14 ວິທີເວົ້າຈາດີ ໃຫ້ລູກເຊື່ອຟັງ ແລະ ເຮັດຕາມ (ຕໍ່)
February 14, 2018 - 3:51 PM
- ບໍ່ບັງຂັບ: ການບັງຂັບຈະເຮັດໃຫ້ລູກບໍ່ໃຫ້ຄວາມຮ່ວມມືເຊັ່ນ: ສັ່ງລູກຕ້ອງເຮັດນັ້ນເຮັດນີ້ໃຫ້ສໍາເລັດ ປ່ຽນເປັນ ແມ່ຢາກໃຫ້ລູກເຮັດສິ່ງນັ້ນສິ່ງນີ້ ແບບນີ້ຈະໄດ້ຜົນກວ່າ
- ຝຶກສັງເກດທັດສະນະຄະຕິ ວິທີຄິດ ແລະ ການເວົ້າຈາຂອງລູກ ເພື່ອທີ່ຈະຕອບສະໜອງຕໍ່ຄວາມຕ້ອງການຂອງລູກໄດ້
- ໃຊ້ບິກຂຽນ ແທນຄໍາເວົ້າ: ລູກໄວຮຸ່ນບໍ່ຕ້ອງການໃຫ້ເວົ້າຊໍ້າໆ, ຢໍ້າຄິດຢໍ້າເຮັດ ການເວົ້າຊໍ້າໆ ສໍາລັບລູກໄວຮຸ່ນເປັນຄືກັບກາວຍົວະໃຫ້ໂມໂຫ ຫຼື ບໍ່ໄວ້ໃຈ ດັ່ງນັ້ນ ການຈົດບັນທຶກເຕືອນໃຈ ຈະເປັນວິທີທີ່ຊ່ວຍໃຫ້ລູກໄວຮຸ່ນໃຫ້ຄວາມຮ່ວມມືໄດ້ດີກວ່າການເວົ້າຢໍ້າໆ
- ຢ່າມີແຕ່ເວົ້າ ຈົ່ງເຮັດໃຫ້ລູກເບິ່ງເປັນຕົວຢ່າງ ເພາະເດັກນ້ອຍຮຽນຮູ້ຈາກການກະທໍາຫຼາຍກວ່າຄໍາເວົ້າ ເປັນຕົວຢ່າງທີ່ດີໃຫ້ແກ່ລູກ ເພື່ອໃຫ້ລູກຮຽນແບບ
- ເຕີມຖັງອາລົມຂອງລູກກ່ອນ: ກ່ອນຈະເວົ້າ ຫຼື ຊີ້ແນະໃຫ້ລູກ ຄວນກວດອາລົມຂອງລູກກ່ອນໃຫ້ແນ່ໃຈວ່າ ພ້ອມທີ່ຈະຟັງເຮົາ ຫຼື ບໍ່ ບໍ່ດັ່ງນັ້ນ ສິ່ງທີ່ຈະເວົ້າຈະບໍ່ເກີດປະໂຫຍດຫຍັງເລີຍ
- ໃຫ້ລູກຮຽນແບບ: ເດັກນ້ອຍຕ້ອງບອກຫຼາຍໆຄັ້ງ ຕ່າງຈາກໄວຮຸ່ນ ເດັກໄວ 3-6 ປີ ມັກການຮຽນແບບ ເມື່ອເວົ້າແລ້ວເຮັດໃຫ້ເບິ່ງ ແລະ ໃຫ້ລູກເຮັດຕາມເປັນກັບການຫຼິ້ນບົດບາດການສົມມຸດ
- ຝຶກໃຫ້ລູກຄິດເອງ ເຊັ່ນ: ການເກັບມ້ຽນສິ່ງຂອງແຕ່ລະຢ່າງໄວ້ໃຫ້ເປັນລະບຽບເປັນຕົ້ນ ໃຫ້ເດັກລອງຄິດສ້າງສັນ ແລະ ແກ້ບັນຫາດ້ວຍຕົນເອງ
- ເຮັດໃຫ້ລູກສະຫງົບ ເມື່ອລູກເວົ້າດັງ ຫຼື ໂວຍວາຍເຮົາຍິ່ງເວົ້າໃຫ້ເບົາລົງ ບາງຄັ້ງການເປັນຜູ້ຟັງທີ່ດີ ຈະຊ່ວຍຜ່ອນຄາຍຄວາມກັງວົນຂອງລູກ ໃຫ້ລູກຮູ້ວ່າເຮົາສົນໃຈ ແລະ ຢາກຊ່ວຍ ບອກລູກວ່າເຮົາເຂົ້າໃຈ ແລະ ມີຫຍັງທີ່ລູກຕ້ອງການໃຫ້ຊ່ວຍ ສິ່ງເຫຼົ່ານີ້ຈະເຮັດໃຫ້ລູກສະຫງົບລົງ ເມື່ອລູກໂມໂຫຢ່າໂມໂຫຕອບ ເພາະຈະເຮັດໃຫ້ເລື່ອງມັນບານປາຍ
- ໃຫ້ຕົວເລືອກທີ່ດີກັບລູກ
- ກ່ອນຊິເຮັດຫຍັງ ຫຼື ອອກໄປນອກບ້ານໃຫ້ບອກລູກລ່ວງໜ້າປະມານ 5 ນາທີ ໃຫ້ລູກມີເວລາເພື່ອບອກລາຂອງຫຼິ້ນທີ່ຫຼິ້ນຢູ່
- ເວົ້າໃຫ້ລູກຕື່ນເຕັ້ນເລົ້າໃຈ ວິທີນີ້ເປັນການເປີດໂລກສໍາລັບເດັັກນ້ອຍຂີ້ອາຍເຊັ່ນ: ມື້ນີ້ໄດ້ເຮັດຫຍັງຢູ່ທີ່ໂຮງຮຽນແດ່ ພໍ່ແມ່ປ່ຽນມາຖາມແບບນີ້ຈະດີກວ່າວ່າ: ເລົ່າໃຫ້ແມ່ ຫຼື ພໍ່ຟັງແດ່ ວ່າມື້ນີ້ມີຫຍັງມ່ວນທີ່ສຸດໃນໂຮງຮຽນ
- ເວົ້າເຖິງຄວາມຮູ້ສຶກຂອງເຮົາກັບລູກ
- ເວົ້າປິດປະເດັນເມື່ອລູກບໍ່ຍອມຟັງ ໂດຍໃຊ້ນໍ້າສຽງທີ່ໝັ້ນຄົງ ແລະ ຈິງຈັງ ໃຫ້ລູກຮູ້ວ່າຈໍາເປັນ ແລະ ເປັນສິ່ງທີ່ຕ້ອງເຮັດ
- ຮັກຢ່າງບໍ່ມີເງື່ອນໄຂ ແລະ ເວົ້າໃຫ້ກໍາລັງໃຈລູກສະເໝີເຊັ່ນ: ຢ່າເວົ້າກັບລູກວ່າ ລູກບໍ່ກິນເຂົ້າແມ່ຈະບໍ່ຮັກລູກ, ຖ້າລູກບໍ່ນອນໝາຊິມາກັດກົ້ນ ແລະ ອື່ນໆ ແລະ ຢ່າຕໍ່ລອງກັບລູກດ້ວຍຄໍາເວົ້າທີ່ບໍ່ມີເຫດຜົນ ແຕ່ເວົ້າດ້ວຍຄວາມຮັກຢ່າງບໍ່ມີເງື່ອນໄຂກັບລູກສະເໝີ
