ສານອາຍາສາກົນເລີ່ມສອບສວນ ສົງຄາມຢາເສບຕິດໃນຟີລິບປິນ
ລັດຖະບານຟີລິບປິນເປີດເຜີຍວ່າ: ສານອາຍາສາກົນດຳເນີນການສອບສວນເບື້ອງຕົ້ນກ່ຽວກັບສະຖານະການສົງຄາມຢາເສບຕິດໃນປະເທດ ວ່າປະທານາທິບໍດີ ໂຣດຣິໂກ ດູເຕີເຕ ອາດມີສ່ວນກ່ຽວຂ້ອງ.
ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 8 ກຸມພາວ່າ: ທ່ານ ແຮຣີ ໂຣດ ໂຄສົກທຳນຽບມາລາກັນຍັງ ກ່າວໃນວັນທີ 8 ກຸມພາວ່າ: ສານອາຍາສາກົນ (ICC) ໃນນະຄອນຫລວງເຮັກ ເລີ່ມດຳເນີນການສອບສວນເບື້ອງຕົ້ນຕໍ່ການຮ້ອງຮຽນວ່າ: ປະທານາທິບໍດີ ໂຣດຣິໂກ ດູເຕີເຕ ສົມຮູ້ຮ່ວມຄິດກັບການເສຍຊີວິດຢ່າງຜິດກົດໝາຍຂອງປະຊາຊົນຫລາຍກວ່າ 4.000 ຄົນ ນັບແຕ່ເຈົ້າໜ້າທີ່ຝ່າຍຄວາມໝັ້ນຄົງຂອງຟີລິບປິນປະຕິບັດການສົງຄາມຢາເສບຕິດໃນກາງປີ 2016.
FULL STORY: ICC is set to do its initial review of allegations that President Duterte committed a crime against humanity in connection with his controversial war on drugs. https://t.co/SC9fA0KPvz
— GMA Integrated News (@gmanews) February 8, 2018
ເຖິງຢ່າງໃດກໍຕາມ, ICC ຍັງສະຫງວນທ່າທີຕໍ່ຄຳກ່າວຂອງໂຄສົກລັດຖະບານມະນິລາ ແລະ ຍັງບໍ່ມີການເຜີຍແຜ່ຖະແຫລງການກ່ຽວກັບເລື່ອງນີ້ຢ່າງເປັນທາງການ. ຂະນະທີ່ ທ່ານ ໂຣດ ກ່າວວ່າ: ສັດຕູຂອງລັດຢູ່ເບື້ອງຫລັງເລື່ອງນີ້ ແລະ ຝ່າຍກົດໝາຍຂອງລັດຖະບານຫາລືເລື່ອງດັ່ງກ່າວກັບທ່ານ ດູເຕີເຕ ແລ້ວ ເຊິ່ງຜູ້ນຳຟີລິບປິນກ່າວວ່າ: ICC ກຳລັງເຮັດສິ່ງທີ່ໄຮ້ປະໂຫຍດ ແລະ ທ່ານມີຄວາມພ້ອມຢ່າງເຕັມທີ່ໃນການຂຶ້ນສານຢູ່ນະຄອນຫລວງເຮັກ.
ທັງນີ້, ທ່ານ ດູເຕີເຕ ເຕືອນເລື່ອງການນຳຟີລິບປິນຖອນຕົວຈາກການເປັນລັດພາຄີຂອງລັດຖະທຳມະນູນນະຄອນຫລວງໂຣມ ເຊິ່ງເປັນສົນທິສັນຍາສາກົນທີ່ນຳໄປສູ່ການສະຖາປະນາ ICC ໃນປີ 2002.
