ສະມາຊິກພັກຢ່າພາກັນເຂົ້າຂີ້ໝ້ຽງ

ໂດຍ: ທິດກ່ຳ

ໃນປະໂຫຍກທີ່ ທິດກ່ຳ ໄດ້ ຕັ້ງຂຶ້ນນີ້, ເຮົາເຫັນວ່າມັນມີຄຸນຄ່າທັງມີຄວາມໝາຍ ແລະ ທັງມີຄຸນປະໂຫຍດທີ່ຈະເຮັດໃຫ້ສະມາຊິກພັກ-ພະນັກງານເຮົາທຸກສະຫາຍຕ້ອງໄດ້ພາກັນຄິດ ແລະ ພ້ອມກັນແກ້, ໃນປະໂຫຍກ ທີ່ວ່າສະມາຊິກພັກຢ່າພາກັນ ເຂົ້າຂີ້ໝ້ຽງມັນກໍປຽບເໝືອນມີດ, ພ້າ, ຂວານ ຫລື ຫອກຫ້າວ ຫລາວແຫລມຕ້ອງມີຄົມແຫລມຢູ່ຕະຫລອດ, ຢ່າໃຫ້ມັນເຂົ້າຂີ້ໝ້ຽງ. ຢາກໃຫ້ມີຄົມແຫລມ ແລະ ໃຊ້ການໄດ້ທຸກເວລາ, ທຸກກໍລະນີກໍຕ້ອງໄດ້ຝົນ, ໄດ້ລັບມັນເລື້ອຍໆ. ນີ້ມັນກໍປຽບເໝືອນແກ່ນແທ້ ແລະ ທາດແທ້ຂອງ ສະມາຊິກ ພັກປະຊາຊົນປະຕິ ວັດລາວ. ຖ້າຈະຕີຄວາມໝາຍສະມາຊິກພັກເຮົາກໍຕ້ອງມີຄວາມໂດດເດັ່ນ, ມີຄວາມຮູ້, ຄວາມສາມາດ, ນຳພາເກັ່ງ, ເປັນແບບຢ່າງນຳໜ້າມະຫາຊົນໃນທຸກວຽກງານຢູ່ຕະຫລອດເວລາ.

ດັ່ງພວກເຮົາຮູ້ນຳກັນແລ້ວວ່າ: ພັກປະຊາຊົນປະຕິວັດລາວ ໄດ້ກຳເນີດເກີດຂຶ້ນໃນສະໜາມຮົບແຫ່ງການຕໍ່ສູ້ປະຕິວັດ. ກວ່າປະເທດຊາດຈະໄດ້ຮັບການປົດປ່ອຍ, ມີເອກະລາດ, ມີການສ້າງສາພັດທະນາບ້ານ ເມືອງມາຮອດປັດຈຸບັນນີ້, ບັນດາສະຫາຍສະມາຊິກພັກທັງຮຸ້ນ ກ່ອນ ແລະ ຮຸ້ນປັດຈຸບັນໄດ້ເສຍ ສະຫລະທັງອຸທິດຊີວິດເລືອດ ເນື້ອເຫື່ອໄຄຂອງ ຕົນມາຫລາຍຮຸ້ນຄົນ ແລ້ວສະໄໝກ່ອນພັກ ເຮົາເຄື່ອນໄຫວແບບປິດລັບ, ສະຫາຍໃດເປັນສະມາຊິກກໍປິດ ລັບເພາະຢ້ານເປັນເປົ້າໝາຍຂອງສັດຕູ. ສະຫາຍໃດເປັນສະມາຊິກພັກກໍຕ້ອງມີລະບຽບວິໄນ, ຢູ່ໃນກົດຂອງພັກຢ່າງເຄັ່ງຄັດ. ນອກຈາກນັ້ນ, ກໍຕ້ອງ ເປັນແບບຢ່າງເປັນຄົນສັດຊື່ ແລະ ຈົ່ງຮັກພັກດີຕໍ່ພັກ, ຕໍ່ຊາດ ແລະ ຕໍ່ປະຊາຊົນອີ່ຫລີມາ ໃນຍຸກປັດຈຸບັນ ພັກເຮົາໄດ້ເຄື່ອນໄຫວແບບເປີດເຜີຍ, ສະຫາຍໃດໄດ້ເປັນສະມາຊິກພັກກໍມີການ ເປີດເຜີຍ, ຖ້າສັງຄົມ ຫລື ບຸກ ຄົນໃດບໍ່ທັນຮູ້ກໍຕ້ອງໄດ້ໂຄສະນາ ໃຫ້ເຂົາຮູ້ເພາະຖືວ່າອົງການຈັດຕັ້ງຂອງພັກກັບສະຫາຍສະມາຊິກພັກເປັນຜູ້ທີ່ມີ ຄວາມດີ, ມີຄວາມກ້າວໜ້າ ໂດດເດັ່ນກວ່າ ໝູ່ໃນອົງການ ຈັດຕັ້ງກົມກອງ ແລະ ໃນໝູ່ມະຫາ ຊົນໃນການປົກຄອງບໍລິຫານ ບ້ານເມືອງເຮົາພັກຕ້ອງ ເປັນກົກທັງເປັນສະໝອງກົນເພື່ອຄົ້ນຄວ້າ ແລະ ນຳເອົາປັດ ຊະຍາແຫ່ງການນຳພາມາເປັນທິດຊີ້ນຳ ແລະ ຈັດຕັ້ງປະຕິບັດ ໃຫ້ເກີດໝາກເກີດຜົນສູງສຸດ ແກ່ປະເທດຊາດຫລັກການນຳພາຂອງພັກຄືພັກເປັນຜູ້ຊີ້ນຳ- ນຳພາ, ລັດຄຸ້ມຄອງ, ທຸກຄົນຕ້ອງເປັນເຈົ້າ. ຫລັກການບໍລິຫານວຽກຂອງພັກແມ່ນປະຊາທິປະໄຕລວມສູນບຸກຄົນຮັບຜິດຊອບ. ເມື່ອເປັນດັ່ງທີ່ວ່ານີ້, ພັກຕ້ອງຮູ້ກ່ອນ, ເຫັນກ່ອນ, ສະມາຊິກພັກຕ້ອງ ເປັນແກນນຳ ແລະ ເປັນຫົວຫອກນຳໜ້າ ໃນການຈັດຕັ້ງປະຕິບັດບັນດາແຜນນະໂຍບາຍ, ທຸກມະຕິຄຳສັ່ງຂອງອົງຄະນະພັກວາງອອກຕ້ອງໃຫ້ເດັດຂາດ ແລະ ຖືກຈັດຕັ້ງປະຕິບັດຢ່າງເຂັ້ມງວດ.
ດ້ວຍເຫດຜົນດັ່ງກ່າວ, ໃນພາລະກິດການຕໍ່ສູ້ປະຕິວັດຊາດປະຊາທິປະໄຕຂອງພວກ ເຮົາ ຈຶ່ງໄດ້ຮັບໄຊຊະນະຍ້ອນ ໄດ້ຮັບແຮງໃຈ, ສະໜັບສະໜູນ ແລະ ໄດ້ຮັບການຮ່ວມມືຈາກປະຊາຊົນບັນດາເຜົ່າສາມາດປົດປ່ອຍປະເທດໄດ້ຢ່າງສົມບູນໃນປີ 1975.

