ທາງການໄທຂະຫຍາຍເວລາໃຫ້ແຮງງານລາວ 46 ພັນກວ່າຄົນ ຕ້ອງຂື້ນທະບຽນໃຫ້ສຳເລັດກ່ອນ 31 ມີນານີ້
ບັນຫາແຮງງານລາວທີ່ໄປອອກແຮງງານໃນປະເທດໄທແບບບໍ່ຖືກຕ້ອງ, ພວມເປັນພາລະໜັກໜ່ວງໃຫ້ລັດຖະບານລາວຕ້ອງໄດ້ແກ້ໄຂ, ຂະນະທີ່ທາງການໄທໄດ້ຂະຫຍາຍເວລາໃຫ້ແຮງງານລາວ 46 ພັນກວ່າຄົນທີ່ຍັງບໍ່ທັນໄດ້ຂື້ນທະບຽນຮັບບັດສີບົວຕ້ອງໄປຂື້ນທະບຽນໃຫ້ສຳເລັດກ່ອນວັນທີ 31 ມີນາ. ຂະ
ນະຜູ້ທີ່ຖືບັດສີບົວກໍໃນສະພາບລໍາບາກເນື້ອງຈາກບັດໃກ້ໝົດອາຍຸທີ່ມີປະມານ 1,3 ແສນຄົນ, ລວມທັງຜູ້ຖືບັດຈັບຄູ່ນາຍຈ້າງ-ລູກຈ້າງ ຕ້ອງໄປຂຶ້ນທະບຽນ
ໃໝ່ບໍ່ໃຫ້ກາຍ 31 ມິຖຸນາ 2018. ຫລ້າສຸດເມື່ອວັນທີ 20 ກຸມພານີ້, ຂະແໜງການກ່ຽວຂ້ອງຂອງລາວກໍໄດ້ຈັດກອງປະຊຸມເລັ່ງດ່ວນເພື່ອປຶກສາຫາລືຫາຫາທາງແກ້ໄຂໃຫ້ທ່ວງທັນ.
ຕາມຂໍ້ມູນຈາກໜ່ວຍງານປັບສະຖານະພາບແຮງງານລາວໃນໄທ ໃຫ້ຮູ້ວ່າ:ນັບແຕ່ທ້າຍເດືອນສິງຫາ 2017 ເປັນຕົ້ນມາ, ຄະນະກຳມະການປັບສະຖານະພາບແຮງງານລາວໃນໄທໄດ້ລະດົມແຮງງານລາວໃນໄທໃຫ້ມາຂື້ນທະບຽນແຮງງານຖືກຕ້ອງຕາມລະບຽບກົດໝາຍ, ພາຍຫລັງທາງການໄທສັ່ງແກ້ໄຂບັນຫາແຮງງານຕ່າງດ້າວໃນໄທຢ່າງເຂັ້ມງວດ ແລະ ໃນນັ້ນ ລວມທັງແຮງງານລາວຕ້ອງແຈ້ງຂື້ນທະບຽນແຮງງານຢ່າງຖືກຕ້ອງໃຫ້ສຳເລັດພາຍໃນເດືອນທັນວາ 2017 ແຕ່ປາກົດວ່າບໍ່ສຳເລັດ, ຈົນມາຮອດວັນທີ 31 ມັງກອນ 2018 ສາມາດອອກທະບຽນແຮງງານລາວໄດ້ພຽງ 24.684 ຄົນ, ໃນນີ້ເປັນແຮງງານຈຳນວນ 22.422 ຄົນ (ຍິງ 11.525 ຄົນ), ຜູ້ຕິດຕາມ 2.262 ຄົນ, ແຕ່ຍັງອີກຈຳນວນ 46 ພັນກວ່າຄົນ ທີ່ຕ້ອງສືບຕໍ່ເຮັດໃຫ້ສຳເລັດກ່ອນ 31 ມີນາ2018 ນີ້.
