ກະຊວງກະສິກຳ ແລະ ປ່າໄມ້ ແລະ FAO ຮ່ວມມືກັນໃນພັດທະນາຍຸດທະສາດການສື່ສານ
ໃນວັນທີ 8 ກຸມພານີ້, ກະຊວງກະສິກໍາ ແລະ ປ່າໄມ້ ແລະ ອົງການອາຫານ ແລະ ການກະເສດ (FAO) ໄດ້ຮ່ວມກັນຈັດກອງປະຊຸມຂຶ້ນເພື່ອແລກປ່ຽນບົດຮຽນ ແລະ ປະສົບການຕ່າງໆທີ່ກ່ຽວຂ້ອງກັບການຄຸ້ມຄອງ ແລະ ການເຂົ້າມີສ່ວນຮ່ວມໃນການແກ້ໄຂສະພາບແວດລ້ອມຂອງທົ່ງນາ, ເຕັກນິກການປູກເຂົ້າ ແລະ ສັດນໍ້າຢູ່ທົ່ງນາ. ບາດກ້າວຂອງການດໍາເນີນງານເຫລົ່ານີ້ເປັນສ່ວນໜຶ່ງຂອງແນວຄິດລິເລີ່ມການປູກເຂົ້າໃນລະດັບພາກພື້ນ (RRI). ເຊິ່ງໄດ້ຈັດຕັ້ງປະຕິບັດໂດຍອົງການ FAO ພາຍໃຕ້ການຮ່ວມມືກັບບັນດາກະຊວງຕ່າງໆທີ່ກ່ຽວຂ້ອງຢູ່ໃນ ສປປ ລາວ, ອິນໂດເນເຊຍ ແລະ ຟີລິບປິນມາຕັ້ງແຕ່ປີ 2014-2017.
ໂຄງການ RRI ຢູ່ ສປປ ລາວ ໄດ້ຖືກຈັດຕັ້ງປະຕິບັດ ແລະ ມີປະສົບການມາແລ້ວໃນການປູກເຂົ້າໃນເຂດທົ່ງພຽງ, ແນໃສ່ເພີ່ມທະວີຜົນກໍາໄລ ແລະ ຄວາມຍືນຍົງຂອງລະບົບຜະລິດກະສິກຳ. ປັດຈຸບັນເຫັນວ່າຍັງມີຄວາມຕ້ອງການນໍາໃຊ້ຄວາມຮູ້ທີ່ໄດ້ຮຽນມາ ໂດຍການສ້າງອຸປະກອນການສື່ສານອັນໃໝ່. ພ້ອມດຽວກັນ, ຍັງຕ້ອງໄດ້ທົບທວນຄືນຄວາມສອດຄ່ອງຂອງບັນດາອຸປະກອນສື່ສານທີ່ມີຢູ່ແລ້ວ ເພື່ອໃຫ້ເຂົ້າເຖິງກຸ່ມເປົ້າໝາຍຫລາຍຂຶ້ນກວ່າເກົ່າ.
ເປົ້າໝາຍແມ່ນເພື່ອພັດທະນາຍຸດທະສາດການສື່ສານທີ່ຈະເອື້ອອຳນວຍໃຫ້ອົງການຈັດຕັ້ງຂອງລັດຖະບານ ແລະ ອົງການ FAO ສາມາດສື່ສານບັນດາຫົວຂໍ້ຄວາມສຳຄັນໄປສູ່ກຸ່ມເປົ້າໝາຍໄດ້ ແລະ ຈະຊ່ວຍເຮັດໃຫ້ຄວາມມຸ້ງຫວັງດັ່ງກ່າວນີ້ປະສົບຜົນສຳເລັດຢູ່ໃນລະດັບຮາກຖານ ແລະ ເສີມຂະຫຍາຍໃຫ້ສາມາດປົກຄຸມພື້ນທີ່ການປູກເຂົ້າໃນທົ່ວປະເທດໄດ້.
