ປກສ ເມືອງນາແລທຳລາຍສວນຝິ່ນເນື້ອທີ່ 1,5 ເຮັກຕາ
ເມື່ອບໍ່ດົນມານີ້, ກອງບັນຊາການ ປກສ ເມືອງນາແລແຂວງຫລວງນ້ຳທາ ໄດ້ລົງສົມທົບກັບອຳນາດການປົກຄອງເມືອງນໍາກໍາລັງຈໍານວນຫລາຍລົງທຳ ລາຍສວນຝິ່ນຂອງປະຊາຊົນທີ່ລັກລອບປູກຢູ່ເຂດບ້ານຕະເຄິງເມືອງນາແລລວມມີເນື້ອທີ່ທັງໝົດ 1,5 ເຮັກຕາ, ເຊິ່ງສວນຝິ່ນດັ່ງກ່າວແມ່ນຢູ່ໃນໄລຍະພວມອອກໝາກ, ພ້ອມທັງໄດ້ເອົາຕົວຜູ້ລັກລອບປູກຝິ່ນດັ່ງກ່າວມາສຶກສາອົບຮົມກ່າວເຕືອນເພື່ອໃຫ້ຮູ້ວ່າການລັກລອບປູກຝິ່ນນີ້ແມ່ນເປັນການກະທໍາທີ່ຜິດຕໍ່ລະບຽບກົດໝາຍ, ເຊິ່ງພັກ-ລັດຖະບານໄດ້ໃຫ້ຢຸດຕິການປູກຝິ່ນຢ່າງສີ້ນເຊິງໃນທົ່ວປະເທດມາດົນແລ້ວ ເພື່ອໃຫ້ປະຊາຊົນຫັນໄປປູກພຶດຊະນິດອື່ນເປັນສີນຄ້າສ້າງລາຍຮັບມາພັດທະນາຄອບຄົວໃຫ້ຫລຸດພົ້ນຈາກຄວາມທຸກຍາກ. ຈາກນັ້ນໄດ້ມອບປະຊາຊົນຜູ້ລັກລອບປຸກຝິ່ນໃຫ້ອຳນາດການປົກຄອງບ້ານນຳໄປສຶກສາອົບຮົມຕໍ່ ເພື່ອບໍ່ໃຫ້ເຂົາເຈົ້າກັບໄປປູກຝິ່ນຄືນອີກ.
ຂ່າວໃຫ້ຮູ້ອີກວ່າ: ເມື່ອບໍ່ດົນມານີ້, ເຈົ້າໜ້າທີ່ ປກສ ເມືອງໄຊທານີ ນະຄອນຫລວງວຽງຈັນ, ໄດ້ຈັບຕົວທ້າວ ຄອນສະຫວັນ ອາຍຸ 45 ປີຢູ່ບ້ານນາສ້ຽວເມືອງນາຊາຍທອງນະຄອນຫລວງວຽງຈັນ, ພ້ອມຂອງກາງຢາບ້າ 400 ເມັດຊຸກເຊື່ອງໄວ້ໃນຫ້ອງນອນ, ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ຢາເສບຕິດດັ່ງກ່າວແມ່ນຂອງຕົນແທ້, ໂດຍໄດ້ຊື້ມາຈາກຂະບວນການດຽວກັນເພື່ອໄວ້ຈໍາໜ່າຍໃຫ້ໄວລຸ້ນຊາວໜຸ່ມພາຍໃນບ້ານ ແລະ ເຂດໃກ້ຄຽງ ແລະ ຜ່ານມາຕົນເຄີຍຕ້ອງໂທດມາແລ້ວ 1 ຄັ້ງເປັນເວລາ 5 ປີໃນຄະດີຢາເສບຕິດເຊັ່ນກັນ.
