ຍີ່ປຸ່ນຊ່ວຍເຫລືອຫີບປ່ອນບັດ ເລືອກຕັ້ງໃຫ້ກຳປູເຈຍ
ລັດຖະບານຍີ່ປຸ່ນຊ່ວຍເຫລືອຫີບປ່ອນບັດເລືອກຕັ້ງຫລາຍກວ່າ 10.000 ຫີບ ໃຫ້ຄະນະກຳມະການການເລືອກຕັ້ງຂອງກຳປູເຈຍນຳໄປໃຊ້ໃນການເລືອກຕັ້ງທົ່ວໄປ ທີ່ຈະມີຂຶ້ນທ້າຍເດືອນກໍລະກົດນີ້.
Japan donated ballot boxes for Cambodia to hold the July general election pic.twitter.com/eDuTLo7GNQ
— Chan Thul Prak (@prakchanthul) February 21, 2018
ສຳນັກຂ່າວຕ່າງປະເທດລາຍງານຈາກນະຄອນຫລວງພະນົມເປັນ ປະເທດກຳປູເຈຍ ໃນວັນທີ 21 ກຸມພາວ່າ: ທ່ານ ຮິເດະຊິສະ ໂຮະຣິນຸຈິ ເອກອັກຄະລັດຖະທູດຍີ່ປຸ່ນປະຈຳນະຄອນຫລວງພະນົມເປັນ ກ່າວວ່າ: ລັດຖະບານໂຕກຽວຈັດສົ່ງຫີບປ່ອນບັດເລືອກຕັ້ງຫລາຍກວ່າ 10.000 ຫີບໃຫ້ແກ່ຄະນະກຳມະການການເລືອກຕັ້ງແຫ່ງຊາດຂອງກຳປູເຈຍ (NEC) ສຳລັບໃຊ້ໃນການເລືອກຕັ້ງທົ່ວໄປເຊິ່ງຈະມີຂຶ້ນໃນວັນທີ 29 ກໍລະກົດນີ້. ການຊ່ວຍເຫລືອດັ່ງກ່າວຖືເປັນສັນຍາລັກຂອງການສະໜັບສະໜູນຈາກຍີ່ປຸ່ນ ທີ່ມີຕໍ່ການປະຕິຮູບປະຊາທິປະໄຕໃນກຳປູເຈຍ ແລະ ລັດຖະບານໂຕກຽວຫວັງວ່າ ຫີບເລືອກຕັ້ງເຫລົ່ານີ້ຈະມີສ່ວນສຳຄັນຊ່ວຍໃຫ້ການເລືອກຕັ້ງຂອງກຳປູເຈຍເປັນໄປດ້ວຍຄວາມຈົບງາມ ແລະ ຜົນຂອງການເລືອກຕັ້ງສະທ້ອນຄວາມຕ້ອງການຂອງປະຊາຊົນຢ່າງແທ້ຈິງ.
ຂະນະທີ່ທ່ານ ຊິກ ບຸນ ຫົກ ປະທານ NEC ກ່າວຂອບໃຈການຊ່ວຍເຫລືອດັ່ງກ່າວຈາກຍີ່ປຸ່ນ ເຊິ່ງເໝາະກັບປີນີ້ຕົງກັບວາລະຄົບຮອບ 65 ປີ ການສະຖາປະນາການພົວພັນທາງການທູດລະຫວ່າງ ຍີ່ປຸ່ນ ກັບ ກຳປູເຈຍ ແລະ ຫີບເລືອກຕັ້ງທັງໝົດທີ່ໄດ້ຮັບຈາກຍີ່ປຸ່ນມີມູນຄ່າລວມປະມານ 7,5 ລ້ານໂດລາສະຫະລັດ ຄິດເປັນ 1 ໃນ 3 ຂອງຈຳນວນຫີບເລືອກຕັ້ງທັງໝົດທີ່ຈຳເປັນຕ້ອງໃຊ້ໃນການເລືອກຕັ້ງ ຄືປະມານ 30.000 ຫີບ ໂດຍຫີບເລືອກຕັ້ງທີ່ເຫລືອຈະໄດ້ຮັບການຊ່ວຍເຫລືອຈາກຈີນ ເຊິ່ງຈະມາເຖິງໃນເດືອນມີນານີ້.
