ທໍາລາຍລະເບີດຕົກຄ້າງທີ່ເກັບກູ້ໄດ້ຕາມແລວທາງລົດໄຟລາວ-ຈີນ

ໃນວັນທີ 13-14 ກຸມພານີ້, ທ່ານພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ພ້ອມຄະນະ, ໄດ້ລົງໄປຕິດຕາມການທໍາລາຍລະເບີດທີ່ຕົກຄ້າງໃນປາງສົງຄາມທີ່ກວດກູ້ໄດ້ຕາມແລວທາງໂຄງການກໍ່ສ້າງເສັ້ນທາງລົດໄຟລາວ-ຈີນແຕ່ບໍ່ເຕ່ນເຖິງນະຄອນຫລວງວຽງຈັນ, ໂດຍໄດ້ປະຕິບັດສໍາເລັດແລ້ວກວ່າ 40% ແລະ ສາມາດກວດກູ້ລະເບີດບໍ່ທັນແຕກໄດ້ຈໍານວນ 128 ໜ່ວຍ, ໃນເນື້ອທີ່ 1.026 ກວ່າເຮັກຕາ ແລະ ການທໍາລາຍລະເບີດດັ່ງກ່າວໄດ້ຈັດຂຶ້ນຢູ່ 2 ຈຸດຄື: ແຂວງຫລວງພະບາງ ແລະ ແຂວງວຽງຈັນ.

ຫົວໜ້າສູນບັນຊາເກັບກູ້ ແລະ ທໍາລາຍລະເບີດໂຄງການກໍ່ສ້າງເສັ້ນທາງລົດໄຟລາວ-ຈີນ ໃຫ້ຮູ້ວ່າ: ມາຮອດປັດຈຸບັນ, ການກວດກູ້ລະເບີດຕາມແລວທາງລົດໄຟແມ່ນສໍາເລັດແລ້ວ 70 ກວ່າກິໂລແມັດ, ໃນນັ້ນໄດ້ຮັບການກວດກາຢັ້ງຢືນຄຸນນະພາບໄດ້ 44 ກວ່າກິໂລແມັດ ປະກອບມີເນື້ອທີ່ສ້າງສະຖານນີ 1 ແຫ່ງ (ສະຖານີວັງວຽງ), ພື້ນທີ່ສ້າງປາກອຸໂມງ 5 ແຫ່ງ ແລະ ທາງຊອຍ 51 ກວ່າກິໂລແມັດ, ລວມເນື້ອທີ່ 165 ກວ່າເຮັກຕາ, ພົບເຫັນລະເບີດ 110 ໜ່ວຍ, ຊີ້ນສ່ວນລະເບີດ ແລະ ໂລຫະຕ່າງໆຫລາຍກວ່າ 109.100 ອັນ ແລະ ຄາດວ່າການກວດກູ້ຈະໃຫ້ສໍາເລັດໃນປີ 2019 ໃນໄລຍະທີ V.