ບໍລິສັດ ຣາຊລາວ ສົ່ງເສີມການເສີມສ້າງຄວາມຊຳນານງານເພື່ອປະກອບອາຊີບ
ພິທີລົງນາມໃນບົດບັນທຶກການຮ່ວມມືຊ່ວຍເຫລືອທາງວິຊາການລະຫວ່າງ ກະຊວງສຶກສາທິການ ແລະ ກິລາ ແລະ ບໍລິສັດ ຣາຊລາວ ຈຳກັດມະຫາຊົນໄດ້ມີຂຶ້ນໃນວັນທີ 5 ກຸມພານີ້ ລະຫວ່າງທ່ານ ກອງສີ ກອງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ກິວຈາ ສີພັດຕັງຈີລາ ປະທານບໍລິສັດຣາຊລາວ.
ກະຊວງສຶກສາທິການ ແລະ ກິລາ ໃຫ້ຮູ້ວ່າ: ກົມອາຊີວະສຶກສາໄດ້ສະເຫນີຂໍການສະໜັບສະໜູນຈາກບໍລິສັດຜະລິດໄຟຟ້າຣາຊບູລີໂຮນດິ້ງຈຳກັດ ເປັນໂຄງການໄລຍະ 2 ເພື່ອສ້າງຄວາມເຂັ້ມແຂງໃຫ້ແກ່ການພັດທະນາອາຊີວະສຶກສາ ແລະ ອົບຮົມວິຊາຊີບ, ໂດຍສະເພາະການເສີມສ້າງຄວາມຮູ້ດ້ານຊ່າງສ້ອງແປງ, ບຳລຸງຮັກສາ, ຊ່າງຈອດ-ທໍ່ນ້ຳ, ຊ່າງຄວບຄຸມການເດີນເຂື່ອນໄຟຟ້ານ້ຳຕົກ ແລະ ພິເສດແມ່ນການສ້າງສູນຄົ້ນຄວ້າ ແລະ ຝຶກອົບຮົມການປູກພຶດໃຫ້ພະລັງງານ, ຊຶ່ງຈະເປັນສາຂາວິຊາໃໝ່ໃນຂົງເຂດກະສິກຳຂອງລາວ, ໂດຍທຶນໂຄງການດັ່ງກ່າວຈະເປີດສອນ ແລະ ຝຶກອົບຮົມຕາມວິທະຍາໄລຄື: ວິທະຍາໄລເຕັກນິກວິຊາຊີບແຂວງຄຳມວ່ນ, ວິທະຍາໄລເຕັກນິກແຂວງວຽງຈັນ, ຫລວງພະບາງ ແລະ ໂຮງຮຽນເຕັກນິກ-ວິຊາຊີບແບບປະສົມແຂວງໄຊຍະບູລີ. ຄາດວ່າຈະສາມາດສ້າງນາຍຊ່າງທີ່ມີຄວາມຊຳນານໃນຂະແຫນງດັ່ງກ່າວຫລາຍກວ່າພັນຄົນໃນຕໍ່ໜ້າ.
