ວັງວຽງ: ເມືອງຍອດນິຍົມທ່ອງທ່ຽວແຫ່ງໜຶ່ງຂອງລາວ

          ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງວັງວຽງ ແຂວງວຽງຈັນ ໃຫ້ຮູ້ວ່າ: ປີ 2016 ຜ່ານມາມີນັກທ່ອງທ່ຽວເຂົ້າມາຢ້ຽມຊົມສະຖານທີ່ທ່ອງທ່ຽວຕ່າງໆໃນເມືອງວັງວຽງຫລາຍກວ່າ 110 ຄົນ, ໃນນັ້ນນັກທ່ອງທ່ຽວພາຍຈໍານວນ 38 ພັນກວ່າຄົນ ແລະ ຕ່າງປະເທດປະ ມານ 70 ພັນຄົນ, ສ່ວນຫລາຍມາຈາກທະວີບອາຊີ ແລະ ເອີຣົບ, ຊຶ່ງສາມາດສ້າງວຽກເຮັດງານທຳ ແລະ ສ້າງລາຍຮັບໃຫ້ປະຊາຊົນພາຍໃນເມືອງໄດ້ເປັນຢ່າງດີ, ທຽບໃສ່ປີຜ່າມມາເຫັນວ່າຈຳນວນນັກທ່ອງທ່ຽວຢູ່ໃນເກນປົກກະຕິ, ແຕ່ປັດຈຸບັນສັງເກດເຫັນວ່າບັນຍາກາດການທ່ອງທ່ຽວໃນເມືອງວັງວຽງແມ່ນເລີ່ມມີບັນຍາກາດຄຶກຄື້ນດີຂຶ້ນຍ້ອນມີນັກທ່ອງທ່ຽວເຂົ້າມານັບມື້ຫລາຍຂຶ້ນ, ເນື່ອງຈາກເປັນໄລຍະເລີ່ມເຂົ້າສູ່ລະດູຂອງການທ່ອງທ່ຽວ, ບວກກັບເມືອງວັງວຽງມີແຫຼ່ງທ່ອງທ່ຽວທາງທຳມະຊາດທີ່ສວຍງາມເປັນຈຳນວນຫລາຍ ແລະ ຍັງເປັນທາງຜ່ານໄປຍັງແຂວງຫຼວງພະບາງທີ່ເປັນເມືອງມໍລະດົມໂລກ.

ອີງຕາມການລາຍງານຂອງກະຊວງຖະແຫຼງຂ່າວ, ວັນທະນະທຳ ແລະ ທ່ອງທ່ຽວ ໃຫ້ຮູ້ວ່າ: ວັງວຽງແມ່ນໜຶ່ງໃນສີ່ເມືອງຍອດນິຍົມ ແລະ ເປັນປາຍທາງການທ່ອງທ່ຽວສຳຄັນທີ່ສຸດຂອງລາວ, ຄຽງຄູ່ກັບນະຄອນຫຼວງວຽງຈັນ, ຫລວງພະບາງ ແລະ ຈຳປາສັກ. ນອກນີ້ໃນອາທິດຜ່ານມາອໍານາດການປົກຄອງແຂວງວຽງຈັນໄດ້ອະນຸມັດໃຫ້ບໍລິສັດ ອີຈິນ ວິສະຫະກຳກໍ່ສ້າງລາວຈຳກັດ ສຶກສາຄວາມເປັນໄປໄດ້ ແລະ ສຳຫລວດອອກແບບໂຄງການພັດທະນາສະໜາມບິນເກົ່າເມືອງວັງວຽງໃຫ້ກາຍແຫລ່ງທ່ອງທ່ຽວແບບຍືນຍົງ, ຊຶ່ງຄາດວ່າຈະມີການລົງທຶນຫລາຍກວ່າ 200 ລ້ານໂດລາສະຫະລັດ, ກວມເນື້ອທີ່ຫລາຍກວ່າ 15 ເຮັກຕາເພື່ອສ້າງຫ້ອງວາງສະແດງສິລະປະ, ຫ້ອງສຳພັດນ້ຳແຂງ, ສວນນ້ຳພຸ, ສູນການຄ້າ, ໂຮງແຮມ, ອາພາດເມັນ, ຮ້ານກິນດື່ມ, ສະຖານທີ່ບັນເທີງສໍາລັບເດັກ, ຕະຫລາດນ້ຳ, ສວນນ້ຳ, ບ່ອນຈອດລົດ, ສະຖານທີ່ທ່ອງທ່ຽວ ແລະ ອື່ນໆ, ເຊິ່ງກິດຈະກໍາທັງໝົດຕ້ອງໄດ້ມີການຮັບຮອງຈາກພາກລັດຕາມລະບຽບກົດໝາຍ, ຖ້າໂຄງການດັ່ງກ່າວເກີດຂຶ້ນຈິງຍິ່ງຈະເຮັດໃຫ້ວັງວຽງສາມາດດຶງດູດນັກທ່ອງທ່ຽວໄດ້ຫລາຍຂຶ້ນຕື່ມອີກ.