ສະຫວັນນະເຂດ-ມຸກດາຫານ ຈັດຄາຣາວານ ລົດຖີບມິດຕະພາບສົ່ງເສີມການທ່ອງທ່ຽວ

ແຂວງສະຫວັນນະເຂດ ແລະ ຈັງຫວັດມຸກດາຫານ ຈັດຄາຣາວານລົດຖີບມິດຕະພາບ ລາວ-ໄທ ໃນວັນທີ 25 ກຸມພາ 2018 ເພື່ອສົ່ງເສີມການທ່ອງທ່ຽວພາຍໃນແຂວງສະຫວັນນະເຂດ ແລະ ປີທ່ອງທ່ຽວລາວ 2018 ໃຫ້ເປັນທີ່ຮູ້ຈັກຢ່າງກວ້າງຂວາງ ເຊິ່ງມີນັກຖີບລົດເຂົ້າຮ່ວມ 500 ກວ່າຄັນ, ໃນນີ້ຈາກຣາຊະອານາຈັກໄທ 300 ຄັນ. ເຂົ້າຮ່ວມໃນພິທີຄັ້ງນີ້ມີທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ໄພທູນ ຣັກປະເທດ ຜູ້ວ່າຣາຊະການຈັງຫວັດມຸກດາຫານ ແລະ ພາກສ່ວນກ່ຽວຂ້ອງເຂົ້າຮ່ວມ.

ຂະບວນຄາຣາວານລົດຖີບມິດຕະພາບຄັ້ງນີ້ ແມ່ນເລີ່ມປ່ອຍຈາກຈຸດປ່ອຍບໍລິເວນຂົວມິດຕະພາບ ລາວ-ໄທ ຕາມເສັ້ນທາງມາວົງວຽນໄດໂນເສົາເຊື່ອມໃສ່ເສັ້ນທາງອາໜຶ່ງແລ້ວລ້ຽວໄປທາງພໍ່ກະດວດ ແລ້ວ ລ້ຽວຊ້າຍຢູ່ວົງວຽນໂຮງໝໍແຂວງໄປຕາມທາງຮອດລັດວິສາຫະກິດໄຟຟ້າ ແລ້ວລ້ຽວຂວາຕາມເສັ້ນທາງທ່າແຮ່ແຄມຂອງມາໃສ່ສວນສຸຂະພາບທ່ານ ໜູຮັກ ພູມສະຫວັນ ຕາມເສັ້ນທາງສະຫວັນນະເຂດ-ເຊໂນ ຮອດຫລັກກິໂລແມັດທີ 12 ໄປຫາສະຖານທີ່ທ່ອງທ່ຽວບໍລິເວນທາດອີງຮັງ ເຊິ່ງເປັນຈຸດໝາຍຂອງຄາລາວານ.

ໃນໂອກາດເດີນທາງມາຮອດບໍລິເວນບ້ານທາດອີງຮັງ ຂະບວນດັ່ງກ່າວໄດ້ຮັບການຕ້ອນຮັບຈາກທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ຮ່ວມກັບອຳນາດການປົກຄອງທ້ອງຖິ່ນບ້ານທາດອີງຮັງ ເມືອງໄກສອນ ພົມວິຫານ ທີ່ຕ້ອນຮັບດ້ວຍການສະແດງສິລະປະວັນນະຄະດີ ທີ່ສ້າງຄວາມສົນໃຈໃຫ້ແກ່ນັກທ່ອງທ່ຽວເປັນຈຳນວນຫລວງຫລາຍ.