ທຳລາຍຕູ້ເກມຜິດກົດໝາຍຈໍານວນຫລາຍ

ເມື່ອບໍ່ດົນມານີ້, ກົມຕຳຫລວດຄຸ້ມຄອງຄົນຕ່າງປະເທດກະຊວງປ້ອງກັນຄວາມສະຫງົບໄດ້ຈັດພິທີຈູດທຳລາຍຕູ້ເກມຜິດກົດໝາຍຈຳນວນ 67 ໜ່ວຍທີ່ຍຶດໄດ້ຈາກຄົນຕ່າງປະເທດລັກລອບເປີດໃຫ້ບໍລິການແບບຜິດກົດໝາຍຢູ່ນະຄອນຫລວງວຽງຈັນ.

ກົມດັ່ງກ່າວ ໃຫ້ຮູ້ວ່າ: ຕູ້ເກມທັງໝົດແມ່ນຍືດໄດ້ໃນປີນີ້ ແລະ ເປັນຄັ້ງທີ 9 ທີ່ມີການທໍາລາຍຖິ້ມ, ຊຶ່ງໄລຍະຜ່ານມາໄດ້ມີການກວດກາ ແລະ ຍືດຕູ້ເກມ ຜິດກົດໝາຍຂອງຊາວຕ່າງປະເທດທີ່ລັກລອບເປີດບໍລິການແບບບໍ່ຖືກຕ້ອງມາທໍາລາຍຖິ້ມຫລາຍກວ່າ 600 ໜ່ວຍ ແລະ ຈະສືບຕໍ່ແກ້ໄຂບັນຫາດັ່ງກ່າວໃຫ້ໝົດໄປຈາກສັງຄົມ, ພ້ອມທັງຮຽກຮ້ອງໃຫ້ປະຊາຊົນເປັນຫູເປັນຕາຊ່ວຍເຈົ້າໜ້າທີ່, ຖ້າພົບເຫັນມີການລັກລອບເປີດໃຫ້ບໍລິການຕູ້ເກມແບບຜິດກົດໝາຍບໍ່ວ່າຈະເປັນຂອງຊາວຕ່າງດ້າວ ຫລື ຄົນລາວ ແມ່ນໃຫ້ແຈ້ງຕໍ່ເຈົ້າໜ້າທີ່ເພື່ອລົງກວດກາ ແລະ ດໍາເນີນຄະດີຕາມລະບຽບກົດໝາຍ.