ມສ ນາຊາຍທອງ ຊະນະ ມຕ ບໍ່ໂອ ປ້ອງກັນ ແຊ້ມບານເຕະ ໂຄປາ ໂຄຄາ-ໂຄລາ 2018
ມສ ນາຊາຍທອງ ແຊ້ມເກົ່າ ສ້າງຜົນງານໂດດເດັ່ນຊະນະ ມຕ ບໍ່ໂອ 12-1 ປ້ອງກັນແຊ້ມບານເຕະນັກຮຽນສາມັນລາຍການ ໂຄປາ ໂຄຄາ-ໂຄລາ ຮຸ່ນອາຍຸບໍ່ເກີນ 16 ປີ ປະຈໍາປີ 2018 ໃນທ້າຍອາທິດຜ່ານມາ, ສ່ວນແຊ້ມປະເພດທີມຍິງຕົກເປັນຂອງ ມສ ສີຖານໃຕ້ ພາຍຫລັງໄດ້ຄັດເລືອກຂັ້ນເມືອງຈາກ 100 ກວ່າທີມ ໄດ້ທີມຕົວແທນ 9 ທີມຊາຍ ແລະ 9 ທີມຍິງ ຈາກ 9 ຕົວເມືອງທົ່ວນະຄອນຫລວງວຽງຈັນ ຜ່ານເຂົ້າຮອບສຸດທ້າຍຂັ້ນນະຄອນຫລວງ.
ການແຂ່ງຂັນທີມຊາຍໃນຮອບຊີງອັນດັບທີ 3 ລະຫວ່າງ ມສ ນາຊາຍທອງ ແຊ້ມເກົ່າ ຕົວແທນຈາກເມືອງນາຊາຍທອງ ເອົາຊະນະ ມສ ປາກຕອນ 17-0 ປະຕູ, ສົ່ງຜົນໃຫ້ ມສ ນາຊາຍທອງ ຜ່ານເຂົ້າຮອບຮອງຊະນະເລີດເຂົ້າຊີງກັບ ມສ ບໍ່ໂອ ຕົວແທນຈາກເມືອງຫາດຊາຍຟອງ ທີ່ດວນຈຸດໂທດເອົາຊະນະ ມສ ໄຊເສດຖາ 4-2 ປະຕູ (ສະເໝີກັນ 1-1) ປາກົດວ່າ ມສ ນາຊາຍທອງ ຍັງໂດດເດັ່ນເຊັ່ນເຄີຍ ເຄິ່ງເວລາທໍາອິດນໍາ 6-0.
ສ່ວນເຄິ່ງເວລາທີ 2 ຍິງເພີ່ມອີກ 6 ປະຕູເອົາຊະນະ ມຕ ບໍ່ໂອ 12-1 ໂດຍໄດ້ປະຕູຈາກ ທ້າວ ໂຈນີ ແຫວນປະເສີດ 5 ປະຕູ ສ່ວນປະຕູທີ່ເຫລືອໄດ້ຈາກທ້າວ ພອນປະເສີດ, ທ້າວ ໄຊຊະນະ ແລະ ທ້າວ ອະນັນຕະຊາ ຜູ້ລະ 2 ປະຕູ ແລະ ອີກ 1 ປະຕູໄດ້ຈາກທ້າວ ເລັກໂຕຊາ. ຂະນະທີ່ ມຕ ບໍ່ໂອ ໄດ້ປະຕູຈາກການເຮັດເຂົ້າປະຕູຕົວເອງຂອງກອງຫຼັງຄູ່ແຂ່ງ ສົ່ງຜົນໃຫ້ ມສ ນາຊາຍທອງ ປ້ອງກັນແຊ້ມໄວ້ໄດ້, ສ່ວນອັນດັບ 3 ເປັນຂອງ ມສ ໄຊເສດຖາ ເອົາຊະນະ ມສ ປາກຕອນ 7-0.
ຂະນະທີ່ ຊະນະເລີດປະເພດທີມຍິງຕົກເປັນຂອງ ມສ ສີຖານໃຕ້ ຕົວແທນເມືອງຫາດຊາຍຟອງ ເອົາຊະນະ ມສ ໂພນທັນ ຕົວແທນເມືອງໄຊເສດຖາ 2-1 ຍາດແຊ້ມໄປຄອງ, ສ່ວນອັນດັບ 3 ເປັນຂອງ ມສ ໂຄກສີວິໄລ ຕົວແທນເມືອງໄຊທານີ ເອົາຊະນະ ມຕ ຈອມເພັດ ຕົວແທນເມືອງສີສັດຕະນາກ 2-1ປະຕູ.
