ສປຊ ຮຽກຮ້ອງທຸກຝ່າຍໃນຊີຣີ ຢຸດຖະຫລົ່ມເຂດກູຕາຕາເວັນອອກ
ສະຫະປະຊາຊາດອອກຖະແຫລງການຮຽກຮ້ອງໃຫ້ທຸກຝ່າຍໃນສົງຄາມຊີຣີຢຸດຕິການສູ້ຮົບໃນເຂດກູຕາຕາເວັນອອກ ຫລັງຈຳນວນຜູ້ເສຍຊີວິດເພີ່ມເປັນຫລາຍກວ່າ 100 ຄົນແລ້ວ ພາຍໃນໄລຍະເວລາພຽງ 24 ຊົ່ວໂມງ.
ສຳນັກຂ່າວຕ່າງປະເທດລາຍງານຈາກນະຄອນຫລວງດາມັດກັດ ປະເທດຊີຣີ ໃນວັນທີ 20 ກຸມພາວ່າ: ສຳນັກງານເພື່ອການປະສານງານດ້ານມະນຸດສະທຳແຫ່ງສະຫະປະຊາຊາດ (OCHA) ປະຈຳຊີຣີ ອອກຖະແຫລງການໃນວັນທີ 19 ກຸມພາ ມີເນື້ອໃນສຳຄັນຮຽກຮ້ອງໃຫ້ຄູ່ກໍລະນີທຸກຝ່າຍໃນສົງຄາມຊີຣີ ຢຸດຕິການສູ້ຮົບໃນເຂດກູຕາຕາເວັນອອກ ທີ່ຕັ້ງຢູ່ນອກນະຄອນຫລວງດາມັດກັດ ແລະ ເປັນພື້ນທີ່ແຫ່ງສຸດທ້າຍອ້ອມເມືອງຫລວງຂອງຊີຣີ ທີ່ກອງກຳລັງຝ່າຍກະບົດຍັງຍຶດຄອງໄວ້ໄດ້ ຫລັງປະຕິບັດການໂຈມຕີທາງອາກາດ. ການຍິງປືນໃຫຍ່ ແລະ ການຍິງຈະຫລວດຕໍ່ສູ້ກັນ ນັບແຕ່ວັນທີ 19 ກຸມພາ ເປັນເຫດໃຫ້ມີຜູ້ເສຍຊີວິດແລ້ວຫລາຍກວ່າ 100 ຄົນ ແລະ ໄດ້ຮັບບາດເຈັບອີກຫລາຍກວ່າ 300 ຄົນ.
UN on Assad's disgusting siege of Eastern Ghouta: "Malnutrition rates have now reached unprecedented levels, with 11.9 per cent of children under five years old acutely malnourished – the highest rate recorded in Syria since the beginning of the crisis" pic.twitter.com/NRBmW8JlPL
— kristyan benedict (@KreaseChan) February 19, 2018
ຂະນະທີ່ລາຍງານໂດຍອົງການສັງເກດການດ້ານສິດທິມະນຸດຊີຣີ (SOHR) ລະບຸວ່າ: ຈຳນວນຜູ້ເສຍຊີວິດ ແລະ ຜູ້ໄດ້ຮັບບາດເຈັບຈາກການສູ້ຮົບກັນຢ່າງດຸເດືອດໃນເຂດກູຕາຕາເວັນອອກ ພາຍໃນໄລຍະເວລາ 24 ຊົ່ວໂມງຜ່ານມາ ຖືເປັນສະຖິຕິສູງສຸດພາຍໃນວັນດຽວ ນັບແຕ່ກອງກຳລັງຝ່າຍຕໍ່ຕ້ານລັດຖະບານເຂົ້າຍຶດຄອງພື້ນທີ່ແຫ່ງນີ້ ໃນປີ 2015 ແລະ ຖືກທະຫານລັດຖະບານປິດລ້ອມນັບຈາກນັ້ນ. ນອກຈາກນີ້ SOHR ຕັ້ງຂໍ້ສັນນິຖານວ່າ: ການທີ່ກອງທັບຊີຣີເພີ່ມຄວາມຮຸນແຮງຂອງປະຕິບັດການໂຈມຕີທາງອາກາດໃນເຂດກູຕາຕາເວັນອອກ ຄືເພື່ອເປີດທາງໃຫ້ມີການໂຈມຕີໂດຍກອງກຳລັງພາກພື້ນດິນເປັນຂັ້ນຕໍ່ໄປ.
