ຜົນສຳເລັດກອງປະຊຸມຄັ້ງທີ 40 ຄະນະກຳມະການຮ່ວມມືລະຫວ່າງລັດຖະບານລາວ ແລະ ຫວຽດນາມ
ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ທ່ານນາຍົກລັດຖະມົນຕີ ຫງວຽນ ຊວນ ຟຸກ ໄດ້ຮ່ວມເປັນປະທານຊີ້ນຳກອງປະຊຸມຄັ້ງທີ 40 ຂອງຄະນະກຳມະການທະວິພາຄີລະຫວ່າງລັດຖະບານແຫ່ງ ສປປ ລາວ ແລະ ສສ ຫວຽດນາມປະຈຳປີ 2018 ຢູ່ທີ່ນະຄອນຫລວງວຽງຈັນ, ໃນວັນທີ 5 ກຸມພານີ້, ເພື່ອຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມຄັ້ງທີ 39 ກໍຄືຂໍ້ຕົກລົງວ່າດ້ວຍແຜນການຮ່ວມມືປະຈຳປີ 2017 ແລະ ພ້ອມກັນປຶກສາຫາລືກ່ຽວກັບທິດທາງການຮ່ວມມືໃນປີ 2018.
ທ່ານນາຍົກລັດຖະມົນຕີຂອງສອງປະເທດໄດ້ຕີລາຄາສູງຕໍ່ບັນດາຜົນສຳເລັດຂອງການຈັດຕັ້ງປະຕິບັດແຜນການຮ່ວມມືໃນປີ 2017 ຄື: ສອງຝ່າຍໄດ້ຮ່ວມກັນຈັດຕັ້ງປະຕິບັດຫລາຍກິດຈະກຳໃນການສະເຫລີມສະຫລອງປີສາມັກຄີມິດຕະພາບ ແລະ ວັນສ້າງຕັ້ງສາຍພົວພັນການທູດຄົບຮອບ 55 ປີ ແລະ ວັນເຊັນສົນທິສັນຍາປີສາມັກຄີມິດຕະພາບ ແລະ ການຮ່ວມມືຮອບດ້ານຄົບຮອບ 40 ປີ ຢ່າງເປັນຂະບວນຟົດຟື້ນ. ການຮ່ວມມືດ້ານການເມືອງ, ການຕ່າງປະເທດປ້ອງກັນຊາດ, ປ້ອງກັນຄວາມສະຫງົບສືບຕໍ່ມີສະຖຽນລະພາບ, ສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ສະໜັບສະໜູນໃຫ້ຄຳປຶກສາໃນຂອບປະຊາຄົມອາຊຽນ, ເວທີພົບປະຫລາຍຝ່າຍໃນພາກພື້ນ ແລະ ສາກົນ, ມູນຄ່າການຄ້າຂອງສອງປະເທດບັນລຸໄດ້ 936,8 ລ້ານໂດລາສະຫະລັດ, ເພີ່ມຂຶ້ນ 13,6% ເຊິ່ງລື່ນຄາດໝາຍທີ່ສອງຝ່າຍໄດ້ກຳນົດໄວ້ ແລະ ໃນປີນີ້ກໍວາງຄາດໝາຍສູ້ຊົນ ເພີ່ມຂຶ້ນ 10% ຂຶ້ນໄປ, ການລົງທຶນຂອງວິສາຫະກິດຫວຽດນາມຢູ່ລາວມາຮອດປັດຈຸບັນມີມູນຄ່າທັງໝົດ 3,7 ຕື້ໂດລາສະຫະລັດ, ຈັດຢູ່ໃນອັນດັບແຖວໜ້າໃນບັນດາປະເທດທີ່ເຂົ້າມາລົງທຶນໃນລາວ, ສິ່ງທີ່ໜ້າຍິນດີແມ່ນເຂື່ອນໄຟຟ້າເຊຂະໝານ 1 ໄດ້ດຳເນີນການຜະລິດກະແສໄຟຟ້າ ແລະ ຂາຍໄປຫວຽດນາມ, ສາມາດສ້າງລາຍຮັບເຂົ້າງົບປະມານຂອງລາວ ແລະ ຫວຽດນາມ ເປັນຈໍານວນບໍ່ໜ້ອຍ ແລະ ໄດ້ສືບຕໍ່ຊ່ວຍທຶນກໍ່ສ້າງພະນັກງານ ແລະ ນັກຮຽນ-ນັກສຶກສາລາວໄປຮຽນຢູ່ຫວຽດນາມເພີ່ມຂຶ້ນໃນແຕ່ລະປີ, ສະເພາະປີ 2018 ມີເຖິງ 1.266 ທຶນ.
ຜົນສຳເລັດຂອງກອງປະຊຸມໃນຄັ້ງນີ້, ເປັນການປະກອບສ່ວນທີ່ສຳຄັນໃນການເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດລາວ ແລະ ຫວຽດນາມໃຫ້ຂະຫຍາຍຕົວຢ່າງບໍ່ຢຸດຢັ້ງ. ໃນໂອກາດດຽວກັນນີ້, ທ່ານນາຍົກລັດຖະມົນຕີລາວ ແລະ ຫວຽດນາມ ໄດ້ເປັນສັກຂີພິຍານມອບໃບຍ້ອງຍໍໃຫ້ແກ່ບຸກຄົນ, ກົມກອງລວມໝູ່ທີ່ມີຜົນງານດີເດັ່ນໃນໄລຍະປີ 2017 ຂອງຄະນະກຳມະການຮ່ວມມືລາວ ແລະ ຫວຽດນາມ, ເຊັນບົດບັນທຶກກອງປະຊຸມຄັ້ງທີ 40, ຂໍ້ຕົກລົງວ່າດ້ວຍແຜນການຮ່ວມມື, ລົງທຶນຂອງສອງຝ່າຍລວມທັງໝົດ 12 ສະບັບ. ໃນນັ້ນ, ອັນສຳຄັນໄດ້ລົງນາມສັນຍາວ່າດ້ວຍການຮ່ວມລົງທຶນເພື່ອພັດທະນາທ່າເຮືອຫວຸ້ງອ່າງ 1-2 ແລະ 3 ເປັນທ່າເຮືອສາກົນລາວ-ຫວຽດນາມ.
