UN ພົບທາງຕັນຂໍ້ຕົກລົງ ຢຸດຍິງຢູ່ກູຕາຕາເວັນອອກ
ສະພາຄວາມໝັ້ນຄົງແຫ່ງສະຫະປະຊາຊາດ ຍັງບໍ່ສາມາດບັນລຸຂໍ້ຕົກລົງຢຸດຍິງໃນເຂດກູຕາຕາເວັນອອກເປັນເວລາ 30 ວັນໄດ້ ເນື່ອງຈາກຣັດເຊຍ ແລະ ອາເມລິກາ ຍັງຂັດແຍ່ງກັນຢ່າງໜັກ.
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ໃນວັນທີ 22 ກຸມພາວ່າ: ສະມາຊິກ UNSC ຍັງບໍ່ສາມາດລົງມະຕິໄດ້ຕາມກຳນົດໃນວັນທີ 22 ກຸມພາ ວ່າດ້ວຍຄຳສັ່ງໃຫ້ມີການຢຸດຍິງເປັນເວລາ 30 ວັນໃນເຂດກູຕາຕາເວັນອອກ ນອກນະຄອນຫວງດາມັດກັດ ຕາມການສະເໜີຂອງຊູແອດ ແລະ ກູເວດ, ເມື່ອທ່ານ ວາສຊິລີ ເນເບນເຊຍ ເອກອັກຄະລັດຖະທູດຣັດເຊຍປະຈຳສະຫະປະຊາຊາດ ກ່າວຕໍ່ກອງປະຊຸມໃນນາທີ່ສຸດທ້າຍວ່າ: ຂໍ້ສະເໜີດັ່ງກ່າວຍາກທີ່ຈະເປັນຄວາມຈິງ. ເຖິງຢ່າງໃດກໍຕາມ, ຣັດເຊຍ ສະເໜີຮ່າງແກ້ໄຂທີ່ມີສາລະສຳຄັນໃຫ້ຄູ່ກໍລະນີທຸກຝ່າຍຢຸດຄວາມຮຸນແຮງໂດຍໄວທີ່ສຸດ ແລະ ການຮ່ວມມືແບບບໍ່ມີເງື່ອນໄຂ ເພື່ອການຢຸດຕິຄວາມຮຸນແຮງ ຮ່ວມກັບການຢຸດສູ້ຮົບເພື່ອມະນຸດສະທຳເປັນເວລາ 30 ວັນ.
ທ່ານນາງ ເຄລລີ ຄູຣີ ອຸປະທູດອາເມລິກາປະຈຳ UN ປະນາມຣັດເຊຍວ່າ: ຍັງພະຍາຍາມເຮັດທຸກວິທີທາງເພື່ອບໍ່ໃຫ້ມີການຢຸດຍິງໃນເຂດກູຕາຕາເວັນອອກ, ແຕ່ທ່ານ ໂອລອຟ ສຄູກ ເອກອັກຄະລັດຖະທູດຊູແອດປະຈຳ UN ກ່າວວ່າ: ກອງປະຊຸມຈະຫາທາງອອກທີ່ເໝາະສົມສຳລັບທຸກຝ່າຍ. ທັງນີ້ ຖ້າຮ່າງມະຕິຂອງກູເວດ ແລະ ຊູແອດ ໄດ້ຮັບຄວາມເຫັນພ້ອມຈາກກອງປະຊຸມ UNSC ການຢຸດຍິງໃນເຂດກູຕາຕາເວັນອອກເປັນເວລາ 30 ວັນ ຈະເກີດຂຶ້ນພາຍໃນ 72 ຊົ່ວໂມງ ແລະ ການອົບພະຍົບຜູ້ໄດ້ຮັບບາດເຈັບ ແລະ ຜູ້ປ່ວຍຈະເກີດຂຶ້ນພາຍໃນ 48 ຊົ່ວໂມງ ຮ່ວມກັບການສົ່ງມອບການຊ່ວຍເຫລືອດ້ານມະນຸດສະທຳໃຫ້ແກ່ພົນລະເຮືອນປະມານ 5,6 ລ້ານຄົນ ໃນຊຸມຊົນ 1.244 ແຫ່ງທົ່ວຊີຣີ.
ໃນເວລາດຽວກັນ, ລາຍງານຂອງອົງການສັງເກດການດ້ານສິດທິມະນຸດຊີຣີ (SOHR) ລະບຸຈຳນວນຜູ້ເສຍຊີວິດຈາກການສູ້ຮົບໃນເຂດກູຕາຕາເວັນອອກເພີ່ມເປັນຢ່າງໜ້ອຍ 416 ຄົນແລ້ວ ນັບແຕ່ຄືນວັນທີ 18 ກຸມພາ, ສ່ວນຈຳນວນຜູ້ໄດ້ຮັບບາດເຈັບບໍ່ຕໍ່າກວ່າ 2.100 ຄົນ.
