ມາສເຕີ ເຊັນສັນຍານັກກິລາກຽມຄວາມພ້ອມ ເຂົ້າຮ່ວມລາວພຣີເມຍລີກ 2018

ວັນທີ 12 ກຸມພາຜ່ານມານີ້ ທີ່ສະໜາມສູນກິລາ ມາສເຕີເຊເວັນ ໄດ້ມີພິທີເຊັນສັນຍາກັບນັກກິລາເພື່ອກຽມຄວາມພ້ອມເຂົ້າຮ່ວມການແຂ່ງຂັນບານເຕະລາວພຣີເມຍລີກ 2018 ທີ່ຈະຈັດຂຶ້ນທ້າຍເດືອນນີ້. ໃນພິທີເຊັນສັນຍານໍາໂດຍທ່ານ ໜູພອນ ພົມພະຈັນ ປະທານສະໂມສອນ ມາສເຕີ 7 ແລະ ທ່ານ ດາວິດ ຮອບຄອບ, ທ່ານ ບຸນຖະໜອມ ສີຫາລາດ ຜູ້ຈັດການທີມ ພ້ອມດ້ວຍຄະນະບໍລິຫານທີມເຂົ້າຮ່ວມ.

ທ່ານ ບຸນຖະໜອມ ສີຫາລາດ ກ່າວວ່າ: ການເຊັນສັນຍາຄັ້ງນີ້ ຖືວ່າມີຄວາມໜາຍສໍາຄັນຕໍ່ນັກກິລາ ແລະ ສະໂມສອນຂອງພວກເຮົາ ເພື່ອສືບຕໍ່ສານຝັນໃຫ້ແກ່ນັກກິລາທີ່ມີຄວາມຮັກມັກໃນດ້ານກິລາບານເຕະເຂົ້າສູ່ການເປັນນັກກິລາອາຊີບໃນອະນາຄົດ. ນອກຈາກນັ້ນ ຍັງກຽມຄວາມພ້ອມເຂົ້າຮ່ວມການແຂ່ງຂັນບານເຕະລາວພຣີເມຍລີກ 2018 ທີ່ຈະຈັດຂຶ້ນໃນວັນທີ 24 ກຸມພານີ້ ເຊິ່ງການເຊັນສັນຍາຄັ້ງນີ້ ພວກເຮົາໄດ້ດຶງນັກກິລາທີ່ມີປະສົບການເຂົ້າຮ່ວມສະໂມສອນຫລາຍພໍສົມຄວນ ເຊິ່ງປະກອບມີນັກກິລາຕ່າງປະເທດຈໍານວນ 7 ຄົນ ແລະ ນັກກິລາລາວຈໍານວນ 16 ຄົນ. ສໍາລັບນັກກິລາລາວປະກອບມີທ້າວ ແກ້ວວຽງເພັດ ລິດທິເດດ ເຊິ່ງເປັນນັກທີ່ໄດ້ສ້າງຜົນງານທີ່ປະທັບໃຈໄວ້ກັບແຟນບານຄົນລາວ ແລະ ແຟນບານຕ່າງປະເທດອີກດ້ວຍ. ນອກຈາກນັ້ນ ຍັງໄດ້ຮັບລາງວັນ ນັກເຕະດາວຮຸ່ງດີເດັ່ນ ໃນປີ 2012 ໃນລາຍການ AFF Suzuki Cup ອີກດ້ວຍ. ຂະນະທີ່ຜົນງານຜ່ານມາ ເຄີຍເຂົ້າຮ່ວມທີມຊາດຕັ້ງແຕ່ຮຸ່ນອາຍຸ 13 ປີ ຈົນເຖິງ ທີມຊາດຊຸດໃຫຍ່. ໃນປີ 2012-2015 ສັງກັດສະໂມສອນ ເອັສຣາ  ເອັຟຊີ, ປີ 2016 ສັງກັດສະໂມສອນ ລ້ານຊ້າງ ຢູໄນເຕັດ.

ສໍາລັບຕາຕະລາງການລົງສະໜາມນັດທຳອິດຂອງສະໂມສອນ ມາສເຕີ ເຊເວັນ ພົບກັບ ສະໂມສອນ ຊ້າງນ້ອຍ ເອັຟຊີ ທີ່ສະໜາມມະຫາວິທະຍາໄລແຫ່ງຊາດ (ມຊ) ໃນວັນທີ 25 ກຸມພານີ້ ເວລາ 17:00 ໂມງ.Bottom of Form