ກຽມປະມູນຂາຍຜະລິດຕະພັນນໍ້າດື່ມລາວຂອງບໍລິສັດ ພີເອັສ
ຄະນະໜ່ວຍສະເພາະກິດສືບສວນ-ສອບສວນຄະດີບໍລິສັດ ພີເອັສ ໃຫ້ຮູ້ວ່າ: ປັດຈຸບັນ, ຄະນະກຳມະການປະມູນ ແລະ ຂາຍສິນຄ້າຂອງອະນຸກຳມະການກວດກາການເຄື່ອນໄຫວ, ຖານະການເງິນ ແລະ ຊັບສິນຂອງບໍລິສັດ ພີເອັສ ສົ່ງເສີມກະສິກຳ ແລະ ອຸດສາຫະກຳຄົບວົງຈອນ ຂາອອກ-ຂາເຂົ້າ ຈຳກັດຜູ້ດຽວ (PS) ໄດ້ອອກໜັງສືເຊີນມວນຊົນເຂົ້າຮ່ວມການປະມູນຊັບສິນຂອງບໍລິສັດ ພີເອັສ ເຊິ່ງຜະລິດຕະພັນທີ່ນຳມາປະມູນແມ່ນນໍ້າດື່ມລາວໃນມູນຄ່າຕໍ່າສຸດ 1.300 ລ້ານກີບ, ເຊິ່ງໄດ້ກໍານົດວ່າ: ລາຍການນໍ້າດື່ມລາວທີ່ຈະນໍາມາປະມູນນັ້ນປະກອບມີ 4 ຂະໜາດຄື: 250 ມິນລີລິດ, 350 ມິນລີລິດ, 600 ມິນລີລິດ ແລະ 1.500 ມິນລີລິດ, ທີ່ມີທັງໝົດ 133.000 ແກັດ. ຜູ້ທີ່ສົນໃຈສາມາດເຂົ້າໄປເບິ່ງສິນຄ້າໂຕຈິງໄດ້ຢູ່ບໍລິສັດນັບແຕ່ວັນທີ 21-27 ກຸມພານີ້, ໃນໂມງລັດຖະການ ແລະ ຈະປິດຮັບຊອງປະມູນໃນວັນທີ 28 ກຸມພາ 2018 ເວລາ 9:00 ໂມງ ແລະ ເປີດຊອງປະມູນໃນເວລາ 10:00 ໂມງຂອງມື້ດຽວກັນ.
ເຈົ້າໜ້າທີ່ ໃຫ້ຮູ້ວ່າ: ປັດຈຸບັນການສືບສວນ-ສອບສວນຄະດີບໍລິສັດ ພີເອັສ ແມ່ນມີຄວາມຄືບໜ້າສູງ, ຈາກການຮີບໂຮມຂໍ້ມູນໄດ້ມີບຸກຄົນເຂົ້າມາລາຍງານຄວາມເສຍຫາຍຫລາຍກວ່າ 30 ພັນຄົນຕົກເປັນເງີນກວ່າ 800 ຕື້ກີບ.
