ກຽມຈັດການແຂ່ງຂັນກະຕໍ້ ຊີງຂັນປະທານບໍລິສັດໄຊຍະຄູນ

ສະຫະພັນກິລາກະຕໍ້ແຫ່ງຊາດລາວຮ່ວມກັບບໍລິສັດໄຊຍະຄູນ ຈໍາກັດ ກຽມຈັດການແຂ່ງຂັນກະຕໍ້ທົ່ວໄປຊີງຂັນປະທານບໍລິສັດ ໄຊຍະຄູນ ໃນກາງເດືອນກຸມພາ 2018 ທີ່ສະໜາມກິລາໂນນຫວາຍ ເມືອງໄຊເສດຖາ ນະຄອນຫລວງວຽງຈັນ ເພື່ອສົ່ງເສີມນັກກິລາຫັນມາຫລິ້ນກິລາກະຕໍ້ໃຫ້ຫລາຍຂຶ້ນ ພ້ອມທັງເປັນການສະເຫລີມສະຫລອງວັນສໍາຄັນຂອງຊາດ, ສ້າງຂະບວນການສົ່ງເສີມປີທ່ອງທ່ຽວໃຫ້ມີຂະບວນຄຶກຄື້ນ.

ທ່ານນາງ ບຸນຫລາຍ ສີລິວັນ ຄະນະກໍາມະການຈັດການແຂ່ງຂັນ ໃຫ້ສໍາພາດວ່າ: ການແຂ່ງຂັນກະຕໍ້ຊີງຂັນປະທານບໍລິສັດໄຊຍະຄູນຈະໄດ້ຈັດຂຶ້ນລະຫວ່າງວັນທີ 17-18 ກຸມພາ 2018 ນີ້ ໂດຍມີສອງຮຸ່ນຄື: ຮຸ່ນທົ່ວໄປ ແລະ ຮຸ່ນປະສົມ. ການແຂ່ງຂັນຄັ້ງນີ້ນອກຈາກຈະສ້າງຂະບວນການເຄື່ອນໄຫວຂອງສະຫະພັນກະຕໍ້ພວກເຮົາແລ້ວ ຍັງເປັນການສ້າງຂະບວນການສະເຫລີມສະຫລອງວັນສໍາຄັນຂອງຊາດແລະ ສົ່ງເສີມໃຫ້ນັກຮຽນ-ນັກສຶກສາຫັນມາຫລິ້ນກິລາປະເພດນີ້ຫລາຍຂຶ້ນ. ນອກຈາກນັ້ນ, ທາງຄະນະກໍາມະການຂອງພວກເຮົາຍັງມີຫລາກຫລາຍກິດຈະກໍາ ເພື່ອໃຫ້ຜູ້ເຂົ້າຮ່ວມແຂ່ງຂັນໄດ້ມີການແລກປ່ຽນເຊິ່ງກັນ ແລະ ກັນ. ສ່ວນຮູບແບບການແຂ່ງຂັນແມ່ນຈະໄດ້ແບ່ງອອກເປັນສາຍເພື່ອຄັດເລືອກເອົາທີມທີ່ມີຄະແນນດີທີ່ສຸດເຂົ້າຊີງອັນດັບທີ 1, ຂະນະທີ່ການແຂ່ງຂັນຄັ້ງນີ້ກໍານົດໃຫ້ນັກກິລາທີມຊາດສາມາດລົງໄດ້ 1 ຄົນ ທັງນີ້ເພື່ອເປີດໂອກາດໃຫ້ນັກກິລາຮຸ່ນສືບທອດເຂົ້າມາສະແດງຄວາມສາມາດ ພ້ອມກ້າວສູ່ທີມຊາດໃນອະນາຄົດ.

ສໍາລັບລາງວັນອັນດັບທີ 1 ຈະໄດ້ຮັບຂັນລາງວັນ ພ້ອມດ້ວຍເງິນສົດ 500.000 ກີບ, ອັນດັບທີ 2 ຈະໄດ້ຮັບຂັນລາງວັນ ພ້ອມດ້ວຍເງິນສົດ 300.000 ກີບ, ອັນດັບທີ 3 ຈະໄດ້ຮັບຂັນລາງວັນ ພ້ອມດ້ວຍເງິນສົດ 200.000 ກີບ, ອັນດັບທີ 4 ຈະໄດ້ຮັບຂັນລາງວັນ ພ້ອມດ້ວຍເງິນສົດ 100.000 ກີບ.