ເປຕັງຊີງຮູບແຕ້ມຫົວໜ້າສະຖາບັນ ວິຈິດສິນລົງສະໜາມແຂ່ງຂັນມື້ນີ້

ສະຖາບັນວິຈິດສິນ ກຽມເປີດການແຂ່ງຂັນເປຕັງຊີງຮູບແຕ້ມ ຫົວໜ້າສະຖາບັນວິຈິດສິນໃນມື້ນີ້ ເພື່ອສ້າງຂະບວນການຕ້ອນຮັບກອງປະຊຸມຂະແໜງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວທົ່ວປະເທດ 2018 ທີ່ໃກ້ຈະມາເຖິງ ໃຫ້ມີຄວາມໝາຍສໍາຄັນ ແລະ ມີຂະບວນຟົດຟື້ນອ້ອມຂ້າງກະຊວງ ພ້ອມທັງສ້າງຂະບວນການຊົມເຊີຍວັນສ້າງຕັ້ງກໍາມະບານລາວຄົບຮອບ 62 ປີ ເຊິ່ງການແຂ່ງຂັນປະກອບມີ 2 ຮຸ່ນຄື: ຮຸ່ນທົ່ວໄປ ແລະ ຮຸ່ນອາວຸໂສ.

ໂດຍອີງຕາມການເຫັນດີຂອງຄະນະພັກ ແລະ ຫົວໜ້າສະຖາບັນວິຈິິດສິນແຫ່ງຊາດລາວ ໃນການຈັດແຂ່ງຂັນເປຕັງຊີງຮູບແຕ້ມຫົວໜ້າສະຖາບັນວິຈິດສິນແຫ່ງຊາດລາວ ຄັ້ງທີ 4 ຂຶ້ນໃນວັນທີ 9 ກຸມພາ 2018 ທີ່ສະຖາບັນວິຈິດສິນແຫ່ງຊາດລາວ ບ້ານໂພນປ່າເປົ້າ ເມືອງສີສັດຕະນາກ ນະຄອນຫລວງວຽງຈັນ ປະກອບມີສອງຮຸ່ນຄື: ຮຸ່ນທົ່ວໄປ (ຊາຍສອງ-ຍິງໜຶ່ງ) ໂດຍແມ່ນພະນັກງານທີ່ສັງກັດຢູ່ພາຍໃນກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ; ຮຸ່ນອາວຸໂສໂດຍເປີດທົ່ວໄປ. ການແຂ່ງຂັນຈະດໍາເນີນພຽງມື້ດຽວ ເຊິ່ງຈະເລີ່ມຂຶ້ນເວລາ 8:00 ໂມງເຊົ້າເປັນຕົ້ນໄປ. ສໍາລັບລາງວັນຮຸ່ນທົ່ວໄປ ອັນດັບທີ 1 ຈະໄດ້ຮັບຮູບແຕ້ມ 1 ແຜ່ນ ພ້ອມເງິນສົດ 1 ລ້ານກີບ, ອັນດັບທີ 2 ຈະໄດ້ຮັບຮູບແຕ້ມ 1 ແຜ່ນ ພ້ອມເງິນສົດ 7 ແສນກີບ, ອັນດັບທີ 3 ຈະໄດ້ຮັບຮູບແຕ້ມ 1 ແຜ່ນ ພ້ອມເງິນສົດ 5 ແສນ, ອັນດັບທີ 4 ຈະໄດ້ຮັບເງິນສົດ 3 ແສນກີບ; ຂະນະທີ່ລາງວັນຮຸ່ນອາວຸໂສ ອັນດັບທີ 1 ຈະໄດ້ຮັບຮູບແຕ້ມ 1 ແຜ່ນ ພ້ອມເງິນສົດ 7 ແສນກີບ, ອັນດັບທີ 2 ຈະໄດ້ຮັບຮູບແຕ້ມ 1 ແຜ່ນ ພ້ອມເງິນສົດ 5 ແສນກີບ, ອັນດັບທີ 3 ຈະໄດ້ຮັບຮູບແຕ້ມ 1 ແຜ່ນ ພ້ອມເງິນສົດ 3 ແສນກີບ, ອັນດັບທີ 4 ຈະໄດ້ຮັບເງິນສົດ 2 ແສນກີບ.