ກຳປູເຈຍພິຈາລະນາຄ້າຂາຍ ກັບຈີນດ້ວຍເງິນຢວນ
ລັດຖະບານພະນົມເປັນກຳລັງພິຈາລະນາໃຊ້ເງິນຢວນໃນການຄ້າຂາຍກັບຈີນ, ຫລັງເຈົ້າໜ້າທີ່ລະດັບສູງຂອງກຳປູເຈຍຢ້ຽມຢາມແຂວງກວາງຕຸ້ງ ໃນອາທິດຜ່ານມາ.
ສຳນັກຂ່າວຕ່າງປະເທດລາຍງານຈາກນະຄອນຫລວງພະນົມເປັນ ປະເທດກຳປູເຈຍ ໃນວັນທີ 6 ກຸມພາວ່າ: ທ່ານ ປານ ສອນສັກ ລັດຖະມົນຕີກະຊວງການຄ້າກຳປູເຈຍ ກ່າວໃນວັນທີ 6 ກຸມພາວ່າ: ລັດຖະບານພະນົມເປັນກຳລັງພິຈາລະນາຂໍ້ສະເໜີຂອງລັດຖະບານປັກກິ່ງ ໃນການໃຊ້ສະກຸນເງິນຢວນເປັນສື່ກາງໃນການຄ້າຂາຍລະດັບທະວີພາຄີກັບຈີນ ໂດຍທ່ານ ປານ ສອນສັກ ເດີນທາງຢ້ຽມຢາມຈີນ ໃນອາທິດຜ່ານມາ ແລະ ໄດ້ມີໂອກາດພົບປະຫາລືກັບຄະນະເຈົ້າໜ້າທີ່ລະດັບສູງຂອງແຂວງກວາງຕຸ້ງ ເຊິ່ງເປັນຜູ້ຍົກເອົາບັນຫາດັ່ງກ່າວຂຶ້ນມາຫາລືກັບຄະນະເຈົ້າໜ້າທີ່ຂອງກຳປູເຈຍ.
ທັງນີ້, ເງິນໂດລາສະຫະລັດຖືເປັນສະກຸນເງິນທີ່ສາມາດໃຊ້ຊຳລະໜີ້ໄດ້ຢ່າງຖືກຕ້ອງຕາມກົດໝາຍຂອງກຳປູເຈຍ ເຊັ່ນດຽວກັບເງິນຣຽວ ເຊິ່ງເປັນສະກຸນເງິນປະຈຳຊາດ, ແຕ່ກຳປູເຈຍກຳລັງເພີ່ມການພົວພັນທາງເສດຖະກິດກັບຈີນໃນຫລາຍມິຕິ ລວມທັງການໃຫ້ພາກລັດ ແລະ ພາກເອກະຊົນຂອງຈີນເຂົ້າມາລົງທຶນໃນໂຄງການພັດທະນາລະບົບໂຄງລ່າງພື້ນຖານ ແລະ ການສະແຫວງຫາຊ່ອງທາງໃຫ້ສິນຄ້າກະສິກຳຈາກກຳປູເຈຍມີໂອກາດສົ່ງອອກໄປຈີນຫລາຍຂຶ້ນ. ຈົນປັດຈຸບັນຈີນກາຍເປັນປະເທດຜູ້ລົງທຶນລາຍໃຫຍ່ທີ່ສຸດຂອງກຳປູເຈຍ ແລະ ທັງສອງປະເທດຕັ້ງເປົ້າເພີ່ມມູນຄ່າການຄ້າລະດັບທະວີພາຄີໃຫ້ໄດ້ 6.000 ລ້ານໂດລາສະຫະລັດ ພາຍໃນປີ 2020.
