ເປີດນຳໃຊ້ອາຄານສຳນັກງານໃຫຍ່ບໍລິສັດສະຕາໂທລະຄົມ (UNITEL) ຫລັງໃໝ່
ພິທີເປີດນຳໃຊ້ອາຄານບໍລິສັດສະຕາໂທລະຄົມ (UNITEL) ຫລັງໃໝ່ ໄດ້ມີຂຶ້ນໃນວັນທີ 4 ກຸມພານີ້, ທີ່ຕັ້ງຢູ່ບ້ານໂພນໄຊເມືອງໄຊເສດຖານະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານນາຍົກລັດຖະມົນຕີ ແຫ່ງ ສປປ ລາວ ທອງລຸນ ສີສຸລິດ ແລະ ທ່ານ ຫງວຽນ ຊວນ ຟຸກ ນາຍົກລັດຖະມົນຕີແຫ່ງ ສສ. ຫວຽດນາມ, ມີບັນດາການນຳຂັ້ນສູງສອງຝ່າຍ, ພ້ອມດ້ວຍຄະນະບໍລິຫານ ແລະ ພະນັກງານບໍລິສັດເຂົ້າຮ່ວມຢ່າງພ້ອມພຽງ, ອາຄານດັ່ງກ່າວສູງ 11 ຊັ້ນ, ມີຮູບຊົງທັນສະໄໝ ແລະ ມີສີສັນໂດດເດັ່ນສວຍງາມ, ເຊິ່ງໄດ້ເລີ່ມລົງມືກໍ່ສ້າງມາແຕ່ກາງປີ 2015 ດ້ວຍມູນຄ່າທັງໝົດ 12 ລ້ານໂດລາສະຫະລັດ.
ທ່ານອຳນວຍການໃຫຍ່ບໍລິສັດສະຕາໂທລະຄົມ ກາວ ແອງ ເຊີນ ໃຫ້ຮູ້ວ່າ: ບໍລິສັດສະຕາໂທລະຄົມແມ່ນຜົນສຳເລັດຂອງການຮ່ວມທຸລະກິດລະຫວ່າງບໍລິສັດ ລາວ-ເອເຊຍໂທລະຄົມ ແລະ ກຸ່ມບໍລິສັດຫວຽດເທວ ໃນປີ 2009, ມາຮອດປັດຈຸບັນບໍລິສັດມີພະນັກງານ 1.500 ຄົນ, ມີລູກຄ້າຫລາຍກວ່າ 2,8 ລ້ານເລກໝາຍ ກວມ 52% ຂອງສ່ວນແບ່ງຕະຫລາດທົ່ວປະເທດ ແລະ ມີລາຍຮັບລວມຈາກການດຳເນີນທຸລະກິດໃນຜ່ານມາຫລາຍກວ່າ 1,22 ຕື້ໂດລາສະຫະລັດ, ໃນນັ້ນກຳໄລສຸດທິປະມານ 480 ລ້ານໂດລາສະຫະລັດ ແລະ ໄດ້ປະກອບສ່ວນພັນທະຕ່າງໆໃຫ້ລັດຫລາຍກວ່າ 350 ລ້ານໂດລາສະຫະລັດ, ມີສູນສະຖານີຮັບ-ສົ່ງສັນຍານ 6 ພັນຈຸດ, ສາຍໄຍແກ້ວຍາວກວ່າ 30 ພັນກິໂລແມັດ ກວມເອົາ 100% ຂອງບັນດາເມືອງທົ່ວປະເທດ ແລະ ພິເສດສາມາດຕິດຕໍ່ພົວພັນກັບສາກົນໄດ້ເຖິງ 10 ປະຕູເຊື່ອມໂຍງພາກພື້ນ ແລະ ມີລະບົບວົງແຫວນເຊື່ອມຕໍ່ໃນແຫລມອິນດູຈີນຢ່າງມີປະສິດທິຜົນ ອັນໄດ້ຊ່ວຍໃຫ້ ສປປ ລາວ ເປັນປະເທດທີ່ມີໂຄງລ່າງພື້ນຖານດ້ານໂທລະຄົມທີ່ໃຫຍ່ ແລະ ກວ້າງຂວາງທີ່ສຸດໃນພາກພື້ນອາຊຽນ. ໃນຕໍ່ໜ້ານີ້, ຢູນີເທວ ຈະສືບຕໍ່ພັດທະນາເຄືອຂ່າຍໂທລະຄົມເພື່ອກ້າວສູ່ນະວັດຕະກຳ 4,0 ໂດຍວາງເປົ້າໝາຍຮອດປີ 2020 ຈະສຸມໃສ່ການລົງທຶນຢ່າງມີຈຸດສຸມ ແລະ ເນັ້ນຄຸນນະພາບດ້ານບໍລິການທີ່ດີເລີດ, ຂະຫຍາຍລະບົບອິນເຕີເນັດຄວາມໄວສູງໃຫ້ບັນລຸ 80% ໃນທົ່ວປະເທດ ເພື່ອຮັບປະກັນໃຫ້ການເຊື່ອມໂຍງກັບພາຍນອກມີປະສິດທິພາບສູງຂຶ້ນ.
ທ່ານປະທານສະພາບໍລິຫານບໍລິສັດສະຕາໂທລະຄົມ ໃຫ້ຮູ້ວ່າ: ຕະຫລອດ 9 ປີຜ່ານມາ ຢູນີເທວ ໄດ້ເຄື່ອນໄຫວຫລາຍກິດຈະກຳຊ່ວຍເຫລືອສັງຄົມ ເພື່ອນຳເອົາຜົນປະໂຫຍດ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ ເຊິ່ງລວມມີມູນຄ່າຫລາຍກວ່າ 11 ລ້ານໂດລາສະຫະລັດ, ພົ້ນເດັ່ນແມ່ນການສະໜັບສະໜູນອິນເຕີເນັດບໍ່ເສຍຄ່າໃຫ້ແກ່ໂຮງຮຽນ 1.000 ກວ່າແຫ່ງໃນທົ່ວປະເທດ, ປະກອບສ່ວນເຂົ້າໃນການຍົກລະດັບວຽກງານສຶກສາ, ພັດທະນາດ້ານສະຕິປັນຍາ ແລະ ຊຸກດັນການຂະຫຍາຍຕົວຂອງວຽກງານພັດທະນາຊັບພະຍາກອນມະນຸດໃຫ້ນັບມື້ສູງຂຶ້ນ.
