ເປີດນໍາໃຊ້ຂົວມິດຕະພາບລາວ-ຍີ່ປຸ່ນ ທີ່ແຂວງເຊກອງ
ພິທີມອບ-ຮັບ ແລະ ເປີດນຳໃຊ້ຂົວມິດຕະພາບ ລາວ-ຍີ່ປຸ່ນ ທີ່ແຂວງເຊກອງ ໄດ້ມີຂຶ້ນໃນຕອນເຊົ້າວັນທີ 12 ກຸມພານີ້ ທີ່ຂົວດັ່ງກ່າວ ເພື່ອຂ້າມແມ່ນ້ຳເຊກອງ ໂດຍການເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານກວດກາສູນກາງພັກ, ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ, ທ່ານ ທາເຄຊິ ຣິຄີຮາຣະ ເອກອັກຄະລາຊະທູດຍີ່ປຸ່ນປະຈຳ ສປປ ລາວ, ຜູ້ຕາງໜ້າອົງການໄຈກ້າປະຈຳລາວ, ທ່ານລັດຖະມົນຕີກະຊວງໂຍທາທິການ ແລະ ຂົນສົ່ງ, ລັດຖະມົນຕີກະຊວງແຜນການ ແລະ ການລົງທຶນ, ປະທານກຳມາທິການເສດຖະກິດແຜນການ-ການເງິນ ແລະ ກວດສອບສະພາແຫ່ງຊາດ ພ້ອມດ້ວຍອຳນາດການປົກຄອງ ແລະ ມວນຊົນເຂົ້າຮ່ວມເປັນຈຳນວນຫລາຍ.
ໃນພິທີ, ຫົວໜ້າກົມຂົວທາງ ກະຊວງໂຍທາທິການ ແລະ ຂົນສົ່ງ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງຂົວມິດຕະພາບ ລາວ-ຍີ່ປຸ່ນ ທີ່ແຂວງເຊກອງເປັນໂຄງການບູລິມະສິດຂອງລັດຖະບານ, ໂຄງການກໍ່ສ້າງຂົວແຫ່ງນີ້ນອນຢູ່ໃນເສັ້ນທາງຫຼວງແຫ່ງຊາດເລກທີ 16B ເຊິ່ງມີຈຸດເລີ່ມຕົ້ນຈາກເທສະບານແຂວງເຊກອງຫາເມືອງດາກຈຶງ ຊາຍແດນ ລາວ-ຫວຽດນາມ ມີຄວາມຍາວ 116 ກມ ແລະ ສະເພາະຂົວຂ້າມນໍ້າເຊກອງມີຄວາມຍາວ 300 ແມັດ, ໄດ້ອອກແບບກໍ່ສ້າງຕາມມາດຕະຖານເຕັກນິກສາກົນ, ເປັນຂົວເບຕົງເສີມເຫຼັກອັດແຮງແບບປະສົມ ລະຫວ່າງສາຍກາບຖ່ວງດຶງ ສາມາດຮັບນໍ້າໜັກໄດ້ 80 ໂຕນ, ກວ້າງ 11 ແມັດ, ມີທາງຍ່າງເບື້ອງລະ 1,5 ແມັດ, ລະບົບໄຟເຍືອງທາງຄົບຊຸດ ເພື່ອຮັບປະກັນຄວາມປອດໄພໃນການສັນຈອນໄປມາ ໂດຍທຶນຊ່ວຍເຫຼືອຈາກອົງການໄຈກ້າຫລາຍກວ່າ 121 ຕື້ກີບ ໂດຍແມ່ນບໍລິສັດ ໄຕເຊະ ຈາກປະເທດຍີ່ປຸ່ນເປັນຜູ້ຮັບເໝົາກໍ່ສ້າງ ເປັນເວລາ 39 ເດືອນ ໂດຍໄດ້ຮັບການໃກ້ຊິດຈາກຄະນະພັກ, ອຳນາດການປົກຄອງ ຕະຫຼອດຮອດປະຊາຊົນທ້ອງຖິ່ນດັ່ງກ່າວ ເຮັດໃຫ້ການກໍ່ສ້າງສຳເລັດຜົນດ້ວຍຄຸນນະພາບສູງ.
ໃນໂອກາດນີ້, ທ່ານເອກອັກຄະລາຊະທູດຍີ່ປຸ່ນ ປະຈຳ ສປປ ລາວ ໄດ້ກ່າວມອບໂຄງການກໍ່ສ້າງຂົວມິດຕະພາບ ລາວ-ຍີ່ປຸ່ນ ແຂວງເຊກອງ ໃຫ້ກັບລັດຖະບານລາວ. ຈາກນັ້ນ ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ກ່າວຮັບ ແລະ ມອບຕໍ່ໃຫ້ແຂວງເຊກອງເປັນຜູ້ຄຸ້ມຄອງນຳໃຊ້ ແລະ ປົກປັກຮັກສາ ອັນຈະເປັນທ່າແຮງຊ່ວຍພັດທະນາເສດຖະກິດ-ສັງຄົມທ້ອງຖິ່ນດີຂຶ້ນ.
