ວູຊູລາວ ຝຶກຊ້ອມຢູ່ຈີນກຽມຄວາມພ້ອມ ເຂົ້າຮ່ວມແຂ່ງຂັນພາກພື້ນ
ສະຫະພັນກິລາວູຊູແຫ່ງຊາດລາວ ໄດ້ສົ່ງນັກກິລາທີມຊາດເຂົ້າຮ່ວມຝຶກຊ້ອມຢູ່ ສປ ຈີນ ເພື່ອກຽມຄວາມພ້ອມເຂົ້າຮ່ວມການແຂ່ງຂັນອາຊຽນເກມ ທີ່ປະເທດອິນໂດເນເຊຍ ທີ່ຈະຈັດຂຶ້ນກາງປີນີ້.
ທ່ານ ສີທາ ຈູຢາປະເສີດ ເລຂາສະຫະພັນກິລາວູຊູແຫ່ງຊາດລາວ ໄດ້ໃຫ້ສໍາພາດວ່າ: ປັດຈຸບັນສະຫະພັນພວກເຮົາໄດ້ສົ່ງນັກກິລາທີ່ເປັນເປົ້າໝາຍຫລັກເຂົ້າຮ່ວມຝຶກຊ້ອມທີ່ ສປ ຈີນ ຄືທ້າວ ຄໍາຫລ້າ ສຸຂະພອນ ນັກກິລາທີມຊາດ ທີ່ເຂົ້າຮ່ວມແຂ່ງຂັນຊີເກມທີ່ປະເທດ ມາເລເຊຍ ທີ່ຈັດຂຶ້ນໃນທ້າຍເດືອນກໍລະກົດ 2017, ພາຍຫລັງສໍາເລັດການເຂົ້າຮ່ວມແຂ່ງຂັນຊີເກມຄັ້ງທີ 29 ແລະ ການແຂ່ງຂັນລະດັບສະໂມສອນສະໝັກຫລິ້ນ ທີ່ແຂວງກວາງຊີ ສປ ຈີນ ຈັດຂຶ້ນລະຫວ່າງວັນທີ 10-13 ທັນວາ 2017 ຜ່ານມານີ້ ເຊິ່ງທີມຊາດລາວສາມາດຍາດໄດ້ 1 ຫລຽນຄໍາ ຈາກທ້າວ ເດດສະດາ ເຂົ້າຮ່ວມຮຸ່ນນໍ້າໜັກ 61 ກິໂລ, ສ່ວນທ້າວ ໜູຄິດ ແລະ ທ້າວ ຄໍາຫລ້າ ສຸຂະພອນ ເຂົ້າຮ່ວມຮຸ່ນນໍ້າໜັກ 65 ກິໂລ ສາມາດຍາດໄດ້ຫລຽນເງິນທັງສອງຮຸ່ນ. ດັ່ງນັ້ນ, ທາງສະຫະພັນຈຶ່ງສືບຕໍ່ສ້າງນັກກິລາໃຫ້ມີຄວາມຮູ້ຄວາມສາມາດ ແລະ ທັກສະໃນການຕໍ່ສູ້ໃຫ້ດີຂຶ້ນເລື້ອຍໆ ພ້ອມທັງສ້າງຜົນງານໂດດເດັ່ນໃນເວທີພາກພື້ນ ແລະ ສາກົນ. ສໍາລັບການສົ່ງນັກກິລາເຂົ້າຮ່ວມຝຶກຊ້ອມຄັ້ງນີ້ພວກເຮົາໄດ້ສົ່ງປະເພດຕໍ່ສູ້ ເຊິ່ງຈະໄດ້ດໍາເນີນການຝຶກຊ້ອມເປັນເວລາ 4 ເດືອນ, ຫລັງຈາກນັ້ນ ຈະໄດ້ສົ່ງນັກກິລາກັບຄືນຝຶກຊ້ອມຢູ່ ສປປ ລາວ ເປັນເວລາ 3 ເດືອນ ເພື່ອກຽມຄວາມພ້ອມເຂົ້າຮ່ວມແຂ່ງຂັນອາຊຽນເກມທີ່ປະເທດອິນໂດເນເຊຍ ທີ່ຈະຈັດຂຶ້ນໃນເດືອນສິງຫາ 2018 ນີ້.
ທ່ານ ສີທາ ຈູຢາປະເສີດ ຍັງກ່າວຕື່ມວ່າ: ເພື່ອເຮັດໃຫ້ນັກກິລາຂອງລາວ ສາມາດສ້າງຜົນງານໂດດເດັ່ນໃນລະດັບສາກົນແລ້ວ ທາງຄະນະບໍລິຫານສະຫະພັນຂອງພວກເຮົາຈຶ່ງພະຍາຍາມ ແລະ ຊອກຫາຄູຝຶກທີ່ມີຄວາມຮູ້ ແລະ ຄວາມສາມາດເຂົ້າມາຖ່າຍທອດໃຫ້ແກ່ນັກກິລາຂອງພວກເຮົາ ໂດຍຕັ້ງເປົ້າໄວ້ກ່ອນການເຂົ້າຮ່ວມແຂ່ງຂັນອາຊຽນເກມຄັ້ງນີ້, ທາງຄະນະສະຫະພັນຂອງພວກເຮົາຈະໄດ້ເອົາຄູຝຶກທີ່ມີປະສົບການ ແລະ ເປັນຕົ້ນສະບັບຂອງກິລາປະເພດນີ້ເຂົ້າມາສອນນັກກິລາຢູ່ ລາວໃຫ້ໄດ້ຫລາຍທີ່ສຸດ, ພ້ອມທັງເຄື່ອນໄຫວເຂົ້າຮ່ວມການແຂ່ງຂັນຂັນຕ່າງໆໃຫ້ຫລາຍຂຶ້ນກວ່າເກົ່າ ເພື່ອເກັບກ່ຽວປະສົບການໃຫ້ທຽບເທົ່າກັບນັກກິລາປະເທດພາກພື້ນ ແລະ ສາກົນ.
