ວິທີຫລຸດອາການຍື່ງທ້ອງຢ່າງໄດ້ຜົນ

ຍື່ງທ້ອງເປັນອາການທີ່ພົບໄດ້ໃນຄົນທົ່ວໄປ ມີສາເຫດຈາກລະບົບຍ່ອຍອາຫານເຮັດວຽກໄດ້ບໍ່ເຕັມປະສິດທິພາບ ເຮັດໃຫ້ເກີດ ແກ໊ສ ແລະ ກົດສ່ວນເກີນໃນກະເພາະອາຫານ, ແຕ່ຈະອາໄສຢາຫລຸດແກ໊ສທຸກເທື່ອໄປກໍອາດຈະບໍ່ດີປານໃດ ດັ່ງນັ້ນລອງມາປັບພຶດຕິກຳເພື່ອຫລຸດອາການຍື່ງທ້ອງກັນຖ້ອນ.

     – ກິນເຂົ້າເທື່ອລະໜ້ອຍ, ແຕ່ກິນຫລາຍໆເທື່ອ ແລະ ຫຍຳ້ໃຫ້ແຫລກກ່ອນກືນ : ເພາະອາຫານຄາບໃຫຍ່ ແລະ ການດື່ມນຳ້ເທື່ອລະຫລາຍໆຈະເຮັດໃຫ້ກະເພາະ ອາຫານໃຄ່ຂຶ້ນ ເຮັດໃຫ້ຫູຮູດຫລອດອາຫານເບື້ອງລຸ່ມຢ່ອນລົງ  ເກີດກົດໄຫລຍ້ອນໄດ້ຫລາຍຂຶ້ນ.

     – ຄ່ອຍໆຫລຸດອາຫານຫວານ, ຊີ້ນສັດ ແລະ ອາຫານມັນ : ໂດຍຈົດບັນທຶກລາຍການອາຫານ ເຮັດເຄື່ອງໝາຍໄວ້ວ່າ  ວັນເວລາໃດມີອາການ ເພື່ອຈະໄດ້ຫລີກເວັ້ນອາຫານຊະນິດນັ້ນ ເພາະກະເພາະອາຫານໃຊ້ເວລາຍ່ອຍອາຫານດົນ 6 – 8 ຊົ່ວໂມງ ເຊິ່ງເຮັດໃຫ້ເກີດການໝັກໝົມ ກາຍເປັນແກ໊ສໃນທ້ອງ.

     – ຫລີກເວັ້ນຜັກດິບໃນຕອນແລງ : ເພາະຜັກມີເສັ້ນໄຍຫລາຍຖ້າກິນຫລາຍເກີນໄປຈະເຮັດໃຫ້ຍື່ງທ້ອງໄດ້ ເນື່ອງຈາກຮ່າງກາຍບໍ່ມີນຳ້ຍ່ອຍເສັ້ນໄຍນີ້, ແຕ່ຕ້ອງອາໄສແບັກທີເຣຍທີ່ຢູ່ໃນລຳໄສ້ໃຫຍ່ເປັນໂຕຍ່ອຍ ທາງທີ່ດີຫັນມາກິນຜັກລວກ ຫລື ຜັກຕົ້ມແທນຈະດີກ່ວາ.

     – ຖ້າມີອາການຈຸກແໜ້ນທ້ອງ ແລ້ວໃຫ້ລຸກຂຶ້ນເຄື່ອນໄຫວຮ່າງກາຍ, ດື່ມນຳ້ອຸ່ນ ຫລື ກິນພືດພື້ນເມືອງທີ່ມີລິດໄລ່ລົມ : ເຊັ່ນວ່າຂີ້ໝິ້ນ, ຂີງ, ຂ່າ, ຫົວສີໄຄ, ໃບຜັກໜອກ. ຫາກຍື່ງທ້ອງກ່ອນຈະເຂົ້ານອນ ໃຫ້ເອົາຜ້າຫົ່ມໝູນຫົວຕຽງ ຫລື ໝູນໝອນສູງຂຶ້ນ ຈະເຮັດໃຫ້ກົດ ແລະ ນຳ້ຍ່ອຍໄຫລລົງກະເພາະອາຫານໄດ້ໄວຂຶ້ນ.