ຄະນະຜູ້ແທນສະພາແຫ່ງຊາດລາວສຳເລັດການເຂົ້າຮ່ວມກອງປະຊຸມສະມັດຊາສະຫະພັນລັດຖະສະພາສາກົນຄັ້ງທີ 136 ທີ່ດາກາ, ບັງກາລາເທດ
ໃນລະຫວ່າງວັນທີ 1-5 ເມສາຜ່ານມາ, ຄະນະຜູ້ແທນສະພາແຫ່ງຊາດລາວນຳໂດຍທ່ານ ພົທ. ແສງນວນ ໄຊຍະລາດ, ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ, ໄດ້ສຳເລັດການເຂົ້າຮ່ວມກອງປະຊຸມສະມັດຊາສະຫະພັນລັດຖະສະພາສາກົນຄັ້ງທີ 136 ທີ່ນະຄອນດາກາ, ປະເທດບັງກາລາເທດ.
ກອງປະຊຸມຄັ້ງນີ້
ມີຜູ້ແທນເຂົ້າຮ່ວມ 1.206 ທ່ານທີ່ມາຈາກ 126 ປະເທດສະມາຊິກ, ນອກນີ້ຍັງມີຜູ້ຕາງໜ້າຈາກລັດຖະສະພາປະຈຳພາກພື້ນຕ່າງໆ ທີ່ເປັນພາຄີ, ຜູ້ຕາງໜ້າຈາກອົງການສະຫະປະຊາຊາດ ແລະອົງການຈັດຕັ້ງສາກົນຕ່າງໆເຂົ້າຮ່ວມນໍາດ້ວຍ.
ກອງປະຊຸມໄດ້ອະພິປາຍ ແລະພິຈາລະນາ ຮັບຮອງເອົາຫລາຍບັນຫາສຳຄັນດັ່ງນີ້: 1. ຮັບ ຮອງເອົາຖະແຫຼງການດາກາພາຍໃຕ້ຫົວຂໍ້ໃຫຍ່: “ເບິ່ງຄືນບັນຫາຄວາມບໍ່ສະເໝີພາບ ເພື່ອຮັບປະ ກັນກຽດ ສັກສີ ແລະ ຄວາມຢູ່ດີກິນດີສຳຫລັບທຸກຄົນ” ໃນທຸກຮູບແບບ ແລະທຸກຂົງເຂດວຽກງານ ບໍ່ວ່າຈະເປັນທາງດ້ານການເມືອງ, ເສດຖະກິດ ແລະສັງຄົມ; 2. ໄດ້ພິຈາລະນາ ແລະລົງຄະແນນສຽງຮັບຮອງເອົາບັນຫາຮີບດ່ວນຂອງໂລກໃນປະຈຸບັນຄື ການປະຕິບັດງານສາກົນອັນຮີບດ່ວນ ເພື່ອຊ່ວຍເຫລືອປະຊາຊົນຫລາຍລ້ານຄົນ ທີ່ໄດ້ຮັບຜົນກະທົບຢ່າງໜັກໜວງຈາກໄພອຶດຫິວ ແລະໄພແຫ້ງແລ້ງໃນຫຼາຍຂົງເຂດຂອງທະວີບອັັັັບຟຣິກາ ແລະເຢເມນ; 3. ຮັບຮອງເອົາມະຕິຂອງກຳມາທິການປະຈໍາກ່ຽວກັບບັນຫາສັນຕິພາບ ແລະຄວາມໝັ້ນຄົງຂອງໂລກວ່າດ້ວຍບົດບາດຂອງລັດຖະສະພາ ໃນການປົກປ້ອງການແຊກແຊງຈາກພາຍນອກ ເຂົ້າໃນກິດຈະການ ພາຍໃນຂອງລັດທີ່ມີອະທິປະໄຕ; 4. ຮັບຮອງເອົາມະຕິຂອງກຳມາທິການປະຈຳກ່ຽວກັບການພັດທະນາແບບຍືນຍົງ, ການເງິນ, ການຄ້າວ່າດ້ວຍການສົ່ງເສີມ ແລະຮັດແໜ້ນການຮ່ວມມືສາກົນ ເພື່ອບັນລຸເປົ້າໝາຍການພັດທະນາແບບຍືນຍົງ (SDGs) ໂດຍສະເພາະ ແມ່ນໃຫ້ຄວາມສໍາຄັນຕໍ່ບົດບາດທາງການເງິນ ຂອງແມ່ຍິງ ເພື່ອໃຫ້ເປັນພະລັງຂັບເຄື່ອນການພັດທະນາໃນທູກດ້ານ.
