ໂຮງຮຽນພັນກວ່າແຫ່ງໃນແຂວງຫົວພັນຕ້ອງໂຈະການຮຽນຍ້ອນສະພາບອາກາດໜາວແຮງ.
ພະແນກສຶກສາທິການ ແລະ ກິລາແຂວງ ຫົວພັນ ໃຫ້ຮູ້ວ່າ: ຍ້ອນສະພາບອາກາດໜາວເຢັນແຮງໃນປັດຈຸບັນ, ເຮັດໃຫ້ໂຮງຮຽນສາຍສາມັນພັນກວ່າແຫ່ງ ຢູ່ເຂດພູດອຍຫ່າງໄກສອກຫລີກຕ້ອງໂຈະການຮຽນ-ການສອນຄື: ນັບແຕ່ວັນທີ 6-9 ກຸມພານີ້, ຊຶ່ງຄາດວ່າເວລາໃດອາກາດອົບອຸ່ນຂຶ້ນຈຶ່ງຈະເປີດຮຽນເປັນປົກກະຕິ ແລະ ຈະເພີ່ມຊົ່ວໂມງສອນຕື່ມເພື່ອທົດແທນໄລຍະພັກຮຽນດັ່ງກ່າວ.
ທ່ານຮອງຫົວໜ້າຫ້ອງການພະແນກສຶກສາທິການ ແລະ ກິລາ ແຂວງດັ່ງກ່າວ ໃຫ້ຮູ້ວ່າ: ສະພາບອາກາດໜາວເຢັນແຮງຢູ່ແຂວງຂອງຕົນໄດ້ເລີ່ມມາແຕ່ເດືອນພະຈິກຜ່ານມາ ແລະ ຮ້າຍແຮງກວ່າທຸກປີຜ່ານມາຈົນເກີດມີນ້ຳກ້ອນ, ນ້ຳແຂງ, ສົ່ງຜົນກະທົບຕໍ່ການຮຽນການສອນ, ໂດຍສະເພາະແມ່ນນັກຮຽນເຂດຫ່າງໄກສອກຫລີກທີ່ຕ້ອງເດີນທາງໄປໂຮງຮຽນໄກ ແລະ ຄູກໍບໍ່ສາມາດຂຶ້ນຫ້ອງສອນໄດ້ເພາະຄວາມໜາວເຢັນຫລາຍ, ຈາກນັ້ນທາງພະແນກສຶກສາຈຶ່ງໄດ້ອອກແຈ້ງການໃຫ້ພັກການຮຽນຊົ່ວຄາວ 4 ວັນ ແລະ ລໍຖ້າໃຫ້ອຸນຫະພູມອຸ່ນຂຶ້ນຈຶ່ງຈະເປີດສອນເປັນປົກກະຕິ.
ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ໃນໄລຍະວັນທີ 5-8 ກຸມພານີ້, ຄວາມກົດດັນສູງຂອງອາກາດເຢັນຍັງຈະມີກຳລັງປານກາງຫາແຮງສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ, ສົມທົບກັບກະແສລົມຕາເວັນອອກສຽງເຫນືອພັດປັກຄຸມເປັນສ່ວນໃຫຍ່, ຊຶ່ງຈະເຮັດໃຫ້ອາກາດຍັງເຢັນຫາໜາວເຢັນຢູ່ແຂວງພາກເຫນືອດ້ານຕາເວັນອອກ, ແຂວງໄຊສົມບູນ, ເຂດພູພຽງບໍລະເວນ, ຈາກນັ້ນວັນທີ 9-11 ກຸມພາ 2018 ຄວາມກົດດັນສູງອາກາດໜາວເຢັນທີ່ປະເທດຈີນຈະມີກຳລັງປານກາງປົກຄຸມທົ່ວທຸກພາກຂອງປະເທດລາວ, ຊຶ່ງຈະເຮັດໃຫ້ອຸນຫະພູມອາກາດອຸ່ນຂຶ້ນໃນແຕ່ລະພາກ ແລະ ຈະມີຝົນຕົກກະຈາຍພ້ອມມີລົມພັດແຮງເປັນບາງໂອກາດໃນແຕ່ລະທ້ອງຖິ່ນ, ຈຶ່ງຂໍໃຫ້ປະຊາຊົນເອົາໃຈໃສ່ຮັກສາສຸຂະພາບ, ໂດຍສະເພາະຜູ້ສູງອາຍຸ ແລະ ເດັກນ້ອຍ ຕ້ອງນຸ່ງຫົ່ມໃຫ້ອົບອຸນຢູ່ສະເຫມີເພື່ອປ້ອງກັນບໍ່ໃຫ້ເກີດການເຈັບປ່ວຍ.
