ໂທລະພາບແຫ່ງຊາດຈະເພີ່ມລາຍການໃຫ້ຫລາກຫລາຍເພື່ອຕອບສະໜອງສັງຄົມ
ໃນປີ 2018 ນີ້ ໂທລະພາບແຫ່ງຊາດລາວ ຈະເລັ່ງຜະລິດລາຍການ ແລະ ຍົກສູງຄຸນນະພາບຂ່າວໃຫ້ຫລາກຫລາຍ, ເພື່ອຕອບສະໜອງຄວາມຕ້ອງການຂອງສັງຄົມ ແລະ ຜູ້ຊົມ ທີ່ນັບມື້ກວ້າງຂວາງ ແລະ ເພີ່ມຂຶ້ນກວ່າເກົ່າ. ດັ່ງທ່ານ ທອງວັນ ບຸນບົວທອງ ຮອງອຳນວຍການ ໂທລະພາບແຫ່ງຊາດລາວ ກ່າວໃນກອງປະຊຸມສະຫລຸບວຽກງານປະຈຳປີ ຂອງໂທລະພາບແຫ່ງຊາດ ໃນວັນທີ 12 ກຸມພາ ນີ້ວ່າ: ໃນອານາຄົດຂ້າງໜ້ານີ້, ໂທລະພາບແຫ່ງຊາດ ຈະເນັ້ນຫັນໄປສູ່ຄວາມທັນສະໄໝ, ກ້າວຈາກລະບົບອັນນາລ໋ອກ ສູ່ລະບົບດີຈິຕອນ, ແລະ ຈະເພີ່ມທະວີ ຍົກລະດັບຄວາມຮູ້ຄວາມສາມາດ ໃຫ້ພະນັກງານນັກຂ່າວສູງເດັ່ນຂຶ້ນ ພັດທະນາສື່ທາງລະບົບ ອິນເຕີເນັດ, ເກັບກຳຂ່າວ, ອອກຂ່າວ ຕາມທິດຊີ້ນຳ ຂອງຂັ້ນເທິງ ແຕ່ລະໄລຍະໃຫ້ວ່ອງໄວ, ຊັດເຈນ, ທັນເຫດການ ແລະ ເປັນຫລາຍພາສາ ກວ່າເກົ່າ, ປັບປຸງຫ້ອງອິນເຕີເນັດ ແລະ ເຊີເວີຂອງພາກສ່ວນຂ່າວ ປັບປຸງເນື້ອໃນ, ຮູບແບບ ລາຍການໃຫ້ມີຄຸນນະພາບ, ເປັນລາຍການ ທີ່ໜ້າເບິ່ງໜ້າຊົມ ແລະ ສ້າງໃຫ້ໄດ້ລາຍການ ບັນເທິງ ທີ່ສັງຄົມນິຍົມເບິ່ງ ຢ່າງໜ້ອຍໃຫ້ໄດ້ໜຶ່ງລາຍການເຊັ່ນ: ລາຍການເກມໂຊ, ລາຍການຖາມຕອບບັນຫາຕ່າງໆ, ລະຄອນຕະລົກ ແລະ ອື່ນໆ.
