ເຈົ້າໜ້າທີ່ມອດໄຟນະຄອນຫລວງວຽງຈັນອອກແຈ້ງການໃຫ້ເພີ່ມທະວີປ້ອງກັນອັກຄີໄພໃນໄລຍະບຸນປີໃໝ່ ສສ.ຫວຽດນາມ ແລະ ສປ ຈີນ
ປັດຈຸບັນ, ສະພາບອາກາດໄດ້ເຂົ້າສູ່ໄລຍະແຫ້ງແລ້ງ, ເຊິ່ງອາດຈະເປັນເງື່ອນໄຂເຮັດໃຫ້ເກີດອັກຄີໄພໄດ້ງ່າຍ ແລະ ອີກບໍ່ເທົ່າໃດວັນກໍເປັນໄລຍະເທດສະການບຸນປີໃໝ່ຂອງພີ່ນ້ອງຊາວຈີນ ແລະ ຫວຽດນາມ, ສະນັ້ນເພື່ອສະກັດກັ້ນບັນຫາອັກຄີໄພດັ່ງກ່າວ ພະແນກສະກັດກັ້ນ ແລະ ມອດໄຟນະຄອນຫລວງວຽງຈັນ ຈຶ່ງໄດ້ມີແຈ້ງການໃຫ້ເພີ່ມທະວີປ້ອງກັນຄື: ສຳລັບເຮືອນຢູ່ອາໃສໃຫ້ຕິດຕັ້ງລະບົບໄຟຟ້າຖືກຕາມຫລັກການເຕັກນິກ, ຖ້າຫາກເຫັນວ່າອຸປະກອນໄຟຟ້າໃຊ້ງານມາດົນແລ້ວຕ້ອງປ່ຽນຖ່າຍໃຫ້ໄດ້ມາດຕະຖານ, ພ້ອມນັ້ນ ກໍໃຫ້ກະກຽມພາຫະນະ, ອຸປະກອນ ແລະ ເງື່ອນໄຂຕ່າງໆ ເພື່ອກຽມພ້ອມສະກັດກັ້ນອັກຄີໄພ, ສຳລັບບ້ານ ແລະ ເຂດຊຸມຊົນຕ້ອງຈັດຕັ້ງໜ່ວຍອາສາສະໝັກປ້ອງກັນອັກຄີໄພຂອງຕົນຂຶ້ນປະມານ 10 ຄົນ, ໂດຍໃຫ້ໝູນວຽນກັນປະຈຳການ ແລະ ໃຫ້ພະນັກງານເຫລົ່ານັ້ນໄປຮັບການຝຶກອົບຮົມຈາກເຈົ້າໜ້າທີ່ພະແນກຕຳຫລວດປ້ອງກັນ ແລະ ສະກັດກັ້ນອັກຄີໄພນະຄອນຫລວງ, ຫ້າມບໍ່ໃຫ້ຈູດຂີ້ເຫຍື້ອຕາມເຮືອນ, ແຄມທາງ, ສວນຄົວ ຫລື ວັດຖຸທີ່ເປັນທາດລະເບີດ, ທາດໄຟ, ຖ້າມີກໍລະນີດັ່ງກ່າວນີ້ຢູ່ໃສໃຫ້ຄົວເຮືອນທີ່ຢູ່ໃກ້ຄຽງ ແລະ ບ້ານຕ້ອງເປັນເຈົ້າການຮັບຜິດຊອບແກ້ໄຂໃຫ້ທັນການ, ໃຫ້ທຸກພາກສ່ວນທີ່ອາໃສຢູ່ໃນອາຄານສູງ, ເຮືອນໃຫຍ່, ຄຸ້ມບ້ານ, ເຂດຊຸມຊົນ ຫລື ຫົວໜ່ວຍຫລັງຄາເຮືອນໃຫ້ຈັດຫາ ແລະ ກໍ່ສ້າງອ່າງເກັບນ້ຳໄວ້ໃຕ້ດິນ 10.000-20.000 ແມັດກ້ອນໄວ້ຮອງຮັບອັກຄີໄພກັບທີ່ ແລະ ໃຫ້ຖືເປັນມາດຖານໃໝ່ໃນການປຸກສ້າງຕຶກອາຄານ, ສຳນັກງານຕ່າງໆໃນນະຄອນຫລວງວຽງຈັນຕໍ່ໄປ, ການໃຕ້ທູບທຽນບູຊາ ຕ້ອງຮັບປະກັນຄວາມປອດໄພ, ຮ້ານບູຊາຕ້ອງເຮັດດ້ວຍວັດຖຸທີ່ບໍ່ໄວໄຟ ຫ່າງໄກຈາກບ່ອນທີ່ມີເຊື້ອໄຟ, ທຸກໆຄັ້ງທີ່ມີການບູຊາ ຕ້ອງເອົາໃຈໃສ່ຕິດຕາມຈົນໄຟມອດລະອຽດແລ້ວຈຶ່ງອອກໄປທາງອື່ນ ແລະ ຫ້າມເອົານ້ຳມັນເຊື້ອໄຟມາໄວ້ໃນເຮືອນ ຫລື ຕັ້ງຂາຍແຄມທາງ ແລະ ນຳມາເກັບໄວ້ສຳນັກງານອົງການ, ໂຮງແຮມ, ບ້ານພັກ, ຕະຫລາດ, ຫ້າງຮ້ານຕ່າງໆ. ກໍລະນີທີ່ເຈົ້າໜ້າທີ່ກວດພົບເຫັນຈະໄດ້ຍຶດ ແລະ ປັບໃໝ ພ້ອມທັງດຳເນີນຄະດີຕາມລະບຽບກົດໝາຍ.