ຂໍ້ມູນຈາກທາງການໄທ ໃຫ້ຮູ້ວ່າ: ລັດຖະບານໄທໄດ້ອອກພະຣາຊກຳນົດ ການບໍລິຫານຈັດການການເຮັດວຽກຄົນຕ່າງດ້າວປີ 2017, ຊຶ່ງໄດ້ຕັ້ງສູນຮັບແຈ້ງແຮງງານຕ່າງດ້າວ 3 ສັນຊາດ ກຳນົດ 15 ວັນໃຫ້ມາຂື້ນທະບຽນ ແລະ ມີແຮງງານລາວມາຂື້ນທະບຽນຈັບຄູ່ (ນາຍຈ້າງຈັບຄູ່ລູກຈ້າງ) ມີທັງໝົດ100.740 ຄົນ, ໃນນັ້ນແຮງງານລາວໄດ້ຮັບການຢັ້ງຢືນວ່າເປັນຄົນລາວທີ່ທາງການໄທອອກໃບຈັບຄູ່ໃຫ້ຈຳນວນ 87.442 ຄົນ, ມີກຳນົດຮອດ 31 ທັນວາ2017, ຊຶ່ງຍັງບໍ່ສາມາດຈັດຕັ້ງປະຕິບັດຕາມກຳນົດເວລາ, ສະນັ້ນມີແຮງງານລາວ (ກຸ່ມທີ່ມີບັດສີບົວ ແລະ ກຸ່ມທີ່ມີໃບຈັບຄູ່) ສອງແບບນີ້ຍັງຕົກຄ້າງປະມານ1,3 ແສນກວ່າຄົນ, ເພື່ອແກ້ໄຂບັນຫາດັ່ງກ່າວທາງການໄທຈິ່ງມີນະໂຍບາຍຜ່ອນຜັນແຮງງານລາວກຸ່ມທີ່ມີບັດສີບົວ ແລະ ກຸ່ມທີ່ມີໃບຈັບຄູ່ໃຫ້ມາຂື້ນທະບຽນໃໝ່ກຳນົດຮອດ 30 ມິຖຸນາ 2018 ໃຫ້ສຳເລັດຕາມຈຳນວນດັ່ງກາວ, ສະນັ້ນ ທາງການໄທຈຶ່ງອອກໜັງສືຂໍຄວາມຮ່ວມມືກັບທາງການລາວ ເພື່ອໃຫ້ແຮງງານລາວສອງກຸ່ມນີ້ໃຫ້ໄປດຳເນີນການພິສູດສັນຊາດຢູ່ໜ່ວຍງານປັບສະຖານະພາບແຮງງານລາວຢູ່ສູນການຄ້າໄອທີ ສະແຄວ (IT Square) ເຂດຫລັກ 4 ກຸງເທບມະຫານະຄອນ ທີ່ກຳລັງປັບສະຖານະພາບໃນປະຈຸບັນ.
ຫລ້າສຸດເມື່ອວັນທີ 20 ກຸມພານີ້, ກະຊວງແຮງງານ ແລະ ສະຫວັດດີການສັງຄົມ, ກະຊວງການຕ່າງປະເທດ, ກະຊວງປ້ອງກັນຄວາມສະຫງົບຂອງລາວ ກໍໄດ້ຈັດປະຊຸມປຶກສາຫາລືກ່ຽວກັບການປັບສະຖານະພາບແຮງງານລາວທີ່ເຮັດວຽກບໍ່ຖືກກົດໝາຍຢູ່ປະເທດໄທ, ໂດຍໄດ້ທົບທວນເນື້ອໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືການຈ້າງງານລາວ-ໄທ ທີ່ໄດ້ເຊັນກັນເມື່ອວັນທີ 6ກໍລະກົດ 2016 ສະບັບປັບປຸງ, ສັນຍາຮ່ວມມືລາວ-ໄທ ແລະ ຂໍ້ຕົກລົງວ່າດ້ວຍການຈ້າງແຮງງານສອງລັດຖະບານລາວ-ໄທ ແລະ ບັນຫາອື່ນໆ ເພື່ອເປັນທາງອອກໃນການປັບສະຖານະພາບແຮງງານລາວໃນໄທໃຫ້ຖືກຕ້ອງຕາມລະບຽບຫລັກການ.
