ບັນຫາຄວາມບົກພ່ອງໃນການຮຽນຮູ້ຂອງເດັກ

ເດັກທີ່ມີບັນຫາການຮຽນຮູ້ແມ່ນເດັກທິ່ມີຄວາມບົກພ່ອງໃນຂະບວນການສື່ສານ, ມັກຈະກ່ຽວຂ້ອງກັບຄວາມເຂົ້າໃຈໃນການ ເວົ້າ ແລະ ການຂຽນ ຫລື ເອີ້ນອີກຢ່າງໜຶ່ງວ່າ :  Learning Disability LD ສ່ວນຫລາຍເດັກມັກຈະມີບັນຫາດັ່ງຕໍ່ໄປນີ້ :

1. ເດັກຈະມີບັນຫາໃນດ້ານການອ່ານ, ການຂຽນ ແລະ ການຄິດຄຳນວນໂຕເລກ.
2. ເດັກຈະມີບັນຫາທາງດ້ານພາສາ ມັກຈະມີບັນຫາທາງດ້ານການເວົ້າ ແລະ ການໃຊ້ພາສາ.
3. ເດັກຈະມີຄວາມບົກພ່ອງໃນການຮັບຮູ້ ຄືການໃຊ້ປະສາດສຳຜັດເພື່ອຈ່ືຈຳ, ຈຳແນກ ຫລື ການແປຄວາມໝາຍສິ່ງຕ່າງໆ.
4. ເດັກຈະມີຄວາມເຄື່ອນໄຫວທີ່ຜິດປົກກະຕິ, ແບ່ງອອກໄດ້ 3 ແບບ ກໍຄື : ເຄື່ອນໄຫວຫລາຍກ່ວາປົກກະຕິ, ເຄື່ອນໄຫວໄດ້ ໜ້ອຍ ຫລື ຊ້າກ່ວາປົກກະຕິ ລວມໄປເຖິງບໍ່ສາມາດຄວບຄຸມການເຄື່ອນໄຫວຂອງກ້າມຊີ້ນໄດ້.
5. ມັກມີບັນຫາທາງສັງຄົມ ແລະ ອາລົມ ອາດເປັນການມີຄວາມຮູ້ສຶກທີ່ບໍ່ດີກັບໂຕເອງ, ບໍ່ອົດທົນ, ວິຕົກກັງວົນ, ຫົວແຂງຕໍ່ ຕ້ານສັງຄົມ, ເຮັດວຽກຊ້າ ແລະ ມີທັດສະນະຄະຕິທີ່ບໍ່ດີຕໍ່ຕົນເອງ ມັກບໍ່ມີໝູ່ຍ້ອນບໍ່ມີໃຜຢາກຄົບຫານຳ.
6. ເດັກຈະມີບັນຫາຄວາມຈື່ຈຳ, ບໍ່ວ່າຈະເປັນສິ່ງທີ່ໄດ້ຍິນ ຫລື ສິ່ງທີ່ເບິ່ງເຫັນ ຈຶ່ງເຮັດໃຫ້ມີບັນຫາທາງດ້ານການເຮັດ, ການອອກຄຳສັ່ງ, ການສະກົດຄຳ ແລະ ການຈື່ຈຳສັນຍະລັກທາງຄະນິດສາດ.
7. ເດັກຈະມີບັນຫາສະມາທິສັ້ນ, ມີຄວາມສົນໃຈໃນເລື່ອງໃດໆທີ່ມີໄລຍະສັ້ນ.

ການຊ່ວຍເຫລືອເດັກກຸ່ມທີ່ມີບັນຫາຄວາມບົກພ່ອງໃນການຮຽນຮູ້ແບບນີ້ຄວນຟ້າວພາໄປພົບແພດຊ່ຽວຊານສະເພາະທາງ ເພື່ອຊ່ວຍໃນການຟື້ນຟູສັກກະຍະພາບຂອງເດັກຂຶ້ນມາ ຍິ່ງພົບ ແລະ ພາໄປພັດທະນາສັກກະຍະພາບໄດ້ໄວຂຶ້ນເທົ່າໃດ ເດັກກໍຈະດີຂຶ້ນໄປໄວຫລາຍເທົ່ານັ້ນ, ການບຳບັດນັ້ນມີຫລາຍວິທີ, ການນຳເອົາດົນຕີ ແລະ ສິລະປະເຂົ້າມາຊ່ວຍກໍເປັນວິທີບຳບັດໄດ້ດີນຳ ສ່ວນຈະນຳມາໃຊ້ຫລາຍປານໃດກໍຂຶ້ນຢູ່ກັບແພດຜູ້ຊ່ຽວຊານສະເພາະທາງຈະເປັນຜູ້ແນະນຳ.