ສ່ວຍສາອາກອນ ນະຄອນຫລວງວຽງຈັນ ປັບປຸງການຈັດຕັ້ງຫລາຍຕຳແຫນ່ງງານ
ເມື່ອທ້າຍອາທິດຜ່ານມາພະແນກສ່ວຍສາອາກອນ ປະຈຳນະຄອນຫລວງວຽງຈັນ ໄດ້ປະກາດການຈັດຕັ້ງຕໍາແໜ່ງງານຂັ້ນຫົວໜ້າພະແນກ ແລະ ຫົວໜ້າ-ຮອງຫົວໜ້າຂະແໜງ ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ມີທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫລວງວຽງຈັນ, ພ້ອມດ້ວຍພະນັກງານອ້ອມຂ້າງຂະແໜງສ່ວຍສາອາກອນນະຄອນຫລວງວຽງຈັນເຂົ້າຮ່ວມ, ໂດຍໄດ້
ຍົກຍ້າຍ ທ່ານ ຄໍາມອນ ບົວພັນ ຫົວໜ້າພະແນກສ່ວຍສາອາກອນ ປະຈໍານະຄອນຫລວງວຽງຈັນ ເປັນຮອງຫົວໜ້າພະແນກການເງິນນະຄອນຫລວງວຽງຈັນ, ແລະ ແຕ່ງຕັ້ງ ທ່ານ ສີລິລາດທົງສິນ ທອງເພັງ ຮອງຫົວໜ້າພະແນກການເງິນນະຄອນຫລວງວຽງຈັນ ເປັນຫົວໜ້າສ່ວຍສາອາກອນປະຈໍານະຄອນຫລວງວຽງຈັນ.
ແຕ່ງຕັ້ງທ່ານ ວົງທອງ ຄໍາກິແກ້ວ ຫົວໜ້າຫ້ອງຈັດຕັ້ງ-ບໍລິຫານ ເປັນຫົວໜ້າຂະແໜງຈັດຕັ້ງ, ບໍລິຫານ ແລະ ການເງິນ, ແຕ່ງຕັ້ງ ທ່ານ ບຸນຖົມ ດວງອຸດົມ ຮອງຫົວໜ້າຫ້ອງຄຸ້ມຄອງເກັບລາຍຮັບເປັນຮອງຫົວໜ້າຂະແໜງຈັດຕັ້ງ, ບໍລິຫານ ແລະ ການເງິນ, ແຕ່ງຕັ້ງ ທ່ານ ນາງ ລັດຕະນາ ວັນຍາ ຮອງຫົວໜ້າໜ່ວຍງານສ່ວຍສາອາກອນ ປະຈໍາເມືອງຈັນທະບູລີ ເປັນຮອງຫົວໜ້າຂະແໜງ ຈັດຕັ້ງ, ບໍລິຫານ ແລະ ການເງິນ, ແຕ່ງຕັ້ງທ່ານ ອະນັນນະເລດ ລາດຊະໂພ ຮອງຫົວໜ້າຫ້ອງຄຸ້ມຄອງເກັບລາຍໄດ້, ຄ່າທໍານຽມ ແລະ ຄ່າບໍລິການ ເປັນຮອງຫົວໜ້າຂະແໜງຈັດຕັ້ງ, ບໍລິຫານ ແລະ ການເງິນ.
ແຕ່ງຕັ້ງ ທ່ານ ນາງ ກົງນາລີ ວົງໄຊ ຫົວໜ້າຫ້ອງຄຸ້ມຄອງເກັບລາຍໄດ້ຄ່າທໍານຽມ ແລະ ຄ່າບໍລິການ ເປັນຫົວໜ້າຂະແໜງກວດກາພາຍໃນ, ແຕ່ງຕັ້ງທ່ານ ກ້ອນແກ້ວ ສີສະໄຫລ ຮັກສາການຫົວໜ້າຫ້ອງກວດກາບັນຊີວິສາຫະກິດ ເປັນຮອງຫົວໜ້າຂະແໜງກວດກາພາຍໃນ, ແຕ່ງຕັ້ງທ່ານ ນາງ ພູສະຫັວນ ພະຄີ່ນ ຮອງຫົວໜ້າຫ້ອງກວດກາອາກອນ ເປັນຮອງຫົວໜ້າຂະແໜງກວດກາພາຍໃນ, ແຕ່ງຕັ້ງທ່ານ ວົງພະຈັນ ສິງຊົມພູ ຮອງຫົວໜ້າໜ່ວຍງານສ່ວຍສາອາກອນ ປະຈໍາເມືອງໄຊເສດຖາ ເປັນຮອງຫົວໜ້າຂະແໜງກວດກາພາຍໃນ.
