ກະຊວງ ປທສ ກຽມຮ່າງກົດໝາຍ 2 ສະບັບຜ່ານກອງປະຊຸມສະພາສະໄໝສາມັນເທື່ອທີ 3
ເພື່ອຮັບປະກັນໃຫ້ເນື້ອໃນກົດໝາຍວ່າດ້ວຍການປົກປ້ອງຂໍ້ມູນເອເລັກໂຕຣນິກ ແລະ ຮ່າງກົດໝາຍວ່າ ດ້ວຍຄື້ນຄວາມຖີ່ວິທະຍຸສື່ສານ ທີ່ຈະນໍາເຂົ້າພິຈາລະນາໃນກອງປະຊຸມສະໄໜສາມັນເທື່ອທີ 3 ຂອງສະພາແຫ່ງ ຊາດຊຸດທີ 8 ໃຫ້ມີເນື້ອໃນຄົບຖ້ວນ, ຮັດກຸມ ສາມາດຈັດຕັ້ງປະຕິບັດໄດ້ ແລະ ສອດຄ່ອງກັບສະພາບການຂະ ຫຍາຍຕົວທາງດ້ານເສດຖະກິດ-ສັງຄົມຂອງປະເທດເຮົາໃນໄລຍະໃໝ່. ດັ່ງນັ້ນ ເມື່ອບໍ່ດົນມານີ້ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບສະພາແຫ່ງຊາດ ຈຶ່ງໄດ້ຈັດກອງປະຊຸມກວດກາເນື້ອໃນ ຮອບດ້ານຕໍ່ຮ່າງກົດໜາຍສອງສະບັບດັ່ງກ່າວ ທີ່ແຂວງວຽງຈັນ, ໂດຍ ການເປັນປະທານຂອງທ່ານ ທອງໃສ ຊານໄຊຍະ ຮອງລັດຖະມົນຕີກະຊວງ ປທສ ແລະ ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາແຫ່ງຊາດ ພ້ອມສະມາຊິກສະພາແຫ່ງຊາດ (ສສຊ) ຈາກເຂດເລືອກຕັ້ງຕ່າງໆໃນທົ່ວປະເທດເຂົ້າຮ່ວມຢ່າງພ້ອມພຽງ. ກອງປະຊຸມຄັ້ງນີ້ໄດ້ສະເໜີບົດຄວາມເຂົ້າໃຈພື້ນຖານ ແລະ ວີດີໂອກ່ຽວກັບຄື້ນຄວາມຖີ່ໃຫ້ບັນດາ ສສຊ ເພື່ອສ້າງຄວາມເຂົ້າໃຈ ແລະ ເປັນຂໍ້ມູນໃນການປະກອບຄໍາຄິດ ເຫັນໃສ່ຮ່າງກົດໜາຍດັ່ງກ່າວ ເພື່ອໃຫ້ຄະນະຮັບຜິດຊອບນໍາໄປປັບປຸງເນຶ້ອໃນຂອງຮ່າງກົດໜາຍໃຫ້ມີເນື້ອໃນ ຮັດກຸມຈະແຈ້ງ ແລະ ຄົບຖ້ວນສົມບູນ.
