ສິງກະໂປກຽມເກັບພາສີ ກາກບອນໃນປີ 2019
ລັດຖະບານສິງກະໂປກຽມເກັບພາສີກາກບອນນັບແຕ່ປີໜ້າເປັນຕົ້ນໄປ ເພື່ອສົ່ງເສີມຄວາມພະຍາຍາມໃນການຮັກສາສິ່ງແວດລ້ອມ.
ສຳນັກຂ່າວຕ່າງປະເທດລາຍງານຈາກປະເທດສິງກະໂປ ໃນວັນທີ 20 ກຸມພາວ່າ: ທ່ານ ເຮັງ ສະວີ ກຽດ ຮອງລັດຖະມົນຕີກະຊວງການເງິນຂອງສິງກະໂປ ກ່າວໃນວັນທີ 19 ກຸມພາວ່າ: ມາດຕະການເກັບພາສີກາກບອນຈະມີຜົນບັງຄັບໃຊ້ນັບແຕ່ປີ 2019 ເປັນຕົ້ນໄປ ໂດຍພາສີດັ່ງກ່າວຈະເປັນການຮຽກເກັບຈາກທຸກພາກສ່ວນໃນອັດຕາ 5,0 ໂດລາສິງກະໂປຕໍ່ການປ່ອຍແກັສເຮືອນແກ້ວ 1 ໂຕນ ລະຫວ່າງປີ 2019-2023 ຈາກນັ້ນລັດຖະບານຈະທົບທວນອັດຕາດັ່ງກ່າວ ເຊິ່ງອາດຂະຫຍາຍໄລຍະເວລາຕໍ່ໄປໃນອັດຕາຄືເກົ່າ ຫລື ເພີ່ມເປັນ 10-15 ໂດລາສິງກະໂປຕໍ່ແກັສເຮືອນແກ້ວ 1 ໂຕນ ພາຍໃນປີ 2030.
ທ່ານ ເຮັງ ກ່າວອີກວ່າ: ສິງກະໂປເປັນປະເທດທີ່ຜະລິດແກັສເຮືອນແກ້ວໜ້ອຍກວ່າເກືອບທຸກປະເທດໃນໂລກ ໃນປະລິມານເມື່ອທຽບໃສ່ລາຍໄດ້ຕໍ່ຫົວຄົນຂອງປະຊາກອນ ແລະ ລັດຖະບານມີນະໂຍບາຍຢ່າງຈິງຈັງໃນການຫລຸດປະລິມານການປ່ອຍແກັສພິດສູ່ຊັ້ນບັນຍາກາດໃຫ້ໜ້ອຍລົງອີກ ເພື່ອຕໍ່ສູ້ກັບສະພາບການປ່ຽນແປງຂອງດິນຟ້າອາກາດໃນໂລກ. ນອກຈາກນີ້ ພາກລັດເຊື່ອວ່າການຮຽກເກັບພາສີກາກບອນ ຈະເປັນການກະຕຸ້ນປະສິດທິພາບໃນການແຂ່ງຂັນທາງທຸລະກິດຂອງຜູ້ປະກອບການໃນສິງກະໂປ ໃຫ້ແຂ່ງຂັນກັນອອກມາດຕະການຮັກສາສິ່ງແວດລ້ອມທີ່ຈະເປັນການປະຢັດຄ່າໃຊ້ຈ່າຍໃນອົງການ, ແຕ່ແນ່ນອນວ່າເປັນການຮັກສາສິ່ງແວດລ້ອມໄປພ້ອມກັນ.
