຳເນີນງານ REDD+ ຢູ່ແຂວງຫລວງພະບາງກໍໄດ້ຮັບການຮັບຮອງແລ້ວໃນຕົ້ນປີນີ້, ເຊິ່ງຖືເປັນແຜນດຳເນີນງານ REDD+ ຂັ້ນແຂວງສະບັບທຳອິດຂອງ ສປປ ລາວ.
ທ່ານຫົວໜ້າກົມດັ່ງກ່າວ ໃຫ້ຮູ້ວ່າ: ໃນຕໍ່ໜ້ານີ້, ໂຄງການ F-REDD ແມ່ນຈະໃຫ້ການສະໜັບສະໜູນໃນຫລາຍໆດ້ານເຊັ່ນ: ການທົບທວນຄືນກົດໝາຍປ່າໄມ້ ແລະ ຍຸດທະສາດປ່າໄມ້ຕ້ອງໃຫ້ສໍາເລັດທັນຕາມກຳນົດເວລາວາງໄວ້ໃນປີນອກນີ້, ອົງການ UNFCCC ແລະ ກອງທຶນກາກບອນ ຈະໄດ້ປະເມີນບົດລາຍງານ REL ແຫ່ງຊາດທີ່ ສປປ ລາວ ໄດ້ສົ່ງໃຫ້ເພື່ອເປັນຂໍ້ມູນພື້ນຖານໃນການວັດແທກ, ການລາຍງານ ແລະ ການພິສູດຢັ້ງຢືນ (MRV) ແລະ ການສະໜອງງົບປະມານຕາມຜົນໄດ້ຮັບໃນຕໍ່ໜ້າ, ໂດຍສະເພາະ 6 ແຂວງພາກເໜືອ ທີ່ຢູ່ພາຍໃຕ້ໂຄງການຫລຸດຜ່ອນການປ່ອຍທາດອາຍພິດ.
ຜູ້ຕາງໜ້າອາວຸໂສຫ້ອງການໄຈກາປະຈໍາລາວ ກ່າວວ່າ: ລັດຖະບານລາວມີເປົ້າໝາຍຟື້ນຟູປ່າໄມ້ໃຫ້ມີເນື້ອທີ່ປົກຫຸ້ມຫລາຍກວ່າ 70% ໃນທົ່ວປະເທດໃນປີ 2020 ຊຶ່ງລັດຖະບານໄດ້ພະຍາຍາມສ້າງ ແລະ ປັບປຸງລະບຽບກົດໝາຍ, ນິຕິກໍາຕ່າງໆທີ່ກ່ຽວຂ້ອງກັບປ່າໄມ້ ລວມທັງວຽກງານຫລຸດຜ່ອນທາດອາຍພິດຈາກການທໍາລາຍປ່າໄມ້ ຫລື ການເຮັດໃຫ້ປ່າໄມ້ເສື່ອມໂຊມ ເປັນມາດຕະການສໍາຄັນເພື່ອຄຸ້ມຄອງປ່າໄມ້ແບບຍືນນານ ແລະ ຮັບມືກັບການປ່ຽນແປງຂອງສະພາບດິນຟ້າອາກາດ ແລະ ຍັງເປັນແນວທາງສໍາຄັນໃນການປັບປຸງຊີວິດການເປັນຢູ່ຂອງປະຊາຊົນທີ່ເພິ່ງພາອາໄສຊັບພະຍາກອນປ່າໄມ້ ແລະ ເພື່ອຊ່ວຍເຫລືອ ສປປ ລາວ ບັນລຸເປົ້າໝາຍດັ່ງກ່າວ, ລັດຖະບານຍີປຸ່ນໄດ້ໃຫ້ການສະໜັບສະໜູນຂະແໜງການປ່າໄມ້ໃນຫລາຍຮູບແບບ ນັບແຕ່ສູນກາງຮອດທ້ອງຖິ່ນ, ໂດຍຜ່ານການຮ່ວມມືດ້ານວິຊາການ ແລະ ທຶນຮອນຕ່າງໆ ເປັນຕົ້ນ: ການສ້າງລະບົບຂໍ້ມູນປ່າໄມ້ແຫ່ງຊາດ, ການກະກຽມດ້ານວຽກງານ REDD+ ລວມທັງສົ່ງເສີມການປັບປຸງຊີວິດການເປັນຢູ່ຂອງປະຊາຊົນທ້ອງຖິ່ນໃຫ້ນັບມື້ດີຂຶ້ນ.
