ອາຫານດີທີ່ກິນຫລາຍເກີນໄປກໍບໍ່ດີ
February 14, 2018 - 12:56 PM
- ໝາກຫຸ່ງ : ໝາກໄມ້ດີມີປະໂຫຍດຫລວງຫລາຍ, ໄຂມັນ ແລະ ຄໍເລສເຕີໂຣນໜ້ອຍ ແລະ ຍັງດີຕໍ່ລະບົບຂັບຖ່າຍ ແລະ ເມື່ອ ລະບົບຂັບຖ່າຍດີຂຶ້ນ ພະຍາດຕ່າງໆທີ່ກ່ຽວຂ້ອງກັບລະບົບຍ່ອຍອາຫານນັ້ນກໍຍ່ອມຫລຸດຜ່ອນລົງໄປນຳ, ແຕ່ກໍຄວນກິນໃນປະລິ ມານທີ່ບໍ່ຫລາຍຈົນເກີນໄປ ເພາະໝາກຫຸ່ງອາດເຮັດໃຫ້ຜິວເຫລືອງຂຶ້ນໄດ້ ແລະ ນອກຈາກນີ້, ໝາກຫຸ່ງມີວິຕາມິນອາຫລາຍ ຖ້າກິນຫລາຍເກີນໄປຈະມີຄວາມສ່ຽງຕໍ່ກະດູກ ແລະ ຂໍ້ໍຕໍ່, ອາດມີອາການເບື່ອອາຫານ, ເຊື່ອງຊຶງ, ນອນບໍ່ຫລັບ, ກະວົນກະວາຍ, ຜົມຫລົ່ນ, ເຈັບຫົວ, ຖ່າຍຍາກ ເປັນຕົ້ນ.
- ໝາກກ້ຽງ : ຊ່ວຍໃຫ້ຜິວງາມ, ລະບົບຂັບຖ່າຍດີ ຍ້ອນໝາກກ້ຽງຖືເປັນໝາກໄມ້ປະເພດໜຶ່ງທີ່ມີວິຕາມິນເຊຫລາຍ ທັງ ເສີມສ້າງພູມຕ້ານທານໃຫ້ຮ່າງກາຍ, ປ້ອງກັນອະນຸມູນອິດສະລະຕໍ່ຕ້ານພະຍາດຫົວໃຈ, ຊ່ວຍໃຫ້ສຸຂະພາບເຫືອກແຂງແຮງ ທັງຍັງຫລຸດຜ່ອນອາການໄຂ້ຫວັດໄດ້, ແຕ່ການໄດ້ຮັບປະລິມານວິຕາມິນເຊຫລາຍເກີນໄປ ຫລາຍກ່ວາ 500 ມິນລີກຣາມຕໍ່ມື້ຕໍ່ເນື່ອງກັນເປັນໄລຍະເວລາດົນສາມາດເຮັດໃຫ້ເປັນໜິ້ວໃນໝາກໄຂ່ຫລັງໄດ້ ທັງການກິນວິຕາມິນເຊຫລາຍເກີນ 1.000 ມິນລີກຣາມ ຍັງອາດເຮັດໃຫ້ເກີດອາການຖອກທ້ອງ, ຫາກກິນຕອນທ້ອງວ່າງກໍຈະລະຄາຍເຄືອງທໍ່ອາຫານຈາກຄວາມເປັນກົດຂອງວິຕາມິນເຊ ທັງຍັງອາດເກີດອາການຍື່ງທ້ອງເຖິງຂັ້ນວິນຫົວປວດຮາກໄດ້ນຳ.
