ຊີຣີຖະຫລົ່ມຖານທີ່ໝັ້ນກຸ່ມກະບົດຄັ້ງໃຫຍ່ ພົນລະເຮືອນເສຍຊີວິດແລ້ວ 77 ຄົນ
ກອງກຳລັງລັດຖະບານຊີຣີເປີດສາກໂຈມຕີທາງອາກາດຖະຫລົ່ມເຂດໂກຕາຕາເວັນອອກ ເຊິ່ງເປັນຖານທີ່ໝັ້ນສຸດທ້າຍຂອງກຸ່ມກະບົດທີ່ຢູ່ໃກ້ນະຄອນຫລວງດາມັດກັດຢ່າງໜັກ ຖືເປັນການໂຈມຕີຄັ້ງຮຸນແຮງທີ່ສຸດໃນຮອບຫລາຍປີ ແລະ ເຮັດໃຫ້ພົນລະເຮືອນເສຍຊີວິດແລ້ວຢ່າງໜ້ອຍ 77 ຄົນ ໂດຍໃນຈຳນວນນີ້ເປັນເດັກເຖິງ 20 ຄົນ.
ອົງການສັງເກດການເພື່ອສິດທິມະນຸດຊີຣີ (SOHR) ເປັນຜູ້ລາຍງານຈຳນວນຜູ້ເສຍຊີວິດດັ່ງກ່າວ ແຕ່ຍັງບໍ່ມີການຢືນຢັນຕົວເລກນີ້ຈາກທາງການ. ຫລາຍຝ່າຍຄາດຄະເນວ່າກອງກຳລັງລັດຖະບານຊີຣີເປີດສາກໂຈມຕີທາງອາກາດໃນຄັ້ງນີ້ ເພື່ອເປີດທາງໃຫ້ກອງກຳລັງພາກພື້ນດິນບຸກເຂົ້າໄປໃນເຂດໂກຕາຕາເວັນອອກ.
ມີພົນລະເຮືອນກວ່າ 400.000 ຄົນອາໄສຢູ່ໃນເຂດໂກຕາຕາເວັນອອກ ແຕ່ບໍລິເວນນີ້ຖືກກອງກຳລັງລັດຖະບານຊີຣີປິດລ້ອມມາແຕ່ປີ 2013 ເຮັດໃຫ້ຊີວິດການເປັນຢູ່ຂອງປະຊາຊົນຕົກຢູ່ໃນສະພາບຂາດເຂີນຢ່າງໜັກ ໂດຍຂາດເຂີນທັງອາຫານ, ນ້ຳດື່ມ, ເຊື້ອໄຟ, ຢາ ແລະ ສິ່ງຈຳເປັນຕ່າງໆ. ເຈົ້າໜ້າທີ່ຜູ້ໜຶ່ງຂອງສະຫະປະຊາຊາດໄດ້ຮ້ອງຂໍໃຫ້ມີການຢຸດຍິງໂດຍໄວ ເພາະສະຖານະການເລີ່ມຮ້າຍແຮງ ທັງພົນລະເຮືອນຜູ້ບໍລິສຸດຕ້ອງສ່ຽງຊີວິດ ແລະ ໄດ້ຮັບຄວາມເດືອດຮ້ອນຢ່າງໜັກ.
ໃນເດືອນມີນາຈະເຖິງນີ້ ຈະເປັນວາລະຄົບຮອບ 7 ປີສົງຄາມກາງເມືອງໃນຊີຣີ ເຊິ່ງເຮັດໃຫ້ມີຜູ້ເສຍຊີວິດແລ້ວຫລາຍແສນຄົນ ແລະ ພົນລະເມືອງກວ່າ 5 ລ້ານຄົນ ຕ້ອງອົບພະຍົບລີ້ໄພອອກນອກປະເທດ.
