ຊາວລາວສະຫລອງສົງການດ້ວຍບັນຍາກາດຟົດຟື້ນ

ການສະເຫລີມສະຫລອງບຸນປີໃໝ່ລາວ ພສ 2560 ແມ່ນເຕັມໄປດ້ວຍບັນຍາກາດເບີກບານມ່ວນຊື່ນ ແລະ ມີຄວາມຊຸມເຢັນກັນທົ່ວໜ້າ, ໂດຍປີນີ້ແມ່ນໄດ້ພັກຫລາຍວັນແຕ່ວັນທີ 13-17 ເມສາ, ຊຶ່ງເປັນໂອກາດດີໃຫ້ປະຊາຊົນເຮົາໄດ້ພ້ອມພາກັນສະຫລອງປີໃໝ່ຂອງຕົນຕາມຮີດຄອງປະເພນີ ແລະ ວັດທະນະທຳອັນດີງາມຂອງຊາດ, ບົນຈິດໃຈປະຢັດມັດທະຍັດ ແລະ ໄດ້ຖືເອົາໂອກາດນີ້ເປັນການໂຄສະນາເຜີຍແຜ່ຮີດຄອງປະເພນີ ແລະ ວັດທະນາທໍາອັນດີງາມຂອງຊາດຕິດພັນກັບການສົ່ງເສີມການທ່ອງທ່ຽວ, ສາມາດດຶງດູດນັກທ່ອງທ່ຽວເຂົ້າມາຢ້ຽມຢາມໃຫ້ນັບມື້ຫລາຍຂຶ້ນ.

ຄືດັ່ງຮູ້ນໍາກັນແລ້ວວ່າການສະເຫລີມສະຫລອງປີໃໝ່ລາວປີນີ້ແມ່ນມີບັນຍາກາດຟົດຟື້ນແຕ່ຫົວທີ, ໂດຍສະເພາະແຕ່ວັນທີ 11-12-13 ເມສາ ບັນດາອົງການຈັດຕັ້ງພັກ-ລັດ, ລັດວິສາຫະກິດ, ບໍລິສັດ, ຫ້າງຮ້ານ, ໂຮງຈັກ-ໂຮງງານຕ່າງໆກໍໄດ້ຈັດງານລ້ຽງສັງສັນສົ່ງທ້າຍປີເກົ່າ ພສ 2559 ແລະ ຕ້ອນຮັບປີໃໝ່ ພສ 2560 ຢ່າງມີຄວາມໝາຍ, ຖືເອົາໂອກາດທີ່ເປັນສີລິມຸງຄຸນນີ້ສະຫລຸບຜົນງານຂອງຕົນທີ່ຍາດມາໄດ້ໃນໄລຍະໜຶ່ງປີຜ່ານມາ, ສ່ວນໃນວັນທີ 14 ເມສາຊຶ່ງເປັນມື້ສັງຂານລ່ວງ, ນັບແຕ່ຕອນບ່າຍ ຊາວພຸດລາວໃນທົ່ວປະເທດຕ່າງກໍໄດ້ຈັດກິດຈະກຳສຳຄັນຕ່າງໆທາງພຸດທະສາສະໜາ ຄື: ຢູ່ຕາມວັດວາອາຣາມແຕ່ລະແຫ່ງຕ່າງໆ ກໍໄດ້ນຳເອົາພະພຸດທະຮູບລົງປະດິດສະຖານໄວ້ທີ່ຫໍສົງ ເພື່ອເປີດໂອກາດໃຫ້ຊາວພຸດທັງຫລາຍ ແລະ ປະຊາຊົນລາວບັນດາເຜົ່າໄດ້ເຂົ້າໄປຫົດສົງຕາມຮີດຄອງປະເພນີອັນດີງາມທີ່ມີມາແຕ່ດຶກດຳບັນ. ສະເພາະຢູ່ນະຄອນຫລວງວຽງຈັນກໍໄດ້ຈັດກິດຈະກຳແຫ່ພະພຸດທະຮູບມິ່ງບ້ານມິ່ງເມືອງ, ຂະບວນນາງສາວນະຄອນຫລວງວຽງຈັນ ພສ 2560 (ນາງສັງຂານທັງ 7 ທີ່ເປັນຕົວແທນໃຫ້ລູກສາວຂອງພະຍາກະບິນລະພົມ), ພ້ອມນັ້ນຍັງມີຂະບວນສິລະປະດົນຕີມະໂຫລີພື້ນເມືອງລາວ, ພ້ອມມວນຊົນຊາວນະຄອນຫລວງວຽງຈັນເຂົ້າຮ່ວມຢ່າງຫລວງຫລາຍ. ໂດຍຂະບວນດັ່ງກ່າວແມ່ນໄດ້ເລີ່ມຈາກວັດອິນແປງແຫ່ໄປຕາມຖະໜົນເສດຖາທິລາດໄປຫາສ່ວນນໍ້າຜຸແລ້ວລ້ຽວອອກໃສ່ເສັ້ນທາງຟ້າງຸ່ມຜ່ານສວນສາທາລະນະເຈົ້າອານຸວົງແລ້ວກັບຄືນຫາວັດອິນແປງ. ສ່ວນຢູ່ຫາດຊາຍແຄມຂອງກໍໄດ້ມີກິດຈະກຳຫລາຍຢ່າງດັ່ງປະເພນີຕົບພະຊາຍ, ເຊິ່ງໄດ້ຮັບຄວາມສົນໃຈຈາກນັກທ່ອງທ່ຽວ ແລະ ມວນຊົນເປັນຢ່າງດີ.

ສຳລັບວັນທີ 15-16 ເມສາ, ບັນຍາກາດການຫລີ້ນນໍ້າຫົດສົງຊຶ່ງກັນ ແລະ ກັນ ກໍດໍາເນີນໄປດ້ວຍບັນຍາກາດຟົດຟື້ນໄປຄຽງຄູ່ກັບການຈັດພິທີບາສີສູ່ຂວັນ, ສົມມາຜູ້ຊົງຄຸນວຸດທິ, ພໍ່ແມ່-ເຖົ້າແກ່ອາວຸໂສ ເພື່ອສະແດງຄວາມຮູ້ບຸນຄຸນກະຕັນຍູຕໍ່ຜູ້ມີພະຄຸນ ເພື່ອສົ່ງທ້າຍປີເກົ່າ ແລະ ຕ້ອນຮັບປີໃໝ່ບົນຈິດໃຈແຫ່ງຄວາມເບີກບານມ່ວນຊື່ນ, ຮັກສາໄດ້ຮີດຄອງປະເພນີທີ່ເປັນເອກກະລັກອັນດີງາມຂອງຊາດໃຫ້ຄົງຢູ່ຄູ່ຊາວພຸດເຮົາຕະຫລອດກາລະນານ.