ຣັກບີ້ຍິງລາວໄດ້ແຊັມຣັກບີ້ ບາງກອກ 2018
ທີມສະໂມສອນຣັກບີ້ຍິງ ວຽງຈັນສິງ (ສາວວຽງຈັນສິງ) ຕົວແທນຈາກ ສປປ ລາວ ເກັບໄຊຊະນະ 6 ນັດລວດ ປ້ອງກັນແຊັມສະໄໝທີ 2 ໄດ້ສຳເລັດ ກັບການແຂ່ງຂັນຣັກບີ້ຍິງ ລາຍການ ບາງກ໋ອກ 10 ຄົນ “BANGKOK INTERNATIONAL RUGBY TENS” ປີ 2018 ທີ່ນະຄອນຫລວງບາງກ໋ອກ ປະເທດໄທ ເປັນເຈົ້າພາບ ໃນອາທິດຜ່ານມາ.
ໃນວັນທີ 25 ກຸມພາ ຜ່ານມາ ທີ່ສະໜາມກິລາໂຮງຮຽນບາງກ໋ອກພັດທະນາ ນະຄອນຫລວງບາງກ໋ອກ ປະເທດໄທ ໄດ້ມີການແຂ່ງຂັນຣັກບີ້ຍິງ ລາຍການ ບາງກ໋ອກ 10 ຄົນ ຮອບຊີງຊະນະເລີດຂຶ້ນ. ໂດຍເປັນການລົງສະໜາມພົບກັນລະຫວ່າງແຊັມເກົ່າຈາກ ສປປ ລາວ ຢ່າງ ທີມສະໂມສອນຣັກບີ້ຍິງ ວຽງຈັນສິງ ທີມນຳຕາຕະລາງ ທີ່ລົງສະໜາມ 5 ນັດ ຍັງບໍ່ເສຍທີມໃດ ພົບກັບ ສະໂມສອນຣັກບີ້ຍິງ ແບນເກີ ເບລເລສ ຕົວແທນຈາກປະເທດໄທ ທີມອັນດັບ 2 ຂອງຕາຕະລາງ ທີ່ລົງສະໜາມ 5 ນັດ ເສຍພຽງ 1 ນັດ. ຜ່ານການແຂ່ງຂັນ ຜົນປາກົດວ່າ ແຊ໋ມເກົ່າຈາກ ສປປ ລາວ ຍັງໂຊຟອມໄດ້ເໜືອນກວ່າ ແລະ ຫລິ້ນໄດ້ຢ່າງເໜືອນຊັ້ນ ເຮັດໃຫ້ເປັນຝ່າຍເອົາຊະນະໄປແບບຂາດຮອຍ 19-0 ຄະແນນ ເກັບເພິ່ມເປັນ 10 ຄະແນນ ຈາກການລົງສະໜາມ 6 ນັດ ຊະນະລວດ ແລະ ເຮັດໃຫ້ປ້ອງກັນແຊັມໄດ້ເປັນປີທີ 2 ຕໍ່ຈາກປີ 2017 ຜ່ານມາ. ຂະນະທີ່ ອັນດັບ 3 ແມ່ນຕົກເປັນຂອງ ສະໂມສອນ ເຊົາເທິນເນີສ ມີ 6 ຄະແນນ, ອັນດັບ 4 ສະໂມສອນ ເຄແອວ ໄທເກີ ມີ 4 ຄະແນນ, ອັນດັບ 5 ສະໂມສອນ ໄຊງ່ອນ ເກຊກອສ ມີ 2 ຄະແນນ ແລະ ອັນດັບ 6 ສະໂມສອນ ບີໄອທີ ບາບາຣຽນ ບໍ່ມີຈັກຄະແນນ.
ສຳລັບ ການແຂ່ງຂັນດັ່ງກ່າວ ແມ່ນເລີ່ມຂຶ້ນເປັນເວລາ 2 ວັນ ລະຫວ່າງວັນທີ 24-25 ກຸມພາ 2018 ໂດຍມີທີມເຂົ້າຮ່ວມທັງໝົດ 6 ທີມ. ສ່ວນຜົນງານຜ່ານມາໃນຮອບແບ່ງກຸ່ມຂອງທີມສະໂມສອນຍິງວຽງຈັນສິງ ໃນລາຍການນີ້ ປະກອບມີ ໃນວັນທີ 24 ກຸມພາ 2018 ນັດທີ1 ວຽງຈັນສິງ ຊະນະ ສະໂມສອນ ບີໄອທີ ບາບາຣຽນ 29-0 ຄະແນນ, ນັດທີ2 ທີມວຽງຈັນສິງ ຊະນະ ສະໂມສອນ ໄຊງ່ອນ ເກຊກອສ 39-0 ຄະແນນ, ນັດທີ3 ທີມວຽງຈັນສິງ ຊະນະ ສະໂມສອນ ເຊົາເທິນເນີສ 14-5 ຄະແນນ, ນັດທີ4 ທີມວຽງຈັນສິງ ຊະນະ ສະໂມສອນ ແບນເກີ ເບລເລສ 19-0 ຄະແນນ ແລະ ໃນວັນທີ 25 ກຸມພາ 2018 ນັດສຸດທ້າຍຮອບແບ່ງກຸ່ມ ທີມວຽງຈັນສິງ ຊະນະ ສະໂມສອນ ເຄແອວ ໄທເກີ 19-0 ຄະແນນ.