ຕົກມາຮອດຍຸກສ້າງສາ ແລະ ພັດທະນາປະເທດຊາດ ພັກເຮົາກໍຍັງສືບຕໍ່ກຳອຳນາດ ແລະ ໄດ້ບໍລິຫານປົກຄອງປະເທດຊາດບ້ານເມືອງຢ່າງໜັກແໜ້ນ ແລະ ເຂັ້ມແຂງຕະຫລອດໄລຍະ 40 ກວ່າປີ ທີ່ພັກ ປະຊາຊົນປະຕິວັດລາວໄດ້ຊີ້ນຳ-ນຳພາປົກຄອງບ້ານເມືອງ ປະເທດຊາດ ຂອງພວກເຮົານັບມື້ມີຄວາມຈະເລີນຮຸ່ງເຮືອງ ແລະ ກ້າວເດີນຕາມເສັ້ນທາງອັນສະຫງ່າງາມແຫ່ງຍຸກສະໄໝ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນ ປະເທດຊາດມີຄວາມສະຫງົບໝັ້ນຄົງ. ນີ້ຄືຜົນງານລວມຍອດຂອງພັກທີ່ມີຕໍ່ຊາດ ແລະ ປະຊາຊົນໃນຍຸກພັດທະນາ.

ໄປຄຽງຄູ່ກັບຄວາມກ້າວໜ້າຂອງປະເທດຊາດ ແລະ ຄວາມທະນົງອົງອາດຂອງພັກ ເຊິ່ງໄດ້ຝັງຢູ່ໃນດວງໃຈ ຂອງປະຊາຊົນບັນດາເຜົ່າຕະຫລອດ ມາແຕ່ຄຽງຄູ່ກັນນັ້ນກໍຍັງມີສະຫາຍສະມາຊິກພັກເຮົາຈຳນວນບໍ່ໜ້ອຍໄດ້ສ້າງຄວາມເສຍຫາຍແກ່ບົດບາດຂອງພັກ ເປັນຕົ້ນກິນສິນບົນ, ສໍ້ລາດບັງຫລວງ, ເອົາຖານະຕຳແໜ່ງຂອງຕົນໄປ ແອບແຝງຫາຜົນປະໂຫຍດສ່ວນຕົວ, ຫາເລາະຊື້ຂາຍ ແລະ ຈັບຈ່ອງເອົາດິນດອນຕອນຫຍ້າ, ນາບຂູ່ ແລະ ຂົ່ມຂູ່ປະຊາຊົນ, ເຮັດວຽກງານເປັນກຸ້ມກ້ອນບໍ່ຈິງໃຈ ແລະ ເຄັ່ງຄັດຕໍ່ໜ້າທີ່ວຽກງານທີ່ພັກກໍຄືປະຊາຊົນໄດ້ມອບໝາຍໃຫ້, ບໍ່ເປັນແບບຢ່າງທີ່ດີ, ບໍ່ມີຄວາມຮູ້ຄວາມສາມາດ, ບໍ່ຕອບສະໜອງໄດ້ກັບຄວາມຮຽກຮ້ອງຕ້ອງການໃນສະພາບການໃໝ່ຂອງຊາດ, ເປັນສະມາຊິກພັກຊອດກະຈາທຸກຢ່າງທີ່ໄດ້ກ່າວມານີ້ ລ້ວນແລ້ວແຕ່ເປັນພະຍາດຂີ້ໝ້ຽງທີ່ຄ່ອຍກັດເຊາະໃຫ້ສະມາຊິກພັກເຮົາເປ້ເພ ແລະ ເຊື່ອມຄຸນໄປໃນຕົວ.