ບໍລິສັດ ພູເບັ້ຍ ມາຍນິງສົ່ງເສີມຄວາມຫຼາກຫຼາຍໃນຂະແໜງບໍ່ແຮ່

ພະນັກງານຍິງປະຈຸບັນກວມເອົາ 16% ຂອງພະນັກງານທັງໝົດ, ພະນັກງານຈຳນວນຫຼາຍທ່ານໄດ້ຮັບຕຳແໜ່ງທີ່ເປັນຕຳແໜ່ງຂອງເພດຊາຍໃນເມື່ອກ່ອນ, ເຊິ່ງປະກອບດ້ວຍການຂັບລົດບັນທຸກ, ການຊີເຈາະ, ການຂຸດຄົ້ນ ແລະ ການຄວບຄຸມກົນຈັກໃນຫ້ອງຄວບຄຸມ.

ຄວາມຫຼາກຫຼາຍຂອງແຮງງານໃນບໍລິສັດແມ່ນເກີດຂຶ້ນຈາກໂຄງການຝຶກອົບຮົມ ແລະ ວິຊາຊີບໃນຫຼາຍຂົງເຂດຂອງການດຳເນີນທຸລະກິດຕົ້ນຕໍເຊັ່ນ: ໂຄງການພັດທະນາຄວາມເປັນຜູ້ນໍາຂອງບໍລິສັດ ພູເບັ້ຍ ມາຍນິງປະກອບດ້ວຍສີ່ຫຼັກສູດທີ່ຈັດຕັັ້ງປະຕິບັດພາຍໃນບໍລິສັດ ແລະ ຫຼັກສູດຈາກພາຍນອກດ້ານການພັດທະນາຄວາມເປັນຜູ້ນຳທີ່ອອກແບບມາສະເພາະສຳລັບພະນັກງານຄົນລາວທີ່ມີຕຳແໜ່ງລະດັບຜູ້ຄຸມງານ ແລະ ຮອງຫົວໜ້າພະແນກ. ເນື້ອໃນຫຼັກສູດກວມເອົາຂົງເຂດການວາງແຜນ ແລະ ຍຸດທະສາດ, ການຄຸ້ມຄອງການປະຕິບັດງານ, ການແກ້ໄຂບັນຫາ, ການສື່ສານ ແລະ ທັກສະໃນການເຈລະຈາ.

ໂຄງການນັກສຶກສາຈົບໃໝ່ໄລຍະສອງປີຂອງບໍລິສັດຝຶກອົບຮົມນັກສຶກສາເພດຍິງໃນຫຼາຍໆຂະແໜງ ເຊິ່ງປະກອບດ້ວຍວິສະວະກຳ, ວິທະຍາສາດສິ່ງແວດລ້ອມ, ທໍລະນີສາດ ແລະ ແຮ່ທາດ.

ໂຄງການຝຶກອົບຮົມຊ່າງສີມືແຮງງານດ້ານເຕັກນິກ / ໂຄງການຊ່າງຝຶກຫັດ

ພາຍໃຕ້ການຮ່ວມມືກັບໂຮງຮຽນເຕັກນິກລາວ-ເຢຍລະມັນ, ໂຄງການຝຶກອົບຮົມຊ່າງສີມືແຮງງານໄລຍະຫ້າປີ ໃຫ້ແກ່ຊ່າງສ້ອມແປງທີ່ມີທ່າແຮງ.

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບັ້ຍ ມາຍນິງ ຈຳກັດກ່າວເຖີງການດຳເນີນຂອງບໍລິສັດເພື່ອສ້າງຄວາມຫຼາກຫຼາຍທາງດ້ານແຮງງານວ່າ: “ບໍລິສັດ ພູເບັ້ຍ ມາຍນິງຮັບຮູ້ວ່າແຮງງານທີ່ມີຄວາມຫຼາກຫຼາຍປະກອບສ່ວນຕໍ່ທັດສະນະຄະຕິ ແລະ ປະສົບການຫຼາຍດ້ານເຊິ່ງເຮັດໃຫ້ການດຳເນີນທຸລະກິດມີນະວັດຕະກຳ ແລະ ຊຸກຍູ້ໃຫ້ບໍລິສັດປະສົບຜົນສຳເລັດ.”

ທ່ານ ຈັນເພັງ ກ່າວຕື່ມວ່າ: “ໃນດ້ານແຮງງານ, ບໍລິສັດຈະສືບຕໍ່ສົ່ງເສີມໃຫ້ພະນັກງານຍິງໃຫ້ໄດ້ຮັບຕໍາແໜ່ງໃນລະດັບສູງຂຶ້ນແລະມີຄວາມທ້າທາຍຍິ່ງຂຶ້ນ.”