ແຕ່ງຕັ້ງ ທ່ານ ດໍາລົງ ເທບພະກອນ ຫົວໜ້າຫ້ອງຄຸ້ມຄອງເກັບລາຍຮັບ ເປັນຫົວໜ້າຂະແໜງແຜນການ, ບໍລິການລາຍຮັບ, ແຕ່ງຕັ້ງ ທ່ານ ເພັດສົມພອນ ພົງໄພປະດິດ ຮອງຫົວໜ້າຫ້ອງກວດກາບັນຊີວິສາຫະກິດ ເປັນຫົວໜ້າຂະແໜງແຜນການ, ບໍລິການລາຍຮັບ, ແຕ່ງຕັ້ງ ທ່ານ ນາງ ແພງຈັນ ສູນທະວົງ ຮອງຫົວໜ້າຫ້ອງຄຸ້ມຄອງເກັບລາຍຮັບ ເປັນຫົວໜ້າຂະແໜງແຜນການ, ບໍລິການລາຍຮັບ, ແຕ່ງຕັ້ງ ທ່ານ ນາງ ບົວສະຫວັນ ສຸກວິໄລ ຮອງຫົວໜ້າຫ້ອງກວດກາອາກອນ ເປັນຮອງຫົວໜ້າຂະແໜງ ແຜນການ, ບໍລິການລາຍຮັບ.
ແຕ່ງຕັ້ງທ່ານ ຄໍາຕັນ ພູມມະເທບ ຫົວໜ້າໜ່ວຍງານສ່ວຍສາອາກອນປະຈໍາ ເມືອງສີສັດຕະນາກ ເປັນຫົວໜ້າຂະແໜງກວດກາຫລັງການແຈ້ງລາຍຮັບ, ແຕ່ງຕັ້ງທ່ານ ນາງ ພອນໄຊ ສຸກຂະເສີມ ຮອງຫົວໜ້າຫ້ອງກວດກາບັນຊີວິສາຫະກິດ ເປັນຮອງຫົວໜ້າຂະແໜງກວດກາຫລັງການແຈ້ງລາຍຮັບ, ຍົກຍ້າຍ ແລະ ແຕ່ງຕັ້ງທ່ານ ພອນໄຊ ເພັງສຸວັນ ພະນັກງານວິຊາການກົມສ່ວຍສາອາກອນ ເປັນຮອງຫົວໜ້າຂະແໜງກວດກາຫລັງການແຈ້ງລາຍຮັບ ແຕ່ງຕັ້ງທ່ານ ນາງ ສີໃບພອນ ຫລວງຜ່ານ ຮອງຫົວໜ້າຫ້ອງແຜນການ ແລະ ຂໍ້ມູນຂ່າວສານ ເປັນຮອງຫົວໜ້າຂະແໜງກວດກາຫລັງການແຈ້ງລາຍຮັບ.
ໃນໂອກາດນີ້, ທ່ານຮອງລັດຖະມົນຕີກະຊວງການເງິນ ໄດ້ມີຄຳເຫັນຊີ້ນຳວ່າ: ການປະກາດປັບປຸງການຈັດຕັ້ງຄັ້ງນີ້, ແມ່ນອີງໃສ່ຄວາມຮຽກຮ້ອງຕ້ອງ ການຂອງວຽກງານໃນໄລຍະໃຫມ່ ເພື່ອແນໃສ່ເຮັດໃຫ້ວຽກງານຈັດເກັບລາຍຮັບເຂົ້າງົບປະມານແຫ່ງລັດຂອງຂະແໜງສ່ວຍສາອາກອນໃຫ້ບັນລຸຕາມແແຜນການທີ່ວາງໄວ້, ເນື່ອງຈາກວ່າໃນປັດຈຸບັນສະພາບການເງິນ-ງົບປະມານມີລັກສະນະຝືດເຄື່ອງ ທາງຄະນະນຳນັບແຕ່ຂັ້ນສູນການຮອດທ້ອງຖິ່ນໂດຍສະເພາະແມ່ນກະຊວງການເງິນໄດ້ເອົາໃຈໃສ່ຕິດຕາມຢ່າງໃກ້ຊິດທຸກຂົງເຂດວຽກງານເພື່ອເຮັດໃຫ້ການຈັດເກັບລາຍຮັບເຂົ້າງົບປະມານມີຄວາມຄ່ອງຕົວ ແລະ ເພີ່ມຂຶ້ນ ແລະ ຜູ້ທີ່ໄດ້ຮັບການ ແລະ ແຕ່ງຕັ້ງຕ້ອງສືບຕໍ່ເອົາໃຈໃສ່ວຽກງານສຶກສາອົບຮົມ ການເມືອງແນວຄິດໃຫ້ບັນດາຖັນແຖວພະນັກງານຢ່າງຕັ້ງໜ້າ, ສືບຕໍ່ຍົກລະດັບຄວາມຮູ້ຄວາມສາມາດ ທາງດ້ານວິຊາສະເພາະມີວິໄນ, ມີຈັນຍາບັນ ຈັນຍາທຳຕໍ່ໜ້າທີ່ວຽກງານຂອງຕົນ, ຕີຖອຍປະກົດການຫຍໍ້ທໍ້ຕ່າງໆໃນຂະແໜງການເງິນ, ພ້ອມທັງເອົາໃຈໃສ່ຕິດຕາມກວດການວຽກງານກໍຄືການປະຕິບັດໜ້າທີ່ໃນຂົງເຂດວຽກງານທີ່ຕົນຮັບຜິດຊອບໃຫ້ເປັນປະຈຳ ແລະ ເປັນປົກກະຕິ. ທັງນີ້, ກໍ່ເພື່ອໃຫ້ການຈັດຕັ້ງປະຕິບັດວຽກງານຢ່າງມີປະສິດທິພາບຂຶ້ນເປັນກ້າວໆ.
