ບັນດາປະເທດລະດົມທຶນໄດ້ 30.000 ລ້ານໂດລາ ເພື່ອຟື້ນຟູອີຮັກ
ກອງປະຊຸມລະຫວ່າງປະເທດວ່າດ້ວຍການຟື້ນຟູອີຣັກ ເຊິ່ງຈັດຂຶ້ນຢູ່ກູເວດ ສາມາດລະດົມທຶນໄດ້ 30.000 ລ້ານໂດລາສະຫະລັດ ໃນຮູບແບບຂອງສິນເຊື່ອດອກເບ້ຍຕໍ່າ ແລະ ການລົງທຶນ.
ສຳນັກຂ່າວຕ່າງປະເທດລາຍງານຈາກເມືອງບາຍັນ ປະເທດກູເວດ ໃນວັນທີ 15 ກຸມພາວ່າ: ທ່ານ ຊີກ ຊາບາ ອັລ-ຄາເຫລັດ ອັລ-ຊາບາ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດກູເວດ ກ່າວຕໍ່ກອງປະຊຸມນາໆຊາດວ່າດ້ວຍການຟື້ນຟູອີຣັກ ທີ່ເມືອງບາຍັນ ທາງຕອນກາງຂອງກູເວດ ໃນວັນທີ 14 ກຸມພາ ເຊິ່ງເປັນວັນສຸດທ້າຍຂອງກອງປະຊຸມທີ່ຈັດຂຶ້ນແຕ່ຕົ້ນອາທິດນີ້ວ່າ: ຕົວແທນຈາກລັດຖະບານ 76 ປະເທດ ແລະ ອົງການສາກົນອີກຫລາຍກວ່າ 50 ແຫ່ງ ທີ່ເຂົ້າຮ່ວມການຫາລືຄັ້ງນີ້ ລະດົມທຶນຮ່ວມກັນໄດ້ 30.000 ລ້ານໂດລາສະຫະລັດ ເພື່ອສະໜັບສະໜູນການຟື້ນຟູອີຣັກໃນທຸກດ້ານ ທີ່ເສຍຫາຍຢ່າງໜັກຈາກສົງຄາມກວາດລ້າງກຸ່ມ IS ຕະຫລອດ 3 ປີຜ່ານມາ.
PM @HaiderAlAbadi addresses the International Conference for the Reconstruction of Iraq. Watch the highlights here #InvestIraq pic.twitter.com/Szt86eIBLW
— Government of Iraq – الحكومة العراقية (@IraqiGovt) February 14, 2018
ທັງນີ້, ຕວກກີອະນຸມັດການຊ່ວຍເຫລືອທັງໃນຮູບແບບການລົງທຶນ ແລະ ເງິນກູ້ດອກເບ້ຍຕໍ່າ 5.000 ລ້ານໂດລາສະຫະລັດ, ກູເວດ 2.000 ລ້ານໂດລາສະຫະລັດ, ອາຣັບບີ ຊາອຸດິດ 1.500 ລ້ານໂດລາສະຫະລັດ, ກາຕາ 1.000 ລ້ານໂດລາສະຫະລັດ ແລະ ສະຫະນະຄອນ ເອເມຣັດ ອາຣັບ (UAE) 500 ລ້ານໂດລາສະຫະລັດ, ສ່ວນທ່ານ ເຣັກ ທິລເລີສັນ ລັດຖະມົນຕີກະຊວງການຕ່າງປະເທດອາເມລິກາ ກ່າວວ່າ: ລັດຖະບານວໍຊິງຕັນມອບການຊ່ວຍເຫລືອຜ່ານທະນາຄານເພື່ອການສົ່ງອອກ ແລະ ນຳເຂົ້າ ໃນວົງເງິນ 3.000 ລ້ານໂດລາສະຫະລັດ.