- ປາທູນ່າ : ໜຶ່ງໃນອາຫານທະເລມີໄຂມັນ ແລະ ຄໍເລສເຕີໂຣນໜ້ອຍ, ມີ DHA ເຊິ່ງມີປະໂຫຍດໂດຍກົງກັບສະໝອງ, ຊ່ວຍບຳລຸງແຊນສະໝອງ ແລະ ເສີມສ້າງຄວາມຈື່ຈຳ, ແຕ່ເຖິງວ່າປາທູນ່າຈະມີປະໂຫຍດຫລາຍ ແຕ່ສຳລັບແມ່ຍິງຖືພາ, ເດັກນ້ອຍ ແລະ ແມ່ລູກອ່ອນຄວນຫລີກເວັ້ນ ຫລື ກິນໜ້ອຍໆ ປະມານ 3 ບ່ວງ ເພື່ອປ້ອງກັນອັນຕະລາຍຈາກສານບາຫລອດ ເພາະປາທູນ່າມີສານບາຫລອດຢູ່ໃນຊີ້ນ ຖ້າກິນຫລາຍອາດເຮັດໃຫ້ມີບາຫລອດສະສົມຫລາຍເກີນໄປໃນຮ່າງກາຍ ເຮັດໃຫ້ເກີດຜົນຮ້າຍຕໍ່ລະບົບປະສາດ ເຊັ່ນ : ການຕາຍຂອງຊີ້ນສະໝອງບາງພາກສ່ວນ.
- ຜັກກະລໍ່າ : ປະໂຫຍດຂອງຜັກກະລໍ່າມີຫລາຍ, ແຕ່ຖ້າກິນດິບຫລາຍໆອາດເປັນບັນຫາກັບສຸຂະພາບໃນໄລຍະຍາວ. ແຕ່ຖ້າທ່ານກິນຜັກກະລໍ່າເປັນປະຈຳກໍຈະເພີ່ມປະສິດທິພາບຂອງຕັບໃຫ້ເຮັດວຽກດີຂຶ້ນ, ແຕ່ໃນຂະນະດຽວກັນ ໃນຜັກກະລໍ່າກໍມີສານ Goitrogen ຫລາຍ ເຊິ່ງສານນີ້ຈະໄປກັນບໍ່ໃຫ້ຕ່ອມໄທຣອຍຈັບໄອໂອດີນໄປສ້າງເປັນ Thyroscine ສົ່ງຜົນເຮັດໃຫ້ເກີດພະຍາດຄໍໜຽງ ຫລື ໄທຣອຍເປັນພິດໄດ້. ຫາກມັກກິນຜັກກະລໍ່າຄວນກິນສຸກໆຈະດີກ່ວາ ເພາະສານ Goitrogen ຈະຖືກທຳລາຍໄດ້ໂດຍຄວາມຮ້ອນ.
- ນຳ້ : ນຳ້ເປັນສິ່ງທີ່ຮ່າງກາຍຄົນເຮົາຂາດບໍ່ໄດ້ ແຕ່ການດື່ມນຳ້ຫລາຍເກີນມື້ລະ 6 – 7 ລິດ ຈະສ່ຽງເກີດອາການສະໝອງບວມຈົນເສຍຊີວິດໄດ້. ການດື່ມນຳ້ຫລາຍເກີນໄປຈະເຮັດໃຫ້ຮ່າງກາຍໄດ້ຮັບນຳ້ປະລິມານຫລາຍເກີນຈຳເປັນໃນເວລາອັນໄວວາ ເຮັດໃຫ້ເກີດອາການນຳ້ເກີນ ຫລື ນຳ້ເປັນພິດ ແລະ ນຳ້ຈະມີຜົນໃຫ້ທາດໂຊດຽມໃນເລືອດຫລຸດລົງຢ່າງໄວວາ ຮ່າງກາຍຈະຮັກສາຄວາມດຸ່ນດ່ຽງນຳ້ລະຫ່ວາງນອກແຊນ ແລະ ພາຍໃນແຊນບໍ່ໄດ້ ເຮັດໃຫ້ແຊນບວມ ແລະ ເຮັດໃຫ້ຊັອກ, ສະໝອງບວມ, ປອດບວມ, ໝົດສະຕິ ແລະ ເສຍຊີວິດໄດ້. ສະນັ້ນ, ດື່ມໃນປະລິມານທີ່ພໍດີຕາມປົກກະຕິມື້ລະ 6 – 8 ຈອກ ຫລື ປະມານ 2 ລິດກໍພຽງພໍຕໍ່ຄວາມຕ້ອງການຂອງຮ່າງກາຍແລ້ວ.
