ນາຍົກອັງກິດປະກາດເລືອກຕັ້ງ 8 ມິຖຸນານີ້
ລອນດອນ 18 ເມສາ: ນາຍົກລັດຖະມົນຕີ ນາງ ເທເຣຊາ ເມ ຂອງອັງກິດ ປະກາດຈັດການເລືອກຕັ້ງກ່ອນກຳນົດໃນວັນທີ 8 ມິຖຸນານີ້ ເນື່ອງຈາກລັດຖະບານມີແຜນຈະແຈ້ງແລ້ວໃນການເຈລະຈາເງື່ອນໄຂການອອກຈາກສະຫະພາບເອີຣົບ ແລະ ຕ້ອງການໃຫ້ອັງກິດມີເອກະພາບທາງການເມືອງ.
ທ່ານນາງ ເທເຣຊາ ເມ ຖະແຫລງຢູ່ນະຄອນຫລວງລອນດອນ ເວລາປະມານ 11:00 ໂມງວັນທີ 18 ເມສານີ້ ຕາມເວລາທ້ອງຖິ່ນວ່າ: ຫາກໍສຳເລັດກອງປະຊຸມຄະນະລັດຖະບານ, ກອງປະຊຸມເຫັນພ້ອມວ່າລັດຖະບານຄວນຈັດການເລືອກຕັ້ງກ່ອນກຳນົດໃນວັນທີ 8 ມິຖຸນາ ຈາກທີ່ຕ້ອງຈັດຂຶ້ນໃນປີ 2020 ເພາະອັງກິດຕ້ອງມີລັດຖະບານທີ່ມີຄວາມແນ່ນອນ, ມີສະຖຽນລະພາບ ແລະ ມີຄວາມແຂງແຮງ ຫລັງອອກຈາກ EU. ປັດຈຸບັນນີ້ຄົນໃນປະເທດພວມຮ່ວມມືຮ່ວມໃຈກັນ, ແຕ່ລັດຖະສະພາພັດແຕກແຍກ ເຊິ່ງຈະກະທົບຕໍ່ຜົນສຳເລັດຂອງການອອກຈາກ EU. ລັດຖະບານໄດ້ຂໍໃຫ້ສະພາສາມັນ ເຊິ່ງເປັນສະພາຜູ້ແທນລາຊະດອນລົງມະຕິໃນວັນທີ 19 ເມສານີ້ ຕໍ່ຂ້ໍສະເໜີວັນເລືອກຕັ້ງກ່ອນກຳນົດດັ່ງກ່າວ. ນາຍົກລັດຖະມົນຕີ ເມ ເປີດເຜີຍອີກວ່າ: ສາເຫດທີ່ປ່ຽນໃຈໃຫ້ຈັດການເລືອກຕັ້ງກ່ອນກຳນົດ ເພາະໄດ້ຂ້ໍສະຫລຸບແລ້ວວ່າ: ຫົນທາງດຽວທີ່ຈະຮັບປະກັນຄວາມແນ່ນອນ ແລະ ຄວາມໝັ້ນຄົງໃຫ້ແກ່ອັງກິດໃນໄລຍະຫລາຍປີຕໍ່ໜ້າຄືການຈັດການເລືອກຕັ້ງ.
ກ່ອນໜ້ານີ້ແກນນຳສະຫະພາບເອີຣົບ (EU) ຄາດວ່າ: ທ່ານນາງ ເມ ຈະຈັດກອງປະຊຸມໃນວັນທີ 29 ເມສາ ເພື່ອໃຫ້ຜູ້ນຳສະມາຊິກ EU ເຫັນພ້ອມຍຸດທະສາດຂອງອັງກິດໃນການເຈລະຈາອອກຈາກ EU ທີ່ຄາດວ່າຈະເລີ່ມຂຶ້ນໃນເດືອນພຶດສະພາ ຫລື ມິຖຸນາ. ຄະນະກຳມາທິການເອີຣົບ ເຊິ່ງເປັນໜ່ວຍງານບໍລິຫານ EU ຕ້ອງການໃຫ້ສະຫລຸບການເຈລະຈາສຳເລັດພາຍໃນເດືອນຕຸລາ 2018 ກ່ອນອັງກິດຈະອອກຈາກ EU ໃນປີ 2019.