ພ້ອມນີ້, ຍັງໄດ້ຮັບຮອງເອົາບັນດາຫົວຂໍ້ເນື້ອໃນຂອງກອງປະຊຸມ ກຳມາທິການປະຈຳຕ່າງໆ ຂອງສະຫະພັນລັດຖະສະພາສາກົນ ທີ່ຈະພິຈາລະນາໃນກອງປະຊຸມ ໄອພີຢູຄັ້ງຕໍ່ໄປ ຄື: ກໍາມາທິການກ່ຽວກັບບັນຫາສັນຕິພາບ ແລະຄວາມປໝັ້ນຄົງຂອງໂລກ: ການມີສັນຕິພາບທີ່ໝັ້ນຄົງເປັນພາຫະນະສຳຄັນໜຶ່ງໃນການບັນລຸເປົ້າໝາຍການພັດທະນາແບບຍືນຍົງ; ກໍາມາທິການກ່ຽວກັບບັນຫາການເງິນ ການຄ້າ ແລະການພັດທະນາແບບຍືນຍົງແມ່ນຈະເວົ້າເຖິງການມີສ່ວນຮ່ວມຂອງຂະແໜງການເອກະຊົນໃນການຈັດຕັ້ງປະຕິບັດ SDGs ໂດຍສະເພາະກ່ຽວກັບບັນຫາພະລັງງານທົດແທນ ແລະກຳມາທິການປະຈຳກ່ຽວກັບບັນຫາປະຊາທິປະໄຕ ແລະສິດທິມະນູດ ພາຍ ໃຕ້ຫົວຂໍ້: ແລກປ່ຽນຄວາມຫລາກຫລາຍຂອງພວກເຮົາ ໃນໂອກາດຄົບຮອບ 20 ປີ ຂອງຖະແຫລງການສາກົນ ກ່ຽວກັບປະຊາທິປະໄຕ.
ໃນຕອນທ້າຍກອງປະຊຸມ ຍັງໄດ້ຮັບຮອງເອົາສະພາດູມາແຫ່ງສະຫະພັນຣັດເຊຍ ໃຫ້ເປັນເຈົ້າ ພາບຈັດກອງປະຊຸມໄອພີຢູຄັ້ງທີ 137 ທີ່ ນະຄອນເຊັນ ປີເຕີສະເບີກ, ສະຫະພັນຣັດເຊຍ ໃນລະຫວ່າງວັນທີ 14-18 ຕຸລາ2017;
ໃນໂອກາດທີ່ເຂົ້າຮ່ວມກອງປະຊຸມຄັ້ງນີ້, ຫົວໜ້າຄະນະຜູ້ແທນລາວ ໄດ້ຂື້ນກ່າວຄຳເຫັນໃນວາລະອະພິປາຍທົ່ວໄປພາຍໃຕ້ຫົວຂໍ້ “ເບິ່ງຄືນບັນຫາຄວາມບໍ່ສະເໝີພາບ ເພື່ອຮັບປະກັນກຽດສັກສີ ແລະ ຄວາມຢູ່ດີກິນດີສຳຫລັບທຸກຄົນ” ເພື່ອສະແດງທັດສະນະ ແລະຄວາມມຸ້ງໝັ້ນຂອງສປປລາວ ກໍຄືສະພາແຫ່ງຊາດລາວ ຕໍ່ການສົ່ງເສີມຄວາມສະເໝີພາບ, ລຸດຜ່ອນຄວາມແຕກໂຕນກັນຂອງລະດັບການພັດ ທະນາລະຫວ່າງຊົນນະບົດ ແລະຕົວເມືອງ ແລະການຫັນເອົາເປົ້າໝາຍການພັດທະນະແບບຍືນຍົງເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8. ພ້ອມນີ້, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມປິ່ນອ້ອມຕ່າງໆ ເຊັ່ນ: ເວທີຜູ້ແທນສະພາເພດຍິງກອງປະຊຸມກຸ່ມລັດຖະສະພາອາຊຽນ+3, ກຸ່ມລັດຖະສະພາພູມີພາກອາຊີ-ປາຊີຟິກ, ກອງປະຊຸມລັດຖະສະພາອາຊີ, ເພື່ອປຶກສາຫາລື ແລະພິຈາລະນາບັນຫາສຳຄັນຕ່າງໆ ກ່ອນທີ່ຈະນຳເຂົ້າສະເໜີເພື່ອຮັບຮອງເອົາຢູ່ກອງປະຊຸມໃຫຍ່ໄອພີຢູຄັ້ງທີ 136. ນອກຈາກນີ້, ຄະນະຜູ້ແທນຍັງໄດ້ຍາດໂອກາດພົບປະໂອ້ລົມແລກປ່ຽນທັດສະນະ ແລະຄຳຄິດຕຳເຫັນຕໍ່ບັນຫາຕ່າງໆ ກັບຄະນະຜູ້ແທນຈາກປະເທດເພື່ອນມິດຈໍານວນໜຶ່ງ.
