ຍີ່ປຸ່ນມອບທຶນຊ່ວຍເຫລືອຍົກລະດັບໂຮງຮຽນມັດທະຍົມຕົ້ນປາງທອງນາໝໍເປັນມັດທະຍົມສົມບູນ

ພິທີມອບ-ຮັບທຶນຊ່ວຍເຫລືອລ້າຈຳນວນ 86.900 ໂດລາສະຫະລັດຈາກລັດຖະບານ ຍີ່ປຸ່ນເພື່ອສະໜັບ ສະໜູນໂຄງການກໍ່ສ້າງ ແລະ ຍົກລະດັບໂຮງຮຽນມັດທະຍົມຕົ້ນປາງທອງ ເມືອງນາໝໍ ແຂວງອຸດົມໄຊ ເປັນໂຮງຮຽນ ມັດທະຍົມສົມບູນໄດ້ມີຂຶ້ນໃນວັນທີ 11 ເມສານີ້, ລະຫວ່າງທ່ານ  ໃຈເພັດ ຄຳມະລີ ເຈົ້າເມືອງນາໝໍ  ແລະ ທ່ານ ທາເຄຊິ ຣີຄິຮາຣະ ເອກອັກຄະລາຊະທູດຍີ່ປຸ່ນປະຈຳລາວ, ພາຍໃຕ້ໂຄງການເສີມສ້າງຄວາມໝັ້ນ ຄົງຂອງມະນຸດຂັ້ນຮາກຖານ (GGPS).

ໂຄງການຍົກລະດັບດັ່ງກ່າວແມ່ນຈະສ້າງອາຄານຮຽນຫລັງໃໝ່ຕື່ມອີກໜຶ່ງຫລັງມີ 5  ຫ້ອງຮຽນ ແລະ ສິ່ງອຳນວຍ ຄວາມສະດວກຕ່າງໆ ເພື່ອສາມາດຮອງຮັບຈຳນວນນັກຮຽນທີ່ມີຈຳນວນເພີ່ມຂຶ້ນ.

ໃນວັນທີ 10 ເມສານີ້, ໄດ້ມີພິທີມອບຮັບໂຄງການນ້ຳລິນຢູ່ບ້ານຫວັງຂຸນ ເມືອງໄຊ ແຂວງອຸດົມໄຊ, ໂດຍໄດ້ຮັບທຶນ ຊ່ວຍເຫລືອລ້າຈາກລັດຖະບານຍີ່ປຸ່ນເຊັ່ນກັນໃນມູນຄ່າຫລາຍກວ່າ 11.300 ໂດລາສະຫະລັດ,  ເພື່ອສາມາດ ຕອບສະໜອງນ້ຳສະອາດໃຫ້ແກ່ຊາວບ້ານ ດັ່ງກ່າວ ໄດ້ພຽງພໍຕາມຄວາມຕ້ອງການ.

ນັບແຕ່ປີ 1989 ເປັນຕົ້ນມາ, ລັດຖະບານຍີ່ປຸ່ນໄດ້ໃຫ້ທຶນ  ຊ່ວຍເຫລືອຂະແໜງສຶກສາທິການ ແລະ ສາທາ ລະນະສຸກໃຫ້ແກ່ລາວທັງໝົດ 503 ໂຄງການ, ໃນນັ້ນສະເພາະຂະແໜງສຶກສາມີ 282 ໂຄງການ ແລະ ໃນນັ້ນໄດ້ ຊ່ວຍສ້າງໂຮງຮຽນປະຖົມ 171 ແຫ່ງ, ສຳລັບຂະ ແໜງສາທາລະນະສຸກມີ 137  ໂຄງການ.