ເກີດເຫດຟ້າຜ່າງົວຕາຍພ້ອມກັນ 27 ໂຕຢູ່ ເມືອງແກ່ນທ້າວ ແຂວງໄຊຍະບູລີ
ທ່ານ ສຳລານ ສຸວັນນະໂສດ ເຈົ້າເມືອງແກ່ນທ້າວແຂວງໄຊຍະບູລີ ໄດ້ລາຍງານໃຫ້ຮູ້ວ່າ: ໃນຕອນເຊົ້າວັນທີ 22 ກຸມພານີ້, ໄດ້ເກີດມີຝົນຕົກ ແລະ ລົມພັດແຮງ, ໄດ້ເກີດຟ້າຜ່າຝຸງງົວຂອງປະຊາຊົນຢູ່ບ້ານນາຫີນເມືອງແກ່ນທ້າວ
ຕາຍພ້ອມກັນເຖິງ 27 ໂຕ. ໃນນັ້ນງົວໃຫຍ່ມີ 19 ໂຕ ແລະ ງົວນ້ອຍ 8 ໂຕ, ເຊິ່ງເຈົ້າຂອງຊື່ທ້າວ ຊຽງພັດ, ຊຶ່ງພາຍຫລັງເກີດເຫດ, ທາງອຳນາດການປົກ
ຄອງເມືອງເລັ່ງເຄື່ອນຍ້າຍສັດທີ່ຕາຍອອກຈາກພຶ້ນທີ່, ພ້ອມທັງຫ້າມນຳໄປຂາຍ ຫລືບໍລິໂພກເດັດຂາດຍ້ອນບໍ່ໃຫ້ຕິດເຊື້ອພະຍາດສັດຕ່າງໆ, ພ້ອມທັງໄດ້ສະເໜີຂັ້ນເທິງຄົ້ນຄວ້າການຊ່ວຍເຫລືອຄອບຄົວທີ່ໄດ້ຮັບຜົນກະທົບຄັ້ງນີ້ເພື່ອໃຫ້ຊີວິດ
ການເປັນຢູ່ຄ່ອຍໆດີຂຶ້ນ.
ທ່ານເຈົ້າເມືອງ ໃຫ້ຮູ້ວ່າ: ສະພາບໄພທຳມະຊາດ, ໄດ້ສ້າງຄວາມເສຍຫາຍ
ກະທົບຕໍ່ຊີວິດການເປັນຢູ່ຂອງປະຊາຊົນພາຍໃນເມືອງສົມຄວນ, ໂດຍສະເພາະ
ແມ່ນໄພນໍ້າຖ້ວມ ແລະ ເມື່ອປີຜ່ານມາກໍໄດ້ເກີດນ້ຳປ່າໄຫລຊຸເຮືອນປະຊາຊົນ ເປ່ເພເສຍຫາຍສົມຄວນໃນ 2 ບ້ານຂອງເມືອງ.
ແລະຈາກສະພາບຝົນຕົກ ແລະ ມີລົມແຮງໃນແລງວັນທີ 21 ກຸມພານີ້, ໄດ້ສ້າງຄວາມເສຍຫາຍສົມຄວນໃຫ້ແກ່ເຮືອນຊານບ້ານຊ່ອງຂອງປະຊາຊົນຢູ່ຫລາຍທ້ອງຖິ່ນ, ບາງເຂດມີຕົ້ນໄມ້ຫັກລົ້ມເປັນຈໍານວນຫລາຍ ແລະ ບາງເຂດແມ່ນມີໝາກເຫັບຕົກເປັນບໍລິເວນກວ້າງ.