ຮອງອຳນວຍການໂທລະພາບແຫ່ງຊາດ ໃຫ້ຮູ້ວ່າ: ໃນໄລຍະ ໜຶ່ງປີຜ່ານມາ ຄະນະພັກ, ຄະນະອຳນວຍການ ໂທລະພາບ ແຫ່ງຊາດລາວ ໄດ້ເອົາໃຈໃສ່ຊີ້ນຳ ນຳພາ ທາງດ້ານການເມືອງແນວຄິດ ຕໍ່ຖັນແຖວ ສະມາຊິກພັກ, ພະນັກງານ-ລັດຖະກອນ ເປັນປະຈຳ ສາມາດ ເຮັດຫລ້ອນໜ້າທີ່ການເມືອງ ທີ່ຂັ້ນເທິງມອບໝາຍໃຫ້ສຳເລັດ ເປັນຕົ້ນ ແມ່ນການເຄື່ອນ ໄຫວວິຊາສະເພາະ ຂົງເຂດວຽກງານຂ່າວ ປະກອບມີ 6 ພະແນກ ຄື: ຂ່າວພາຍໃນ-ຕ່າງປະເທດ ແລະ ເວບໄຊ, ຂ່າວພາສາອັງກິດ, ຂ່າວພາສາຝຣັ່ງ, ຂ່າວພາສາຫວຽດນາມ, ຂ່າວພາສາມົ້ງ ແລະ ຂ່າວພາສາກຶມໝຸ ແລະ ສາມາດອອກຂ່າວ ທັງໝົດ 30.149 ເທື່ອຂ່າວ ຄື: ຂ່າວການເມືອງ 4.070 ຂ່າວ, ຂ່າວເສດຖະກິດ 1.920 ຂ່າວ, ຂ່າວ ວັດທະນະທຳ-ສັງຄົມ 3.146 ຂ່າວ, ຂ່າວກິລາ 2.025 ຂ່າວ, ຂ່າວທ້ອງຖິ່ນ 8.215 ຂ່າວ, ຂ່າວຕ່າງປະເທດ 7.660 ຂ່າວ, ຂ່າວຂຶ້ນເວບໄຊ 2.836 ຂ່າວ, ບົດລາຍງານຕ່າງໆ 605 ບົດ, ຜະລິດລາຍການ ຄົ້ນຫາມາເລົ່າ ໄດ້ 288 ຕອນ ແລະ ອອກຂ່າວ ພະຍາກອນອາກາດ ໄດ້ 120 ຄັ້ງ, ທຽບໃສ່ປີຜ່ານມາ ມີຈຳນວນເພີ່ມຂຶ້ນ. ນອກນີ້, ຍັງໄດ້ໂຄສະນາ ເຫດການຕ່າງໆ ສຳຄັນຂອງຊາດ ແລະ ສາກົນ ຕິດຕາມ ການອອກຂ່າວ ກ່ຽວກັບການເຄື່ອນໄຫວ ຂອງຜູ້ນຳ ພັກ-ລັດ ຢູ່ພາຍໃນປະເທດ ແລະ ຕ່າງປະເທດ, ວັນຊາດຄົບຮອບ 42 ປີ, ວັນສ້າງຕັ້ງ ພັກຄົບຮອບ 62 ປີ, ຮັບໃຊ້ ກອງປະຊຸມສະພາ ແລະ ບຸນປະເພນີສຳຄັນ ຂອງຊາດ ແລະ ອື່ນໆ ໄດ້ປັບປຸງເນື້ອໃນ, ຮູບແບບ ການຜະລິດລາຍການໃໝ່ ຈຳນວນໜຶ່ງ ໃນຂົງເຂດ ລາຍການ ທຊລ 1 ແລະ ທຊລ 3 ເພື່ອໃຫ້ມີ ເນື້ອຫາສາລະ ຖືກຕ້ອງຕາມການຊີ້ນຳ ຂອງຂັ້ນເທິງ, ພ້ອມດຽວກັນນີ້ ລາຍການ ທຊລ 1 ຍັງໄດ້ສືບຕໍ່ຮ່ວມມືກັບ 15 ແຂວງ ໃນການຜະລິດ ແລະ ສົ່ງລາຍການ ມາອອກອາກາດ ເຫັນວ່າ ຍັງມີທ່າເພີ່ມຂຶ້ນ ແລະ ໄດ້ຮ່ວມມືກັບ ບັນດາກະຊວງ ແລະ ອົງການຕ່າງໆ ສົ່ງລາຍການ ມາອອກອາກາດຢູ່ ຊທລ 1 ເຊັ່ນ: ລາຍການ ຂອງຊາວໜຸ່ມ, ແມ່ຍິງ, ກຳມະບານ, ກະສິກຳ, ສາທາລະນະສຸກ, ແນວລາວສ້າງຊາດ, ຕະຫລາດຫລັກຊັບ, ສຶກສາໃໝ່, ເພື່ອຄົນພິການ, ກໍ່ສ້າງພັກ ແລະ ອື່ນໆ. ປັດຈຸບັນ ທຊລ 1 ໄດ້ອອກອາກາດ 18 ຊົ່ວໂມງ/ມື້ ມີ 59 ລາຍການ ໃນນັ້ນລາຍການຜະລິດພາຍໃນມີ 29 ລາຍການ ແລະ ລາຍການຜະລິດ ພາຍນອກ 27 ລາຍການ , ສ່ວນ ທຊລ 3 ອອກອາກາດ 24 ຊົ່ວໂມງ/ມື້ ມີ 45 ລາຍການ, ໃນນັ້ນ ລາຍການ ຜະລິດລາຍການພາຍໃນ ມີ 25 ລາຍການ ແລະ ລາຍການຜະລິດພາຍນອກ 20 ລາຍການ.
