ລົດແກ້ວ ຫວັງຮັກສາມາດຖານຕິດ 1 ໃນ 5 ລາຍການທີ່ບູລີລຳທ້າຍອາທິດນີ້
ເປີດສາກປີ 2018 ສາວລົດແກ້ວ ອິນທະກຸມມານ ເຮັດໃຫ້ແຟນໆບໍ່ຜິດຫວັງ ດ້ວຍການຄວ້າອັນດັບ 5 ໃນລາຍການທຳອິດ ກ່ອນຈະພັດທະນາຂຶ້ນຄວ້າຮອງແຊ້ມ ໃນລາຍການໃຫຍ່ Amazing Thailand Marathon Bangkok ເມື່ອທ້າຍອາທິດຜ່ານມາ ແລະ ລາວຕັ້ງເປົ້າຕິດ 1 ໃນ 5 ສຳລັບລາຍການຕໍ່ໄປອາທິດນີ້ ເພື່ອຮັກສາມາດຕະຖານນີ້ຕໍ່ໄປ.
ລົດແກ້ວ ເປີດເຜີຍວ່າ: ທ້າຍອາທິດນີ້ ນ້ອງກຽມໄປແຂ່ງຂັນຢູ່ແຂວງບູລີລຳ ປະເທດໄທ ໃນລາຍການ Buriram International Marathon ທີ່ຈະຈັດຂຶ້ນໃນວັນທີ 11 ກຸມພານີ້ ເຊິ່ງປີນີ້ເປັນຄັ້ງທີ 2 ເປັນລາຍການທີ່ໃຫຍ່, ນ້ອງຈະແຂ່ງໃນລາຍການ 10 ກິໂລແມັດ ພ້ອມຕັ້ງຄວາມຫວັງຕິດ 1 ໃນ 5 ອັນດັບທຳອິດໃຫ້ໄດ້ ເພື່ອຫວັງຮັກສາມາດຕະຖານນີ້ໄວ້.
ສຳລັບ ລົດແກ້ວ ກາຍເປັນທີ່ຮູ້ຈັກໃນວົງການນັກແລ່ນລາວໃນປີ 2013 ເຂົ້າຮ່ວມແຂ່ງຂັນກິລາຊີເກມຄັ້ງທີ 27 ທີ່ປະເທດມຽນມາ ຍາດໄດ້ຫລຽນທອງຈາກລາຍການແລ່ນ 10.000 ແມັດ. ປີ 2014 ເຂົ້າຮ່ວມແຂ່ງຂັນກິລາເອຊຽນເກມ ທີ່ອິນຊອນ ສ.ເກົາຫລີ ແລະ ກິລາແຫ່ງຊາດ ຄັ້ງທີ 10 ທີ່ແຂວງອຸດົມໄຊ ຍາດໄດ້ 2 ຫລຽນຄຳ ຈາກລາຍການແລ່ນ 1.500 ແລະ 3.000 ແມັດ ພ້ອມເຂົ້າຮ່ວມແຂ່ງຂັນກິລາມະຫາວິທະຍາໄລອາຊຽນ ຄັ້ງທີ 17 ທີ່ປາແລມບັງ ປະເທດອິນໂດເນເຊຍ ຍາດໄດ້ 1 ຫລຽນຄຳ (10.000 ແມັດ), 1 ຫລຽນເງິນ (5.000 ແມັດ) ແລະ 1 ຫລຽນທອງ (1.500 ແມັດ). ໃນເດືອນກໍລະກົດ 2016 ເຂົ້າຮ່ວມງານກິລາມະຫາວິທະຍາໄລອາຊຽນ ຄັ້ງທີ 18 ຢູ່ສິງກະໂປ ຍາດໄດ້ 1 ຫລຽນຄຳ (800 ແມັດ) ແລະ 1 ຫລຽນເງິນ (5.000 ແມັດ) ແລະ ເຂົ້າຮ່ວມແຂ່ງຂັນກິລາມະຫາວິທະຍາໄລລາວ ຄັ້ງທີ 1 ທີ່ມະຫາວິທະຍາໄລແຫ່ງຊາດ ຍາດໄດ້ 2 ຫລຽນຄຳ ຈາກລາຍການແລ່ນ 800 ແລະ 3.000 ແມັດ. ຫລ້າສຸດ ສ້າງຄວາມພາກພູມໃຈໃຫ້ຊາວລາວທົ່ວປະເທດ ສາມາດຍາດໄດ້ຫລຽນທອງໃນລາຍການແລ່ນ 1.500 ແມັດ ໃນຊີເກມ 2017 ທີ່ມາເລເຊຍ ໃນເດືອນສິງຫາ.
