ທ່ຽວລ່ອງນ້ຳງື່ມມີຫລາຍຢ່າງທີ່ປະທັບໃຈ

ນ້ຳງື່ມເປັນສ່ວນໜຶ່ງ ຂອງ ສາຂາແມ່ນ້ຳຂອງ,ເຊິ່ງມີຄວາມ ຍາວ 350 ກິໂລແມັດ, ເລີ່ມມາ ແຕ່ແຂວງວຽງຈັນ ໄຫລຜ່ານ ລົງມາ ນະຄອນຫລວງວຽງຈັນ ແລ້ວອອກສູ່ແມ່ນນ້ຳຂອງ, ມັນມີຜົນປະໂຫຍດຢ່າງຫລວງ ຫລາຍຕໍ່ການດໍາລົງຊີວິດຂອງປະຊາຊົນທີ່ອາໄສໃນເຂດດັ່ງກ່າວ, ໂດຍສະເພາະການຊົມ ໃຊ້ໃນຊີວິດປະຈຳວັນ, ການ ປູກຝັງລ້ຽງສັດ ແລະ ອື່ນໆ, ພ້ອມເປັນແຫລ່ງທ່ອງທ່ຽວ ທີ່ສຳຄັນຂອງປະເທດ, ພິເສດ ພາຍຫລັງເປີດປີທ່ອງທ່ຽວ ລາວ 2018 ຂຶ້ນ, ນະຄອນ ຫລວງ ວຽງຈັນ ກໍເລີ່ມຈັດ ກິດຈະກຳສົ່ງເສີມການທ່ອງ ທ່ຽວເຂດນີ້ຢ່າງຫລາຍສີສັນ, ໂດຍສະເພາະແມ່ນການທ່ອງ ທ່ຽວລ່ອງນ້ຳງື່ມ, ເຊິ່ງເມື່ອບໍ່ ດົນມານີ້, ຄະນະນຳນະຄອນ ຫລວງວຽງຈັນ ໄດ້ມີການຈັດ ກິດຈະກຳເດີນທາງສຳຫລວດ ແຫລ່ງທ່ອງທ່ຽວດັ່ງກ່າວ, ເພື່ອ ແນໃສ່ກະຕຸ້ນການທ່ອງທ່ຽວລາວໃຫ້ມີບັນຍາກາດຟົດຟຶ້ນ.

+ ເຊີນທ່ຽວຊົມ-ນະມັດສະການພະທາດສີໂຄດຕະບອງ

+ ທ່ຽວຖ້ຳນ້ຳແອງທີ່ ແຂວງຫລວງນ້ຳທາ

ກິດຈະກຳການເດີນທາງ ສຳຫລວດແມ່ນໄດ້ເລີ່ມຈາກ ຈຸດບ້ານ ນ້ຳກ້ຽງ ດ້ວຍການ ລ່ອງເຮືອລົງຕາມລຳນ້ຳງື່ມ ຫາບ້ານເວີນແທ່ນ ໄລຍະທາງ ປະມານ 30 ກິໂລແມັດ ຜ່ານ 22 ບ້ານໃນຂະນະນັ້ນ, ຄະນະ ເດີນສຳຫລວດໄດ້ທ່ຽວຊົມ ສວນໄຜ່ພັນກໍ, ຊົມທິວທັດ ທຳມະຊາດສອງຝັ່ງນ້ຳງື່ມ ແລະ ວິຖີການດຳລົງຊີວິດ ຂອງປະຊາຊົນຕາມລຳນ້ຳ ງື່ມ, ລວມໄປເຖິງວັດທະນະ ທຳອັນດີງາມ ແລະ ມູນເຊື້ອດຸ ໝັ່ນຂະຫຍັນພຽນເຮັດການ ຜະລິດປູກຝັງລ້ຽງສັດຢູ່ລຽບ ສອງຝັ່ງນ້ຳງື່ມ, ໃນໂອກາດ ນີ້ ຄະນະກໍໄດ້ພົບປະກັບອຳ ນາດການປົກຄອງບ້ານ ແລະ ປະຊາຊົນບ້ານ ເວີນແທ່ນ ເພື່ອຮັບຟັງລາຍງານ ສະພາບ ແລະ ຈຸດພິເສດຂອງ ບ້ານ ແລະ ໄດ້ຮັບຟັງການເລົ່າ ຄືນປະຫວັດຄວາມເປັນມາ ຂອງເວີນແທ່ນ(ແທ່ນນັ່ງ ຂອງພະພຸດທະຮູບພະສຸກ) ແລະ ເຂດປ່າສະຫງວນແຫລ່ງ ແກ່ນພັນໄມ້ພຶ້ນເມືອງ(ປ່າມະ ເຫສັກຫລັກເມືອງສັກສິດ) ເຊິ່ງ ມີເນື້ອທີ່ທັງໝົດປະມານ 32 ເຮັກຕາ.

ແມ່ນ້ຳງື່ມໄດ້ສົ່ງຄຸນຄ່າ ເຫລືອຫລາຍ ມີຄວາມງົດງາມ ທາງທຳມະຊາດ ເປັນແມ່ນ້ຳ ທີ່ໃສດີໄດ້ຫລໍ່ລ້ຽງຜູ້ຄົນ ແລະ ສັດສາວາສິ່ງນາໆຊະນິດ ຈົນນັບບໍ່ຖ້ວນ, ເພງທີ່ອຳມະຕະ “ເພງກ້ຽວສາວແຄມງື່ມ” ໄດ້ພັນລະນາເຖິງຄວາມງົດ ງາມດັ່ງກ່າວ, ຄາດວ່າໃນອະ ນາຄົດແມ່ນ້ຳງື່ມສາຍນີ້ຈະມີ ຄຸນປະໂຫຍດສູງຂຶ້ນຕື່ມອີກ, ຈາກການພັດທະນາມາ ເປັນ ແຫລ່ງທ່ອງທ່ຽວທາງທຳມະ ຊາດທີ່ງົດງາມ.